Joe kan kaka foetoe gi tesi nanga boen bakapisi?
„Loekoe hem soso leki prisiri, mi brada, te difrenti tesi de miti joe, foedi joe sabi dati na tesi fasi foe joe bribi e tjari hori-doro kon.” — Jakobus 1:2, 3.
1. Efoe wi e leesi foe dem tesi di kristen soema ben ondrofeni en e ondrofeni ete, soortoe aksi kan kon ini wi prakseri?
TE SOEMA e leesi foe dem tesi foe kristen soema ini na fosi eeuw, nanga foe dem wan ini nazi-kondre ini na Tweede Grontapoe-feti, nanga ini moro krosbee tem, ini kondre tapoe na heri grontapoe, wi ben jere son wan mindri dem e taki: „Mi de aksi misrefi efoe mi ben sa kan hori doro”. Ma srefi ini na ala dee libi foe ala kristen soema problema de kon, di no moeilijk wawan foe tjari, ma di de so fromoe, dati dem no sabi fa dem moe doe nanga dem. Wan kristen soema di e dini Gado, kan hori doro? A kan kaka foetoe nanga boen bakapisi gi problema nanga tesi?
2, 3. Foe sainde na brifi foe Jakobus de foe na tem joisti en a ben fiti?
2 Jakobus, na afoe brada foe Jezus Kristus, ben skrifi now joisti na dem soema di ben ondrofeni tesi en di ben moe kaka foetoe gi dem soortoe problema dati. Dem woortoe foe hem e gi wi troostoe, bikasi a no ben skrifi wawan di kristen soema ben habi hebi vervolgoe, ma di ben go na wan ten pe na situatie foe na Romein naatsi ben sa kon moro ogri spesroetoe gi kristen soema.
3 A ben de sjatoe baka di Jakobus ben skrifi, dati na Romein Keizer Nero ben poti na fowtoe tapoe kristen soema ini Rome foe na bigi faja ini 64 foe wi teri en di ben pori foeroe foe na foto dati. A no de foe taki dati disi ben tjari vervolgoe gi kristen soema ini na heri kondre. Dan na pikinso na baka dati, ini na jari 70, dem Romein sroedati-makti ben sa pori Jeruzalem nanga na kondre Juda. Bifo na pori foe na foto dem kristen ini Jeruzalem, di ben jere Jezus warskow, ben sa lon gwe pasa na Jordaan, en nanga dati dem ben sa kibri libi, ma dem ben sa lasi dem goedoe en ben moe kaka foetoe gi foeroe pina-libi.
4. Fa na brifi foe Jakobus e jepi kristen soema, sodati dem no e fadon ini na verkeerti fasi di e kon na krin ini Psalm 73:2, 3, 5, 11-13?
4 Na brifi foe Jakobus ben kon na a joisti tem. Ma efoe kristen soema e kisi hebi vervolgoe ofoe dem no e kisi hebi vervolgoe, dem habi hori doro fanowdoe. Dem moe libi in wan grontapoe di no e hori hem srefi na kristen gronprakseri, aladi dem habi foe doe boiti dati nanga siki nanga foeroe tra problema. Na di foe 73 Psalm e taki foe moeilijkheid di dienstknegti foe Gado moe kaka foetoe gi, ma di soema di no de kristen soema no habi problema nanga dati. Fa disi doe kon? Foedi soema di no de kristen soema gewoonlijk no e broko ede foe sani. Dem no de hoopoe tapoe Gado net soleki kristen soema, en dem e misi ooktoe na bribi ini Gado, sodati noti e beweegi dem foe dini Gado. Na brifi foe Jakobus e jepi kristen soema foe no fadon ini na fasi di Asaf, na skrifiman foe na psalm dati, ben habi foe wan pisi tem. Asaf ben taki:
„Foe taki foe mi, bijna mi foetoe ben drifi, bijna mi foetoe ben grati gwe. Bikasi mi ben kon kisi bigi ai tapoe dem soema di e meki bigi, di mi ben si na vreede foe dem ogrisoema. Dem no ben de srefi ini na moeiti foe dem soema di e dede, sani no e trobi dem so leki tra soema. En dem ben taki: ’Fa Gado ben kon sabi hem? En sabi de na a moro Heewan?’ Loekoe! Disi na dem ogrisoema, di no e broko ede nanga sani foe tem di no a marki. Dem meki dem sani foe tan na libi kon moro foeroe. Troe troe, a ben de foe soso dati mi ben krin mi ati en dati mi ben wasi mi anoe soso foe sori dati mi no habi fowtoe.” — Ps. 73:2, 3, 5, 11-13.
5. Jakobus e skrifi hem brifi gi „dem twarfoe lo, di de panja panja alape.” Gi soema a ben skrifi?
5 Jakobus e bigin hem brifi tapoe wan fasi pe a no e meki bigi, foe sori tapoe na famiri fasi di a ben de nanga Jezus Kristus, ma a de kari hemsrefi „wan srafoe foe Gado en foe na Masra Jezus Kristus”. A de taki nanga „dem twarfoe lo di de panja panja alape” nanga dem woortoe: „Mi de taki oenoe odi!” (Jak. 1:1). Disi no de dem twarfoe lo foe Israël na skin fasi, soleki wi kan si ini na brifi. Jakobus no ben sa skrifi na so wan fasi efoe dem leesiman foe hem ben de soso djoe na skin fasi. Boiti dati, so wan odi ben de gewoon mindri dem kristen soema, spesroetoe dem wan di dem famiri ben de troe troe djoe soema, soleki Jakobus. Paulus e kari na kristen gemeente „na Israël foe Gado” (Gal. 6:16; loekoe toe Rom. 2:28, 29). Ini na tem dati dem kristen soema ben panja ini na heri Romein koonoekondre. Dem moeiti foe na apostel Paulus ini na Westsee pisi foe na beschaafde grontapoe en Petrus moeiti ini na gebied foe Babylon, ini na Oostsee, ben tjari foer gro kon di ben meki dem kristen e prisiri. Petrus ben skrifi hem brifi fosi gi „dem vreemde soema di e libi wan pisitem en di panja” ini pisi foe Klein Azië. — 1 Petr. 1:1.
NA MARKI FOE TESI NANGA HORI DORO
6. Foe sainde wan kristen soema moe „loekoe hem soso leki prisiri” te a de ondrofeni tesi en foe soortoe waarde tesi de gi hem?
6 Jakobus e go moro fara: „Loekoe hem soso leki prisiri, mi brada, te difrenti tesi de miti joe” (Jak. 1:2). Jezus ben taki ini hem bergi-preeki „Kolokoe joe de te soema e kosi joe en vervolgoe joe en e taki ala soortoe lee foe joe foe mi nem ede. Prisiri foe dati en djompo foe prisiri, bikasi joe paiman de bigi ini hemel” (Matt. 5:11, 12). No wawan dati wan hemel paiman e wakti dem, ma na horidoro ondro tesi habi ooktoe now wan boen krakti, soleki Jakobus e sori moro fara: „Foedi joe sabi dati na tesi fasi foe joe bribi e tjari hori-doro kon” (Jak. 1:3). Wan bribi di e hori doro ondro tesi, moro boen — a de wan tesi bribi. Den soortoe bribi disi e meki a kon de so, dati wan soema e sori wan moro krakti hori-doro te wan tra tesi kon.
7. Foe sainde wan kristen soema no moe proberi foe lon gi tesi ofoe foe sainde a no moe weri nanga dati?
7 Wan kristen no moe proberi foe lon gi tesi ofoe foe prakseri dati a hori doro langa nofo kaba. Jakobus e taki: „Ma meki na hori-doro doe hem wroko, foe joe kan de boen doro, sondro vlaka na ala fasi, sondro foe mankeri wan sani” (Jak. 1:4). Na wroko di hori-doro e doe inisee foe wan kristen soema no moe hinder nanga kragi, knoroe nanga oproeroe. Efoe a de hori-doro getrouw, sondro foe kragi na Gado ofoe hem brada en sondro foe frede ofoe weri, tapoe foe verteri tra soema foe Gado prakseri nanga jepi foe hem Koonoekondre en de sondro vlaka na ala fasi. So wan hori-doro sa jepi hem foe kenki hem eegi fasi. Sondro foe ondrofeni tesi nanga na jepi foe hori-doro, wan soema no kan de bekwaam ini disi. Wan soema no kan de wan kristen soema di boen doro doro. A sa tron wan kristen di kan jepi trawan nanga redelijkheid, firi gi trawan nanga sari-ati. — Loekoe Matteus 5:48; 24:13.
KONI FOE KAKA FOETOE GI TESI
8, 9. O seker wi kan de dati wi sa habi na koni foe kaka foetoe gi wan bepaalde tesi en hori doro ondro disi?
8 O seker wi kan de dati wi sa habi na krakti nanga na koni foe kaka foetoe gi wan bepaalde problema, soortoe problema dati kan de toe, en foe hori doro? Jakobus e taki: „Efoe wan soema na oen mindri mankeri koni, dan a moe tan aksi Gado, bikasi a de gi na ala soema sondro gridi en sondro verwijti en a sa kisi hem” (Jak. 1:5). Wi kan de foe datede seker, dati efoe wi e begi foe koni foe kaka foetoe gi wan problema ofoe tesi, di wi tanapoe na hem fesi, dati wi sa kisi na koni dati.
9 Dati no wani taki dati alatem na problema poeroe na pasi ofoe dati wantron wantron a sa loesoe, ma dati wi kan waka na pasi, di sa doe wisrefi nanga ala tra soema di de na ini boen na jeje fasi. Wi sa kan hori doro ondro na tesi te na a kaba e kon leki moro betre kristen soema leki wi ben de di na tesi ben kon na wi tapoe. En tra soema di ben si wi en di ben habi wan joisti ati, sa kisi jepi.
10. (a) Soortoe piki wi e kisi foeroe tron te wi e aksi foe wan sani? (b) Na soortoe fasi wi kan kisi piki foe wan begi pe wi e aksi koni foe kaka foetoe gi wan bepaalde tesi?
10 Wan toe sani de, di kande wi e begi foe dem, ma di kan waka wan heri tra fasi, dan wi ben sa wani. Gado sa jere wi begi, ma kande tapoe wan heri tra fasi, dan wi ben verwakti; na sani sa pasa di Gado sabi dati disi sa de na moro boen sani gi wi. Son sani di wi e begi foe dem no ben sa tjari boen kon gi wi efoe dem ben sa gi wi leki fa wi ben begi, ofoe wani. Ma san Gado e pramisi wi seker, de koni foe kaka foetoe gi wan tesi. Wi kan de seker dati wi sa kisi na fanowdoe koni efoe wi aksi tapoe na joisti fasi. Na koni sa gi tapoe wan ofoe moro foe dem dri fasi disi: 1) bepaalde tekst di e gi na piki, di wi habi fanowdoe, sa tjari kon na wi prakseri nanga jepi foe wi eegi studi ofoe nanga jepi foe wi brada. 2) Omstandigheid nanga sani di pasa, soleki na tiri foe Gado kan seti hem, sa jepi wi foe si krin san wi moe doe. Kande bepaalde hinder tapoe wi pasi sa poeroe na pasi. 3) Gado santa engel kan troesoe wi verstan ini na joisti richting.
11. Fa Gado e gi sondro gridi en sondro verwijti?
11 Gado e gi sondro gridi, dati wani taki, nanga wan opregti fasi, moro leki wi ben aksi (Ef. 3:20; 1 Joh. 5:14, 15). A de doe disi sondro verwijti. Na a tra see a de so dati efoe joe aksi wan soema wan sani, a kan piki: „Dati na wan don aksi”! En a ben sa kan loekoe joe srefi nanga veragti. Baka difrenti aksi, boiti dati, a ben kan lasi hem pasensi en tapoe joe mofo foe weegri joe san joe e aksi. Gado no de so. A no e taki nooiti: „Fa disi de wan don aksi”! En a no de gi no wan soema na firi dati a de wan lagi soema. A no de verwijti joe foe joe fositem libi, soleki soema gwenti foe doe. A habi foeroe waarderi gi wan soema di habi na bribi en di e broko hem ede nofo foe begi alatem doro. — Loekoe Lukas 18:1-14.
12. Foe san wi kan de seker tapoe na gron foe dem woortoe foe Jakobus „a sa kisi hem”?
12 „A sa kisi hem”. Koni, di wi kan kisi ondro na tiri foe Gado santa jeje, de dem sani di Gado e gi nanga ala prisiri na hem dienstknegti. A e breeti te wi e aksi foe koni. Na koni disi de alatem gi na boen foe wi en a de jepi wi te wi e begi ofoe wi kan verstan fa Gado Woortoe habi foe doe nanga na situatie foe wi (1 Kor. 2:9, 10). Jezus ben taki na fesi: „Efoe joe . . . aladi joe de ogri, sabi foe gi joe pikin boen sani, o meni moro dan na Tata foe hemel sa gi santa jeje na dem soema di e aksi hem foe dati!” — Luk. 11:13; Mark. 11:24.
NA PORI KRAKTI FOE DEGEDEGE
13. Na soortoe fasi wan soema moe begi foe koni en foe sainde?
13 „Ma a moe tan aksi ini bribi, a no moe degedege kwetkweti, bikasi soema e degedege, de leki wan skwala foe se di winti e drifi en fringi dja go drape” (Jak. 1:6). Na soema di e aksi moe poti ala bribi ini Gado nanga hem Manpikin en dati dem de klari foe gi san de fanowdoe en dem no moe prakseri na no wan tra sani leki na dem afersi foe na kristen bribi nanga na prakseri foe Gado. A no moe begi foe na wan sani, en abi pikinso na lostoe foe wan tra sani. Na begi foe hem moe komoto te foe na dipi foe hem ati. Noso a de leki wan skwala foe se, di e go dja go drape. Ibri winti — ibri krakti foe dorosee, ibri frede — e tjari wan kenki kon ini hem.
14. San Jakobus e taki moro fara foe na soema di e degedege?
14 Jakobus te foe kaba e taki so wan sma: „Na soema dati no moe prakseri dati a sa kisi wan sani foe Jehovah; a de wan toe-ati soema, a no de vaste ini ala hem pasi” (Jak. 1:7, 8). A de nanga toe-ati, bikasi a de proberi foe waka na a srefi tem 2 pasi, a prati hem srefi na mindri dem sani foe na grontapoe nanga dem sani foe Gado, ofoe dem sani di no habi noti foe doe nanga Gado Woortoe, aladi na wan tron a de prakseri disi en na tra tron dati (Loekoe Matt. 6:24). A ben sa draidrai srefi foe poti wan sani na fesi foe Gado. Na wan tron a de nanga faja en baka dati a de nanga brokoskin. So a de no wawan ini na tori foe begi, ma ooktoe ini tra sani di habi foe doe nanga bribi. A no de wan balans kotoigi foe Jehovah di e hori hem woortoe. Na bijbel e taki na tra see: „Sondro bribi a no kan dati wi kan prisiri Gado, bikasi soema e kon na Gado, moesoe bribi dati a de en dati a de pai dem soema di e soekoe hem ernstig.” — Hebr. 11:6.
RAI DI DE FOE WAN SOEMA DI GOEDOE EN PÔTI
15. Fa wan mofina brada kan prisiri „foe na heefasi foe hem”?
15 Te Jakobus e go moro fara foe prakseri foe tesi, dan a de taki foe wan tesi di e kon foer tron: „Meki na mofina brada . . . prisiri foe na hee foe hem” (Jak. 1:9). Na moro bigi pisi foe kristen soema ben de en dati de ooktoe so ete, soema di komoto foe eenvoudig presi (1 Kor. 1:26). Foedi dem no habi so foeroe moni, dan na moni kondisi foe dem kan meki hem moeilijk gi dem te vervolgoe kon. Ooktoe son wan di ben goedoe, ben kon pôti di vervolgoe kon. Ma ete dem kan prisiri, foedi na sakafasi maatschappelijke presi foe dem ini a kristen gemeente no de ondrofeni lasi. Dem de pikin foe Gado, „kompeborgoe foe dem santawan nanga memre foe na osofamiri foe Gado” (Ef. 2:19). Na pôtiwan kan frigiti hem pôtifasi na grontapoe foe na toemsi bigi goedoe foe na matifasi foe hem nanga Gado en Kristus en na lobi foe hem kristen brada. En a kan prisiri dati a kan jepi trawan foe verteri dem na „boen njoensoe”. Tapoe dem sani disi a kan meki bigi.
16. Fa wan goedoe brada kan prisiri „foe na lagifasi foe hem”?
16 Foe na see foe wan goedoeman, di tron wan kristen soema, a kan prisiri „foe na lagifasi foe hem”. Na goedoe foe hem no e teri troe troe moro. Na presi foe na geest foe Kristus habi leki marki heememre, san e doe kon foeroe tron foe goedoe, a habi leki marki sakafasi (Fil. 2:3-8). A kan prisiri, dati a kan si now nanga jepi foe Gado boen-ati, „na bidrigi krakti foe na goedoe” en dati a de si dati a no moe poti hem vertrouw tapoe goedoe (Matt. 13:22). Ooktoe a de verstan dati a no habi waarde foe gi tem nanga moeiti na a kisi foe goedoe foe grontapoe, foedi disi makriki e meki na jejefasi en foeroe tron na gosontoe foe wan soema pori. Jakobus e gi wi reden foe sainde dati de so: „Bikasi leki wan bromki foe dem groen sani di e gro a sa pasa gwe.” A sabi dati hem goedoe no sa tan ini hem heri libi-tem. „Bikasi na son e go na tapoe nanga na faja foe hem en a de meki dem groen sani di e gro kon dree en dem bromki foe dem e fadon en na moifasi fa dem e loekoe na dorosee e gwe. Na so na goedoeman sa dree gwe ini hem fasi foe libi.” — Jak. 1:10, 11.
17. Verteri foe san Jakobus skrifi san e pasa nanga wan goedoeman nanga hem „moifasi”.
17 Dem groen sani di e gro e dree nanga na son en na moifasi foe dem e gwe. So a de toe nanga wan goedoeman te ai kon owroe en dede, na moi foe na goedoe di lontoe hem en e moi ala sani, e gwe. Pôtisma e dede toe, ma noiti dem ben habi na moifasi na dorosee di wan goedoeman habi. Na „moifasi” disi foe wan goedoeman e kon de gi hem erfgenaam nanga trawan, aladi na zaak di a bow e panja en dem prakseri di a ben habi en di a ben feti na dem baka, dem no e loekoe dem. Aladi „hem fasi foe libi” di a de waka en kande a de tapoe wan zakenreis ofoe ai meki plan kon troe foe kisi moro goedoe, a de dede. Foeroe tron na dede foe wan goedoeman e kon bifo a kan njan switi foe hem goedoe. Na goedoeman di tron wan kristen kan njan boen troe troe foe hem goedoe, foedi a de gebroiki dem foe meki dem afersi foe na Koonoekondre kon na fesi. Gewoonlijk a kan seti sani foe gi moro tem na meki bekenti foe na „Boen njoensoe” en a kan gi bijdragen foe sorgoe foe konmakandrapresi en foe go na fesi foe Koonoekondrewroko, soleki disi e doe na a heri grontapoe.
NA PAIMAN FOE HORIDORO
18. Foe soortoe paiman Jakobus skrifi foe dem soema di e pasa tesi getrouw?
18 Te Jakobus ini dem vers 3 nanga 4 e sori tapoe dem winimarki foe hori-doro di e kon wantron wantron, a de poti krakti ini vers 12 tapoe kabapisi — na paiman foe tan vaste ini na pasa foe tesi. Ai skrifi: „Kolokoe na man de di e tan hori doro ondro tesi, bikasi baka te dem feni hem boen, a sa kisi na kroon foe libi, di Jehovah ben pramisi na dem di e tan lobi hem” (Jak. 1:12). Na „kroon foe libi” de na presenti foe libi, di Gado e gi na „dem di e tan lobi hem”, awasi dem foeroe tesi di Gado e meki wroko makandra foe meki hem dienstknegti kon volmaakti — efoe dem e hori doro vaste, sondro kragi en nanga hem jepi e de winiman (Rom. 8:28). Disi no wani taki dati wan kristen verdini na reti tapoe libi foe hem wroko foe horidoro, bikasi na libi de wan fri presenti nanga jepi foe na bribi ini Jezus Kristus. Na kristen soema di e hori doro ben bewijsi dati a habi na bribi dati. Dem tesi na kwaliteit foe hem en a ben de krakti nanga volmaakti.
19. San de foe datede na joisti kristen loekoe tapoe na kisi foe tesi?
19 Wan kristen soema soboen KAN pasa ala tesi di ai miti, srefi na moro hebi wan. A no moe waka go miti na tesi disi ini hem eegi krakti. Na presi foe dati a sa soekoe na koni nanga krakti foe Gado nanga jepi foe begi ini na nem foe Jezus Kristus, di, na a tem di a ben de na grontapoe, ben gi na volmaakti eksempel foe hori-doro. Wan kristen kan poti ala vertrouw ini na troostoe djaranti foe na apostel Petrus: „Baka te oenoe pina wan sjatoe tem, dan na Gado foe ala no-verdini-boen-ati, di ben kari oenoe kon na hem teego glori akroederi nanga Kristus, hemsrefi sa meki na leri foe oenoe kon na wan boen kaba, hem sa meki oenoe vaste, hem sa meki oenoe kon tranga.” — 1 Petr. 5:10; Rom. 8:35-39.