Poti a howpoe foe têgo libi dipi na ini trawan
1 Ala di libisma soekoe fasi foe meki na owroe di wi e kon owroe no go so esi èn foe meki en libi kon moro langa, tokoe a grani di sma e kon grani nanga a dede di sma e dede na sani di wi no man wai pasi gi den. Wi de nanga tangi na ati srefisrefi taki bijbel e froeteri foe san ede libisma e kon owroe èn e dede, èn so srefi fa den takroe bakapisi foe a grani di sma e kon grani sa kon kenki, èn fa sma no sa dede moro. Den waarheid disi de foe feni na wan fasi di e overtoigi sma na ini a boekoe Sabi di e tjari joe go na têgo libi. A boekoe e gi piki na wan krin fasi tapoe moeilek aksi di abi foe doe nanga libi èn nanga dede, èn a e tjari a leisiman go na a ten pe a paradijs sa meki kon boen baka.
2 Na ini maart wi sa pristeri a Sabi-boekoe nanga a marki foe bigin oso-bijbelstudie (Mat. 28:19, 20). Baka dati wi sa tjari gobaka na ala sma di e sori belangstelling na ini a Kownoekondre boskopoe. Na a fasi disi wi kan poti a howpoe foe têgo libi dipi na ini sma (Tit. 1:2). Foe doe disi, dan kande joe feni den rai di e kon now, wan jepi.
3 Te joe e go na a sma foe a fosi leisi, joe ben sa kan poti na aksi disi:
◼ „Oiti joe aksi joesrefi foe san ede libisma e angri foe wan moro langa libi? [Gi okasi foe piki.] Boedasma, kresten, Hindoesma, Moslimsma, èn trawan, den alamala abi wan howpoe foe wan libi na baka dede”. Opo a Sabi-boekoe na kapitel 6, „Foe san ede wi e kon owroe èn dede?”, èn leisi paragraaf 3. Taki-go-taki-kon foe den tekst di kari drape. Ala di joe e sori go na den toe aksi di de na a kaba foe a paragraaf, aksi na ososma efoe a ben sa wani si den piki tapoe den aksi disi gi ensrefi. Efoe a wani dati, dan go doro foe taki foe den tra paragraaf. Na a fasi disi joe bigin wan studie! Noso, libi a boekoe gi en so taki a kan leisi en, èn meki plan foe go baka, efoe a kan na ini wán noso toe dei, foe taki foe den piki.
4 Te joe e go baka pe joe ben libi a „Sabi”-boekoe, joe ben kan taki:
◼ „Mi kon baka foe loekoe den toe aksi di abi foe doe nanga dede èn di wi no ben gi wan piki ete na den tapoe.” Memre na ososma san den aksi ben de. Dan, taki foe a bodoi di gi na ini kapitel 6 na ondro na ondro-edeprakseri: „Wan takroe plan.” Efoe a situwâsi e gi pasi foe dati, dan go doro nanga a studie, noso gebroiki a lasti aksi na a kabapisi foe paragraaf 7 foe poti wan fondamenti gi a tra leisi. Meki boen plan foe go baka. Gi na ososma wan strooibiljet, èn froeteri en sjatoe fa den gemeente konmakandra e hori. Gi en wan kari na wan waran fasi foe fisiti den konmakandra.
5 Ini na oso-foe-oso wroko noso te joe e doe okasi preiki, joe ben sa kan bigin wan takimakandra foe di joe e taki:
◼ „Oiti joe aksi joesrefi san a tamara e hori gi wi èn gi grontapoe? [Gi okasi foe piki.] Bijbel e taigi wi na ini wán wortoe san sa kon na ini a tamara — Paradijs! A e froeteri taki na ini a bigin, Gado ben meki wan pisi foe grontapoe tron wan moi paradijs pe a ben poti a fosi libisma paar di a ben meki. Den ben moesoe foeroe a heri grontapoe nanga libisma, èn safrisafri den ben moesoe kenki en kon tron wan paradijs. Loekoe san a taki djaso foe fa a ben de. Opo a Sabi-boekoe na bladzijde 8 èn leisi paragraaf 9 na ondro na ondro-edeprakseri „A libi na ini a Paradijs”. Dan, taki foe den penti na ini paragraaf 10 èn leisi a tekst foe Jesaja 55:10, 11, di kari drape. Aksi efoe joe kan go doro nanga a takimakandra foe fa a libi sa de na ini a Paradijs di meki kon boen baka èn efoe joe kan taki foe paragraaf 11-16 makandra. Noso, gi a sma deki-ati foe leisi en ensrefi, èn seti sani foe go baka foe taki foe en.
6 Efoe joe no ben opo wan studie a fosi leisi, dan joe kan proeberi foe doe dati te joe e go baka, foe di joe e taki:
◼ „Soleki fa wi ben taki na ini wi lasti takimakandra, dan a de a prakseri foe Gado taki a heri grontapoe kenki kon tron wan paradijs. Disi e meki na aksi kon: ’Fa a Paradijs sa de?’” Opo a Sabi-boekoe na kapitel 1, èn studeri paragraaf 11-16 na ondro na ondro-edeprakseri „A libi na ini a Paradijs di meki kon boen baka.” Baka dati, sori a sma a prenki tapoe bladzijde 4 nanga 5 èn aksi a sma efoe a ben sa wani libi na ini so wan moi presi. Dan leisi a fosi lin foe paragraaf 17 tapoe bladzijde 10. Efoe a situwâsi e gi pasi foe dati, dan go doro nanga a studie noso taigi a sma dati te joe e kon baka, joe sa tjari kon na krin san a e aksi foe wan sma foe kan libi na ini a Paradijs di meki kon njoen baka. Libi wan strooibiljet gi a sma, froeteri en san na a schema foe wi konmakandra, èn gi a sma wan kari na wan waran fasi foe fisiti a Kownoekondre zaal.
7 A Sabi-boekoe na wan toemoesi boen wrokosani foe gebroiki foe tjari kon na krin gi sma san na „a libi foe têgo” di Gado pramisi. A studeri di joe e studeri nanga sma kan poti a bigi howpoe disi dipi na ini den, di a Gado „di no man lei” meki sma skrifi nanga jepi foe en santa jeje.