Gi Kotoigi Leki wan Bun Birtisma
1 Yesus ben taki fu „lobi tra sma soleki fa yu lobi yusrefi” (Mat. 22:39). Sondro tweifri, yu e „du bun” gi ala sma di abi a srefi bribi leki yu. Ma yu kan lobi moro sma fu di yu e sori lobi gi den wan di e libi krosibei fu yu? (Gal. 6:10) Na sortu fasi yu kan du dati?
2 Fu di Yu E Fruteri den Suma Na Yu: Den birtisma fu yu sabi taki yu na wan Kotoigi? Efu den no sabi dati ete, dan fu san ede yu no e go luku den te yu e du a preikiwroko? Kande yu sa fruwondru fu si den bakapisi! Noso gi den kotoigi te wan okasi de, efu yu e feni dati moro makriki. Te yu de na dorosei dan kande yu e si den e wroko na a prasi fu den, noso kande den e koiri pasa na strati. Waka miti den nanga wan lafu fesi. Meki muiti fu taki fu den sani di yu e bribi. Fruteri den pe a Kownukondre zaal de èn san e pasa drape. Taigi den, suma na den tra sma fu a birti di e go drape tu. Gi den wan kari fu kon na den konmakandra. Teki a bosroiti fu gi ibriwan sma di yu sabi wan finifini kotoigi fu a bun nyunsu.—Tori. 10:42; 28:23.
3 Fu di Yu E Tyari Yusrefi na wan Bun Fasi: A fasi fa yu e tyari yusrefi leki wan birtisma e fruteri furu fu a fasi fa yu de èn a kan gi yu na okasi fu gi kotoigi. A „kan meki a leri fu Gado kon moi” tu (Tit. 2:7, 10). Sori taki yu wani sabi trutru fa a e go nanga den birtisma fu yu. Abi switifasi èn sori taki yu e hori den na prakseri. Sori taki yu e lespeki a reti fu den fu abi den eigi libi èn fu libi ini wan birti pe sma no e meki babari. Efu wan fu den kon siki, dan sori taki yu e broko yu ede nanga en èn aksi efu yu kan yepi en. Te wan nyun famiri e froisi kon libi na ini a birti, dan go na den fu gi den wan switikon. So wan switifasi abi wan bun krakti tapu sma èn dati e plisi Yehovah.—Hebr. 13:16.
4 Fu di Yu E Sorgu den Sani Di Yu Abi: Te yu de wan bun birtisma dan dati wani taki tu dati yu musu sorgu yu oso na wan bun fasi. Wan oso nanga wan dyari di krin èn moi, na wan kotoigi gi sma. Ma wan oso di doti, noso wan oso nanga wan lo bongrobongro lontu en, kande o hari a prakseri puru fu a Kownukondre boskopu. Fu dati ede, a prenspari trutru fu hori yu oso, yu prasi, yu oto, yu brom noso yu baisigri krin èn na ini wan bun kondisi.
5 Te yu e sori taki yu e broko yu ede nanga den wan di no de wan memre fu a Kresten gemeente, dan dati e sori taki yu lobi den birtisma fu yu. San kan de a bakapisi? A kan de so tu taki „leki wan bakapisi fu den bun wroko fu unu, di den ben si nanga den eigi ai”, son wan fu den o ‘gi Gado glori’.—1 Petr. 2:12.