Gebroiki yu ten na wan koni fasi
1 Wi wani plisi Yehovah, èn dati meki wi e seti wi libi na so wan fasi taki yeye afersi e kon na a fosi presi. A Wortu fu en e gi wi a deki-ati fu ’tan suku a kownukondre fosi’ èn fu „sabi san na den moro prenspari sani” (Mat. 6:33; Fil. 1:10). Fa wi kan poti ten na wan sei gi Kownukondre afersi? Fa wi kan sorgu taki sani di no de so prenspari no de na a fosi presi na ini wi libi?—Ef. 5:15-17.
2 Poti Kownukondre afersi na a fosi presi: Luku na fesi fa yu o gebroiki yu ten, so taki yu no e lasi yu ten nanga afersi di no de so prenspari. Ibri mun, son sma e bigin skrifi na tapu den kalender sortu dei den o du a preikiwroko. Baka dati, den e luku bun taki tra afersi no e kon na ini a presi fu a spesrutu ten di den ben poti fu du a preikiwroko. Wi kan poti spesrutu ten na wan sei tu fu go na den konmakandra, fu studeri, èn fu go na a kongres. Furu sma poti spesrutu ten na wan sei ibri dei fu leisi Bijbel, kande fosi a dei fu den bigin noso na a kaba fu a dei. Poti spesrutu ten na wan sei gi ibri afersi di de prenspari, èn efu a no de fanowdu, dan no meki tra sani kon na ini a presi fu dati.—Preik. 3:1; 1 Kor. 14:40.
3 No gebroiki den sani fu grontapu dorodoro: Na ini son kondre a makriki gi sma fu du sport, fu go na presi fu abi prisiri, noso fu du sani di den lobi fu du na ini den fri ten. Furu sma e gi bun furu fu den ten fu luku telefisi, noso fu du sani na tapu computer. Ma a no de fu taki dati wi no sa abi bun bakapisi te wi e poti ala wi prakseri na sani di wi lobi fu du èn na ala sortu nyunyun sani di sma kan bai na ini a ten disi (1 Yoh. 2:15-17). Fu dati ede meki Bijbel e gi wi a deki-ati fu no gebroiki den sani fu grontapu dorodoro (1 Kor. 7:31). Te yu e gi yesi na a koni rai dati, dan yu kan sori Yehovah taki na anbegi fu en de na a fosi presi na ini yu libi.—Mat. 6:19-21.
4 A disiten seti fu sani e kon na wan kaba. Den wan di e poti Kownukondre afersi na a fosi presi sa de koloku èn Gado sa feni den bun (Odo 8:32-35; Yak. 1:25). Fu dati ede, meki wi gebroiki wi ten na wan koni fasi fu di a de wan warti sani trutru.