A bribi fu wi e meki wi du bun wroko
1 Bribi ben meki Noa, Moses nanga Rakab du sani. Noa bow na ark. Moses, di ben kan kisi winimarki fu di a ben e libi na ini a kownu-oso fu Farao, ben gowe libi den sani dati di ben de fu wan syatu pisi ten nomo. Rakab ben kibri den spion di ben kon luku a kondre fu en èn fu di bakaten a ben gi yesi na san den ben komanderi en, meki na osofamiri fu en tan na libi (Hebr. 11:7, 24-26, 31). Sortu bun wroko a bribi fu wi e meki wi du na ini a ten disi?
2 Preiki: A bribi fu wi e meki wi fruteri sma fu wi tumusi bun Gado èn fu den sani di a e seti fu gi wi têgo koloku (2 Kor. 4:13). Kande sontron wi e draidrai fu preiki fu di wi e frede. Ma efu wi ’poti Yehovah na un fesi doronomo’, dan wi sa kisi krakti èn wi no sa frede so furu moro (Ps. 16:8). Dan a bribi fu wi sa pusu wi fu prati a bun nyunsu na ibri okasi di fiti nanga famiriman, birtisma, sma na wrokope, skoromati èn tra sma.—Rom. 1:14-16.
3 Kon makandra: A bribi fu wi e meki wi du ete wan tra bun wroko. A e meki wi go na den konmakandra doronomo. Fu san ede wi kan taki dati bribi e meki wi du disi? Efu wi e go na den Kresten konmakandra doronomo, dan dati e sori taki wi abi na overtoigi dati Yesus de nanga wi nanga yepi fu Gado santa yeye te wi de drape (Mat. 18:20). Sma e si krin nanga dati taki wi wani ’yere srefisrefi san a yeye e taigi den gemeente’ (Openb. 3:6). Wi e poti seryusu prakseri na den leri di wi kisi, fu di a bribi fu wi e yepi wi frustan taki a sma di e gi wi leri na wi Gran Leriman, Yehovah.—Yes. 30:20.
4 Den bosroiti di wi e teki: Wi e poti yeye afersi na a moro prenspari presi na ini wi libi, fu di wi abi a tranga overtoigi taki den sani di wi e bribi ma di wi no man si, de tru (Hebr. 11:1). Furu tron disi wani taki fu teki bosroiti di meki wi lasi sani na materia sei. Fu gi wan eksempre, wan owruman ben weigri fu teki moro frantwortu na en wrokope pe a ben kan kisi moro moni, fu di a frantwortu disi ben o meki a misi wan tu konmakandra. Boiti dati, a ben sa musu gowe libi en osofamiri wan langa pisi ten èn a ben sa musu tapu nanga a pionierwroko fu en. Meki wi abi a srefi fasti frutrow ini a dyaranti di Bijbel gi taki Yehovah sa sorgu den wan di „tan suku fosi a kownukondre nanga en regtfardikifasi”.—Mat. 6:33.
5 Tra sma o si o bigi a krakti de di bribi abi tapu wi libi. Iya, sma na heri grontapu sabi o tranga a bribi fu wi de (Rom. 1:8). Fu dati ede, meki wi sori nanga den bun wroko fu wi taki a bribi fu wi e meki wi du sani.—Yak. 2:26.