Lobi E Gi Wi Deki-ati fu Preiki
1 Sma sabi wi leki Yehovah Kotoigi heri bun fu di wi e preiki a Kownukondre boskopu fayafaya (Mat. 24:14). Moro leki siksi milyun sma e preiki na heri grontapu; nyunwan e kon na ini a grupu disi te den e bigin nanga a preikiwroko. Den e tyari den nomru fu a wroko disi kon na wan baka te den kisi fu yere fa sma teki prati na a wroko disi.
2 San e gi wi deki-ati fu gi wisrefi fu du so wan muilek wroko? A no de so taki wan sma e dwengi wi, noso taki wi wani kon gudu noso fu di wi wani kisi spesrutu grani. Biginbigin, furu fu wi ben fredefrede bika wi ben firi taki wi no koni nofo fu du a wroko disi, èn furutron den sma no ben wani arki (Mat. 24:9). Furu sma no man frustan san e gi wi deki-ati fu du a wroko disi. A musu de so, taki wan tumusi prenspari reide de, fu san ede wi e horidoro.
3 A Krakti Di Lobi Abi: Yesus ben sori san na a moro bigi komando, di a ben taki dati wi ’musu lobi Yehovah nanga wi heri ati èn nanga wi heri sili èn nanga wi heri frustan èn nanga ala wi krakti’ (Mark. 12:30). Wi lobi Yehovah fu di wi e frustan trutru suma a de èn san a de — a Soeverein Masra, a Mekiman fu ala sani, di ’warti fu kisi a glori, a grani nanga a krakti’ (Openb. 4:11). Yu no kan teki den tumusi moi eigifasi fu en gersi nanga noti.—Ex. 34:6, 7.
4 Te wi sabi èn lobi Yehovah dan dati e gi wi deki-ati fu meki a leti fu wi skèin na fesi libisma (Mat. 5:16). Wi leti e skèin te wi e prèise en na publiki, te wi e taki fu den wondru wroko fu en èn te wi e panya a boskopu fu en Kownukondre. Neleki na engel di de na mindrisei fu a hemel, wi abi „têgo bun nyunsu fu meki bekènti leki prisiri nyunsu . . . gi ibri nâsi nanga lo nanga tongo nanga pipel” (Openb. 14:6). A lobi fu wi e gi wi deki-ati fu preiki na heri grontapu.
5 Grontapu e si a preikiwroko fu wi leki „wan don sani”, wan sani di sma no musu arki (1 Kor. 1:18). Na ala sei sma meki muiti fu tapu a wroko fu wi. Ma fu di wi abi wan tranga lobi meki dati gi wi krakti fu taki, neleki fa den apostel ben du: „Wi no kan tapu fu taki fu den sani di wi si èn yere. . . . Wi musu gi yesi na Gado leki tiriman moro leki na libisma” (Tori. 4:20; 5:29). A preikiwroko e go doro na ala sei fu grontapu awansi gens de.
6 A lobi fu wi gi Yehovah na neleki wan faya di de so tranga na ini wi, so taki wi e meki a granfasi fu en bekènti na ala sei (Yer. 20:9; 1 Petr. 2:9). Wi o go doro fu „meki den sani di a e du bekènti na ondro den pipel . . . bika a sani di a du bigi moro ala sani”!—Yes. 12:4, 5.