Fa foe bai a joisti ten
1 Te wi abi foeroe foe doe na ini a diniwroko foe Jehovah, dan dati e hori wi bezig! (1 Kor. 15:58) Wi e erken taki a de fanowdoe foe studeri persoonlijk èn leki wan osofamiri, foe leisi bijbel ibri dei, foe sreka gi èn foe fisiti den gemeente konmakandra, èn foe teki prati na velddienst doronomo. Den opziener abi a frantiwortoe foe doe herder wroko, èn den e sorgoe gi den tra wroko foe a gemeente. Son sma abi hebi frantiwortoe ini na osofamiri noso difrenti sortoe froeplekti gi tra sma. Foe kan doe ala sani heri boen, a de fanowdoe taki ibri sma abi balansi èn wan boen fasi fa den e orga den persoonlijk sani.
2 Bosroiti sortoe sani de moro prenspari: Foe man abi boen bakapisi ini ’a bai di wi e bai a joisti ten gi wisrefi’, e anga foe a koni di wi abi foe man si sani krin èn foe a teki di wi man teki boen bosroiti (Ef. 5:15, 16). Wi moesoe kon sabi san na „den moro prenspari sani” èn wi moesoe poti den na tapoe a fosi presi foe a lijst foe sani di de moro prenspari (Fil. 1:10). Wan trowpaar ben taki foe a theokrasia osofamiri foe den na a fasi disi: „Wi e foeroe wi libi nanga waarheid . . . Waarheid no de wan pisi foe wi libi, a de wi libi. Ala tra sani e drai lontoe en.” A de prenspari foe poti na anbegi èn a diniwroko foe Jehovah na tapoe a fosi presi na ini wi libi.
3 Sabi san na den sani di e meki wi lasi ten: Wán wiki abi 168 joeroe, èn wi moesoe gebroiki a ten di wi abi na wan koni fasi. Foe man abi nofo ten gi theokrasia aktiviteit, wi moesoe kon sabi san na den sani di e meki wi lasi ten èn wi moesoe meki den kon moro mendri. Wan ondrosoekoe ben tjari kon na krin taki a gemiddeld bigisma na den Verenigde Staten e gebroiki moro leki 30 joeroe na ini wán wiki e loekoe TV! Tra sma e gebroiki foeroe ten foe leisi grontapoe boekoe. Wan toe sma e si kande taki den e gi toemoesi foeroe ten na sociaal aktiviteit, hobby, ontspanning, noso wan sani di abi foe doe nanga computer. Kande wi moesoe ondrosoekoe den sani di wi e doe ala dei foe si fa wi ben sa kan gebroiki wi ten moro boen. Koni e aksi foe wi taki wi moesoe bosroiti o foeroe ten wi sa gebroiki gi aktiviteit di no prenspari.
4 Kweki wan boen gwenti foe doe sani: Awansi san na wi persoonlijk omstandigheid, ibriwan foe wi kan bai ten foe feti na baka jeje sani. Wan toe sma feni taki te den e opo pikinso moro froekoe ibri dei, dan dati e jepi den foe doe moro. Efoe wi e gebroiki foeroe ten na pasi foe go na wroko noso foe wakti tapoe tra sma, dan wi ben sa kan gebroiki pikinso foe a ten dati foe leisi bijbel, foe sreka gi den konmakandra, noso foe arki sani di a Genootschap ben poti tapoe cassette. Den osofamiri abi foeroe winimarki te doronomo den e poti wan spesroetoe ten na wan sei foe studeri nanga makandra. Efoe ibri memre foe na osofamiri e hori ensrefi na a ten te a e kon na a osofamiri studie, dan dati e gi ala sma pikinso moro ten.
5 Nanga ibri dei di e pasa, wi moesoe froestan moro krin taki „a ten di tan abra kon sjatoe” (1 Kor. 7:29). A libi foe wi e anga foe a fasi fa wi e gebroiki a warti ten di tan abra. Wi sa kisi blesi efoe wi e bai a joisti ten so taki wi kan hori Kownoekondre afersi na tapoe a fosi presi! — Mat. 6:33.