Fu san ede wi musu tan preiki?
1 A de so taki sma du a Kownukondre preikiwroko bun langa kaba na ini a kontren pe yu e libi? (Mat. 24:14) Efu dati de so, dan kande yu e denki taki a gemeente fu yu wroko nofo kaba na ini a kontren pe unu e preiki. Kande yu e si taki son sma no e poti prakseri kwetikweti na a Kownukondre boskopu, te yu e preiki gi den. Ma toku a bun fu hori na prakseri san a buku Jesaja’s profetie II (A Profeititori fu Yesaya II) e taki fu den tru disipel fu Yesus na tapu bladzijde 141: „Na son presi a kan gersi taki a wroko fu den no abi bun bakapisi te yu e luku a tranga wroko nanga muiti di den e du. Toku den e horidoro.” Ma fu san ede wi musu tan preiki?
2 Prakseri Yeremia: Wi no musu horidoro na ini a preikiwroko soso te sma e arki wi. Yeremia ben preiki 40 yari langa na ini a srefi kontren, aladi wan tu sma nomo ben e arki en èn furu sma no ben wani yere noti fu a boskopu fu en. San ben yepi Yeremia fu tan go doro sondro fu gi abra? Fu di a ben e du wan wroko di Gado ben komanderi en fu du. A ben sabi sosrefi san ben o pasa na ini a ten di ben de na den fesi. Dati meki taki a ben tan warskow den sma.—Yer. 1:17; 20:9.
3 Na so a de nanga wi tu. Yesus „gi wi a komando tu fu preiki gi a pipel èn fu gi kotoigi dorodoro, taki disi na a Sma di Gado poti leki krutuman fu den libiwan nanga den dedewan” (Tori. 10:42). A boskopu di wi e tyari gi sma na wan boskopu di abi fu du nanga libi noso dede gi den wan di e arki. Libisma sa kisi krutu akruderi san den du te den yere a bun nyunsu. Fu di dati de so, meki wi abi a frantwortu fu du soifri san wi leri taki wi musu du. Srefi te sma no wani arki wi kwetikweti, toku wi e tan du san wi musu du, bika dati e gi wi na okasi fu sori a lobi di wi abi gi den sma dati. A e gi wi na okasi sosrefi fu sori taki wi e anbegi Yehovah fayafaya. Ma moro de ete.
4 Wi e kisi winimarki: Efu wi e tan du a wani fu Gado awinsi fa sma e piki te wi e preiki gi den, dan dati sa meki taki wi no sa abi furu broko-ede èn a o gi wi prisiri nanga koloku di wi no kan kisi na nowan tra fasi (Ps. 40:8). A libi fu wi e kon tron wan trutru warti sani èn wi e kisi wan marki na ini wi libi. O moro wi e teki prati na a preikiwroko, o moro wi e tan poti prakseri na a howpu nanga a prisiri di wi abi fu libi na ini a nyun grontapu fu Gado. Te wi tan hori den pramisi fu Bijbel disi na prakseri, dan dati sa gi wi krakti na yeye fasi èn a sa meki a matifasi fu wi nanga Yehovah kon moro tranga.
5 Kande wi no e si wantewante san na a bakapisi fu a preikiwroko fu wi. Toku a kan taki wi ben prani a siri fu waarheid na ini na ati fu wan sma èn a kan gro bakaten te a ten fu Yehovah doro gi dati (Yoh. 6:44; 1 Kor. 3:6). A pipel fu Yehovah e du muiti fu yepi sma fu kon sabi a Kownukondre boskopu. Nowan fu wi sabi omeni sma moro na ini a kondre fu wi noso na tra presi na grontapu sa kisi fu yere a boskopu na a fasi disi.
6 Moro leki oiti bifo wi musu arki san Yesus ben taigi wi: „Tan luku, tan na ai, bika unu no sabi o ten a fasti ten de. Ma san mi e taigi unu, mi e taigi ala sma: Tan hori wakti” (Mark. 13:33, 37). Sobun, meki a de so taki wi alamala tan preiki a bun nyunsu fu a Kownukondre. Na so fasi wi sa meki Yehovah ati prisiri te wi e wroko fu hei en bigi èn santa nen.