Wi e kisi blesi te wi e sori warderi gi a lobi fu Yehovah—Pisi 2
1 Di wi ben taki fu a fosi pisi fu a tori disi a mun di pasa, dan wi ben poti krakti tapu fo fasi fa wi kan sori warderi gi a lobi fu Yehovah te wi e du a diniwroko (1 Yoh. 4:9-11). Ini na artikel disi wi abi ete feifi fasi fa wi kan sori dati. Wi e kisi blesi te wi e du ala san wi man fu yepi trawan na yeye fasi.
2 Preiki te wi feni wan okasi: Disi na wan bun fasi fa wi kan feni sma di e angri fu regtfardikifasi. Te wi e feni den sma dati, dan wi kan gi den wan buku di kan yepi den. A bun taki wi „e bai a yoisti ten” fu preiki na ibri okasi èn fu preiki gi ala sma di wi e miti (Ef. 5:16). Wi musu abi deki-ati kande fu preiki na so wan fasi, ma efu wi e warderi a lobi di Gado e sori èn efu wi e frustan san sma abi fanowdu, dan dati o yepi wi fu preiki na ibri okasi.—2 Tim. 1:7, 8.
3 Wan zendeling ben kisi bun furu blesi fu di a ben bigin taki nanga wan tra sma di ben sidon nanga en ini wan taxi. A man ben wani sabi moro. A brada ben tyari wan gobaka, èn a ben bigin studeri nanga a man. A man ben teki waarheid èn a ben go na fesi, so taki a tron wan owruman ini a gemeente te fu kaba.
4 Te wi e skrifi brifi: Kande wi no man go oso fu oso fu di wi e siki noso fu di a son faya tumusi noso fu di alen e fadon tumusi. Wi kan skrifi brifi èn preiki na so wan fasi gi sma di wi sabi noso gi sma di lasi wan lobiwan na ini dede, noso gi den wan di no ben de na oso di wi ben du a preikiwroko. Wi kan poti wan moi Bijbel traktaat na ini a brifi di o gi a sma deki-ati fu piki yu efu a wani sabi moro. Poti a nen fu yu eigi strati nanga a nomru fu yu eigi oso, noso poti di fu a Kownukondre zaal so taki a sma kan piki yu. Grantangi, no poti na adres fu a bijkantoro.
5 Preiki nanga telefon: Disi na wan bun fasi fu miti sma di wi no man miti te wi e wroko oso fu oso. Wi kan abi moi takimakandra efu wi abi koni nanga switifasi te wi e preiki na a fasi disi. Wi Kownukondre Diniwroko fu februari 2001, bladzijde 5, 6, e gi moi eksempre fu a fasi fa yu kan abi moro bun bakapisi.
6 Di wan sisa ben preiki nanga telefon, a ben aksi wan uma efu a ben prakseri fa en nanga en osofamiri kan feni wan bun libi na ini a ten di e kon. Na uma ben taki dati a ben du dati. A ben taki dati a ben lasi-ati srefisrefi. Dati meki a no ben wani go na tra presi, ma ben tan na oso nomo. Fu di a sisa ben broko en ede trutru nanga na uma, meki na uma ben feni en bun fu miti en na wan wowoyo krosibei fu en oso. We, te fu kaba, na uma ben wani studeri Bijbel!
7 Gi nyun sma wan switi kon: Efu wi lobi tra sma, dan wi o si wantewante efu wan nyun sma kon na a konmakandra presi èn wi o gi a sma dati wan switikon (Rom. 15:7). Meki a firi taki a de na mindri sma di wani taki sani musu waka bun nanga en na yeye fasi. Te a sma e si taki wi e broko wi ede nanga en na wan lobi-ati fasi, dan dati kan gi en deki-ati fu teki a yepi fu wi te wi e aksi en efu a wani wan bijbelstudie.
8 Te wi e tyari wisrefi bun: Wi e meki a leri fu wi kon moi, te wi e tyari wisrefi bun (Tit. 2:10). Te sma di no de Yehovah Kotoigi e taki bun sani fu wi, dan dati e gi Gado grani (1 Petr. 2:12). Disi kan yepi trawan tu fu bigin waka a pasi fu libi.
9 Wi ben taki fu feifi fasi fa wi kan sori taki wi e warderi a bigi lobi di Yehovah abi gi wi. A o de wan bun sani fu luku den ete wan leisi èn fu pruberi fu du ala den feifi sani disi (1 Yoh. 4:16). Te yu o du dati dan yu o kisi furu blesi.