Wi musu de na ini wánfasi
1 Omeni leisi yu fruwondru fu a kefalek moi fasi fa a libisma skin fu wi meki? (Ps. 139:14) Ibri pisi fu a skin e wroko makandra nanga den tra pisi. Gado Wortu e agersi a Kresten gemeente nanga wan skin di e wroko makandra heri bun nanga ala den memre fu en. Krestes na a Edeman fu a gemeente èn ala den memre fu a gemeente ’de na ini wánfasi èn a skin meki na so wan fasi taki a e wroko makandra nanga yepi fu ibri skrufu fu a skin di e gi san de fanowdu’ (Ef. 4:16b). Na so fasi, Yehovah man gebroiki a pipel fu en di abi wánfasi fu du tumusi moi sani.
2 Den memre fu a fosi yarihondro gemeente ben du sani „na ini wánfasi” fu sorgu gi den yeye sani nanga materia sani di den ben abi fanowdu (Tori. 2:44-47). Fu di Yehovah ben horibaka gi den, meki den ben tan na ini wánfasi di hebi frufolgu miti den (Tori. 4:24-31). Den ben fruteri a Kownukondre boskopu awansi pe den ben e go èn den ben taki fu a bun nyunsu ini a heri kontren fu grontapu di sma ben sabi na a ten dati (Kol. 1:23). Ini a ten disi, den memre fu a Kresten gemeente du den srefi sani dati na ini wánfasi nanga makandra, srefi moro bigi sani. Sortu sani e meki taki a wánfasi disi man de na den mindri?
3 A leri di wi kisi fu Gado e hari wi kon na makandra: Na anbegi fu wi meki wi de na ini wánfasi nanga makandra na heri grontapu. Fa dati kan? Wi e erken a seti di Yehovah e gebroiki fu gi yeye „nyanyan na a reti ten” (Mat. 24:45). Wi warderi den „presenti ini libisma” tu di Yehovah gi leki leriman ini a gemeente. Efu nanga sakafasi wi e teki den sani di Yehovah seti fu gi wi yeye nyanyan, dan wi sa kon frustan Gado Wortu moro bun èn dati sa wiki a srefi winsi ini wi alamala fu teki na eksempre fu Yesus leki disipel fu en. Wi musu tan studeri Gado Wortu èn musu meki furu muiti fu „kon de wán na ini a bribi” (Ef. 4:8, 11-13). Yu e du muiti fu hori a wánfasi fu wi na yeye fasi fu di yu e leisi Bijbel ala dei?
4 Wi de na ini wánfasi fu di wi abi demakandra leki Kresten: Lobi e meki wi abi wan moro bun demakandra nanga trawan na den Kresten konmakandra. Na den konmakandra disi wi e „poti ai na makandra” (Hebr. 10:24, 25). Disi wani taki dati wi no e luku a sma fesi nomo fu sabi fa a e go nanga en, ma taki wi musu kon leri sabi wi brada trutru èn wi musu si den leki warti sma, neleki fa Yehovah e si den (Hag. 2:7). Te wi e arki fa den e taki fu a bribi fu den, dan a lobi fu wi gi den e gro èn a wánfasi di de na wi mindri e kon moro tranga. Den sabi yu leki wan sma di e go na den gemeente konmakandra doronomo?
5 Wi e wroko makandra ini a preikiwroko: Te wi preiki a bun nyunsu makandra nanga tra bribiman, dan dati e tyari wánfasi na wi mindri fu di wi alamala e du Gado wani. Na apostel Paulus ben e warderi den ’sma di ben e wroko makandra nanga en gi a kownukondre fu Gado’ (Kol. 4:11). Te wi e fruteri trawan den ondrofenitori fu wi èn e yepi makandra ini a diniwroko dan wi man du a wroko di wi kisi leki Kresten èn dati e tranga a wánfasi di wi abi.—Kol. 3:14.
6 A santa yeye e yepi fu meki wánfasi de: Te wi e du a wani fu Yehovah fayafaya, dan a e gi wi a santa yeye fu en. A santa yeye disi e yepi wi fu lusu den kesekese di e kon te wi no e agri nanga makandra èn a e yepi wi fu libi nanga makandra na ini wánfasi (Ps. 133:1). A santa yeye sa meki wi „fu du seryusu muiti fu tan hori a wánfasi fu yeye na ini a banti fu vrede di e tyari wánfasi kon” (Ef. 4:3). Ibriwan fu wi kan yepi meki a wánfasi tan di de mindri Gado pipel, fu di wi e sori den froktu fu Gado en yeye ini a fasi fa wi e handri nanga tra sma.—Gal. 5:22, 23.
7 Fu di wi e wroko makandra na ini wánfasi ondro a tiri fu Yesus, na edeman fu wi, dan dati e meki taki „a skin gro so taki a e bow ensrefi na ini lobi” (Ef. 4:16a). Boiti dati, a sani disi e gi glori na Yehovah, „a Gado di e gi vrede”.—Rom. 16:20.