A diniwroko foe wi — Wan fasi foe sori taki wi abi troe lobi
1 Nanga wi diniwroko wi e sori taki wi e gi jesi na den toe moro bigi komando (Mat. 22:37-39). A lobi di wi abi gi Jehovah e boeweigi wi foe taki foe en na wan positief fasi. A lobi di wi abi gi den sma na wi sei e boeweigi wi foe gi den deki-ati foe soekoe a sabi foe a wani foe Gado èn den sani di a abi na prakseri, so taki neleki wi, den kan kon lobi Jehovah èn kan meki taki den kan kisi a prijs foe têgo libi. So boen, nanga wi diniwroko wi e gi Jehovah nen grani èn wi e prati a Kownoekondre howpoe di warti srefisrefi nanga den sma na wi sei. Ija, a diniwroko foe wi na wan fasi foe sori taki wi abi troe lobi gi Gado èn gi libisma.
2 A lobi di wi abi e boeweigi wi foe taki nanga ala sortoe sma na ini ala sortoe situwâsi (1 Kor. 9:21-23). Foe gi wan eksempre: Na ini wan opolani, wan kresten owroeman ben sidon sei wan lomsoe priester. Na owroeman ben proeberi foe meki a priester taki, foe di nanga takt a ben poti wan toe aksi gi en èn baka dati, a ben tjari a takimakandra go tapoe a Kownoekondre. Na a ten di a priester ben komoto na a opolangi, a ben teki toe foe den boekoe foe wi. Disi na troetroe wan boen bakapisi foe a fasi fa na owroeman ben sori taki a abi lobi gi a sma na en sei!
3 Troe lobi e boeweigi wi foe preiki: Den wan di e doe a jepi-pionierwroko èn a foeroeten pionierwroko seiker e sori foe troe taki den abi troe lobi gi Gado èn gi den sma na den sei. Pionier e gi a ten nanga a krakti foe den doronomo foe jepi trawan na jejefasi. San e boeweigi den foe doe disi? Wan pionier ben taki: „Mi sabi taki lobi na wan froktoe foe a jeje foe Gado. So boen, sondro lobi, mi no ben sa de na ini waarheid srefisrefi, èn so srefi mi no ben o abi boen bakapisi leki wan pionier. Lobi e meki taki mi e broko mi ede nanga sma èn san den abi fanowdoe, èn mi e warderi en taki sma e handri boen na tapoe a lobi di trawan e sori gi den.” Jesus ben sori so wan sortoe lobi gi sma. Wan leisi di en nanga den disipel foe en di ben weri ben go na wan presi foe „rostoe pikinso”, dan den ipi-ipi sma ben go na den fesi èn ben doro drape bifo den. San Jesus ben doe? „A ben kisi sari nanga den”, èn a ben poti den sani di a ben wani doe gi ensrefi na wan sei, so taki a ben kan „leri den foeroe sani”. — Mark. 6:30-34.
4 Srefi te sma e weigri foe teki a boen njoensoe di wi e tjari, tokoe wi e ondrofeni wan prisiri di e kon foe inisei, foe di wi sabi taki, ala di lobi e poesoe wi, wi doe ala san wi man foe jepi den foe kisi froeloesoe. Te foe kaba, te wi alamala kisi kroetoe foe Krestes, dan wi sa breiti srefisrefi taki wi ben sori troe lobi foe di wi ’doe wi diniwroko dorodoro’. — 2 Tim. 4:5.