Abi Prisiriten Nanga a Yoisti Marki
1 Ten na ten, wi alamala abi pikin rostu fanowdu na ini a muilek ten disi. Na wan bun sani fu abi pikin prisiriten. Ma te wan sma e gebroiki tumusi furu ten gi prisiri nanga demakandra nanga trawan, dan dati kan broko a faya di a abi. A kan meki wan sma no gebroiki furu ten moro fu meki muiti fu du yeye afersi. Wi musu abi prisiriten nanga a yoisti marki (Mat. 5:3). Fa wi kan du dati? Fu di wi o du san skrifi na Efeisesma 5:15-17.
2 Luku Na Fesi O Furu Prisiriten Yu Sa Abi: Paulus ben skrifi den Kresten taki den ben musu „luku bun” dati den e gebroiki a libi fu den na wan koni fasi. Wi musu basi wi firi èn dwengi wisrefi efu wi wani gebroiki prisiriten fu kisi rostu trutru. A de wan koni sani fu denki seryusu fu a fasi fa wi e gebroiki a fri ten fu wi. Prisiriten musu abi winimarki gi wi. A no musu gi wi a firi taki wi lasi wi ten fu soso, noso taki wi weri pasa marki. A kan taki wi no e firi prisiri, noso no de tevrede baka te wi abi wan prisiriten, èn kande wi konsensi e naki wi pikinso. Efu dati de so, dan dati e sori taki wi musu kenki a fasi fa wi e gebroiki ten.
3 De Reidelek: Paulus ben gi a rai fu „bai a yoisti ten” gi den moro prenspari sani fu a libi èn fu no de „onreidelek.” Kresten di gi densrefi abra na Gado no kan meki prisiriten de a moro prenspari sani na ini den libi. Te wi e rostu noso abi prisiri dan dati kan gi wi nyun krakti baka. Toku a de a wroko krakti fu Gado di e gi wi yeye krakti (Yes. 40:29-31). Wi e kisi en yeye te wi e du theokrasia sani soleki te wi e studeri Bijbel, e fisiti gemeente konmakandra èn e teki prati na a preikiwroko. Wi no e kisi a yeye fu Gado nanga yepi fu prisiriten.
4 Poti Prenspari Sani na a Fosi Presi: Paulus ben leri Kresten fu „tan si krin san na a wani fu Yehovah”. Yesus ben leri wi taki a Kownukondre fu Gado musu de a moro prenspari sani fu ala den tra sani di wi e du na ini a libi (Mat. 6:33). A de tumusi prenspari taki wi du den sani fosi di sa meki taki wi kan libi soleki fa wan sma musu libi di gi ensrefi abra na Yehovah. Baka ten wi kan abi prisiriten nanga a yoisti marki. Te wi du dati, dan a sa du wi bun èn wi sa nyan bun moro fu dati tu.—Preik. 5:12.