Blesi te Wi E Sori Warderi gi a Lobi fu Yehovah—Pisi 1
1 Na apostel Yohanes ben skrifi: „Ma wi lobi sma, bika [Yehovah] ben lobi wi fosi” (1 Yoh. 4:19). Te wi e denki fu ala den sani di Yehovah du gi wi, dan dati e gi wi deki-ati fu sori taki wi e warderi En srefisrefi. Yesus ben gi na eksempre fa fu du dati di a ben du san Gado ben aksi fu en; a ben meki Gado nen bekènti èn a ben taki fu a Kownukondre fu En (Yoh. 14:31). A ben o bun efu wi e ondrosuku wan tu fasi fa wi kan sori moro warderi gi a lobi fu Yehovah èn gi den blesi di wi e kisi te wi e du dati.
2 Te Wi E Preiki Oso fu Oso: Yesus ben leri den disipel fu en fa fu du a Kownukondre preikiwroko. Den tirilin di a ben gi e sori krinkrin taki den ben e go oso fu oso fu prati a bun nyunsu (Luk. 9:1-6; 10:1-7). Te wi e miti sma di no wani arki a boskopu èn sma di e gens wi, dan a wan-enkri sani di kan yepi wi fu tan go na den sma, na a lobi gi Gado èn gi tra sma. Ma te wi e go oso fu oso, wisrefi e kisi wini tu bika a bribi fu wi, na overtoigi fu wi èn so srefi a howpu fu wi, e kon moro tranga.
3 Fu di wi du a wroko disi na ondro a tiri fu den engel, meki wi feni furu sma di e angri fu yere waarheid (Openb. 14:6). Sma de di e fruteri taki den ben e begi di wan Kotoigi ben kon na den oso. Tu Kotoigi nanga wan pikin boi ben e go oso fu oso na wan Kribisi èilanti. Di den tu sisa disi ben wani go na oso, dan a pikin boi wawan go moro fara na a tra oso. Wan yongu uma ben opo a doro. Di den sisa si dati, dan den waka go drape èn den taki nanga na uma. A kari den kon na inisei èn a fruteri den, taki didyonsro a kaba begi Gado fu seni den Kotoigi kon fu leri en sani fu Bijbel.
4 Te Wi E Du Stratiwroko: Fu di a muilek srefisrefi ini son kontren fu miti sma na oso, meki stratiwroko na wan kefalek bun fasi fu preiki gi sma. A warderi di wi abi gi a lobi fu Yehovah, e meki taki wi e gebroiki iniwan fasi, so srefi stratiwroko, fu meki sma kon sabi a Kownukondre boskopu.—Odo 1:20, 21.
5 Te Wi E Tyari Gobaka: Fu di wi e suku den wan di „sabi den yeye nowtu”, dan wi wani du san wi man fu yepi den (Mat. 5:3). Disi wani taki dati wi musu go baka fu gi watra na den siri fu waarheid di wi ben sai (1 Kor. 3:6-8). Wan sisa na ini Australia ben gi wan uma wan traktaat. Ma a ben gersi leki na uma disi no ben wani arki. Ma a sisa ben tan meki muiti fu miti en na oso baka. A ben miti en te fu kaba. Ne a sisa fu wi kon si taki, baka di a ben gi na uma a traktaat, dan na uma bai wan diri Bijbel. Wantewante a sisa ben seti sani fu studeri nanga en wantewante!
6 Te Wi E Hori Oso-bijbelstudie Nanga Sma: Disi kan de wan fu den moro prisiri sani fu wi diniwroko, di e meki wi firi bun. A de trutru wan blesi fu yepi sma fu leri sabi Yehovah, fu si fa den e drai den libi fu kan plisi en, èn fa den e gi densrefi abra na en èn te fu kaba fa den e teki dopu baka dati!—1 Tes. 2:20; 3 Yoh. 4.
7 Na ini a tra Wi Kownukondre Diniwroko fu wi, wi o taki fu moro fasi fa wi e kisi blesi te wi e sori taki wi e warderi a lobi fu Yehovah.