Luku bun fa yu e gebroiki yu ten
1. Sortu tyalensi ala sma abi ini a ten disi?
1 Na ini a ten disi sma abi wrokosani di e yepi den fu du sani moro esi sondro fu wroko tranga. Fu dati ede sma kan du moro sani na ini wan moro syatu pisi ten. Yu feni en wan tyalensi fu hori yusrefi na a bun gwenti di abi fu du nanga yeye afersi? Yu e winsi taki yu ben abi moro ten gi a preikiwroko? San na a moro bun fasi fu gebroiki a ten di wi abi?—Ps. 90:12; Fil. 1:9-11.
2, 3. Sortu nyun tyalensi sani soleki telefisi, computer, nanga telefon tyari gi wi, èn fa wi kan ondrosuku wisrefi?
2 Kon sabi sortu sani e meki yu lasi ten: Ten na ten, wi alamala musu ondrosuku fa wi e gebroiki a ten fu wi. Bijbel e gi wi a deki-ati: „Luku bun fa unu e waka, no leki sma di no koni, ma leki koni sma, fu di unu e bai a yoisti ten gi unsrefi, bika den dei ogri” (Ef. 5:15, 16). Prakseri den nyun tyalensi di kon fu sani di abi fu du nanga telefisi, computer nanga telefon. Aladi wi kan meki bun gebroiki fu den sortu sani disi, toku wi kan fadon na ini wan trapu efu wi no e luku bun fa wi e gebroiki a ten fu wi.—1 Kor. 7:29, 31.
3 Iniwan fu wi musu aksi ensrefi: ’Mi de tapu na Internet ala dei fu leisi, noso fu seni boskopu di no de so prenspari? Mi e bel sma furufuru fu taki fu lawlaw tori, noso mi e seni lawlaw boskopu gi sma nanga yepi fu cellulair? (1 Tim. 5:13) Mi e suku sani tapu na Internet sondro wan spesrutu marki, noso mi e kenki kanaal sondro reide te mi e luku telefisi? Mi e lasi tumusi furu ten nanga preisani na tapu computer, so taki mi no e studeri Gado Wortu doronomo?’ Den sani disi kan pori wi na yeye fasi sondro fu wi sabi.—Odo 12:11.
4. Sortu kenki wan yonguwan ben tyari kon, èn fu san ede?
4 Gebroiki yu ten bun: Sani soleki telefisi, computer, nanga telefon e hari wi prakseri furu tron, èn den sani disi kan meki wi lasi furu ten. Wan yonguwan di ben lobi e prei tapu computer furufuru ben taki: „Son leisi te mi ben e prei tapu a computer fosi mi ben go na ini a preikiwroko, noso fosi mi ben go na den konmakandra, dan mi no ben de nanga ala mi prakseri. Pikinmoro, ala ten mi ben e prakseri fa mi ben kan prei moro bun te mi ben doro na oso baka. Mi no ben e leisi èn studeri Bijbel so furu moro. Safrisafri mi no ben abi prisiri moro fu dini Gado.” Di a si taki a ben musu tyari wan kenki kon, dan a puru ala den preisani disi di a ben abi tapu computer. A ben taki: „Dati ben hebi srefisrefi. Mi no ben sabi taki na so mi ben lobi den preisani tapu computer. Ma toku mi ben firi leki mi ben wini wan bigi strei, fu di mi ben sabi taki a de gi a bun fu mi.”—Mat. 5:29, 30.
5. Fa wi kan meki ten gi yeye afersi, èn fa wi kan nyan bun fu dati?
5 Kande yu musu tyari kenki kon na wan tu gwenti di yu abi. Yu kan teki wan afu yuru fu sani di no de so prenspari? Te yu luku en bun, dan dati na nofo ten fu leisi a heri Bijbel na ini wan yari. Trutru dati sa gi yu prisiri na yeye fasi! (Ps. 19:7-11; 119:97-100) Poti spesrutu ten na wan sei fu leisi Bijbel, fu sreka gi den konmakandra, èn fu go na ini a preikiwroko (1 Kor. 15:58). Te yu du disi, dan dati sa yepi yu fu no lasi ten nanga sani di no de prenspari, èn a sa yepi yu fu „tan si krin san na a wani fu Yehovah”.—Ef. 5:17.