Kisi winimarki dorodoro fu a „Fayafaya Kownukondre preikiman” Distrikt Kongres
1 Wan programa di e gi wi deki-ati: Wi kisi moi deki-ati fu a programa na a distrikt kongres fu wi di hori no so langa pasa! Wi ben kon makandra fu kisi rai fu preiki a Kownukondre fu Gado nanga moro faya. Yu e memre ete fa a fosi takiman ben fruklari den wortu „meki bekènti”? Yu man memre sortu deki-ati fu stuka sani wi ben kisi na ini a lezing „No frede bika wi sabi taki Yehovah de nanga wi”? Sortu ondrofeni yusrefi ondrosuku te nanga now?
2 A symposium, „Difrenti tesi di e miti wi e sori o tranga a bribi fu wi de”, ben gi dri prenspari reide fu san ede Yehovah e gi pasi taki sma frufolgu wi. Yu man fruklari den dri reide disi? San na a Bijbel gronprakseri di e sori fu san ede wi leki Kresten no musu teki partèi na ini politiek afersi? Sortu deki-ati wi ben kisi so taki wi man sreka wisrefi gi problema di wi o kisi fu di wi no e teki partèi na ini politiek afersi? Fa a getrow fasi fa wi e horidoro te tesi miti wi, e bigi a nen fu Yehovah?
3 Sortu pisi ini a drama „Tanapu kánkan na ini muilek ten” ben gi yu krakti trutru? Fa wi kan de leki Yeremia?
4 Sortu prenspari kenki di de na wi fesi sa tyari wi go na a bigi frede dei fu Gado soleki fa dati ben kon na fesi na ini a publikitaki „A grontapu disi e tan kenki”? Di yu ben arki a kriboi lezing „Du furu bun wroko leki fayafaya Kownukondre preikiman”, dan fa yu fiti den sani di yu leri na ini yu eigi diniwroko?
5 Tumusi prenspari penti di wi musu fiti na ini wi libi: Fa wi kan sori Yehovah taki wi de nanga tangi na ati soleki fa dati ben kon na fesi na ini a lezing „Sori taki unu de nanga tangi na ati”? Leki suma wi musu de efu wi wani de fayafaya soleki fa dati ben tyari kon na fesi na ini a thema-lezing „Kownukondre preikiman e kisi deki-ati fu wroko fayafaya”? Sortu ondrosuku wi musu du fu wisrefi?
6 Soleki fa a ben tyari kon na fesi na ini a symposium „A profeititori fu Mika e gi wi krakti fu waka na ini a nen fu Yehovah”, dan sortu dri markitiki wi musu doro efu wi wani taki Yehovah feni wi bun? Wi man doro den markitiki disi? (Mika 6:8) Na sortu fasi wi musu tyari wisrefi krin soleki dati ben kon na fesi na ini a lezing „Tan tyari yusrefi na wan krin fasi fu kibri yu ati”? Nanga san wi kan bedrigi wisrefi noso trawan soleki fa wi ben kisi warskow gi dati na ini a lezing „Luku bun nanga bedrigifasi”?
7 Sortu sani yu ben bigin du na ini yu diniwroko soleki fa dati ben kon na fesi na ini a symposium „Kownukondre preikiman di e gi glori na a diniwroko fu den”? Na ini a lezing „Takimakandra fu yeye afersi e tranga wi”, wi ben luku Filipisma 4:8 finifini. Fa a tekst dati e yepi wi fu abi takimakandra di abi fu du nanga yeye afersi, èn o ten wi musu du disi?
8 A lezing „Frutrow dorodoro tapu Yehovah na ini banawtu ten” ben sori wi fa fu handri te wi kisi fu du nanga ogri sani di e pasa, problema na moni sei, gosontu sei, ini a famiri, èn te wi abi fu du nanga wan swakifasi di e tan trobi wi dorodoro. Fa wi kan sori taki wi e frutrow tapu Yehovah te wi abi fu du nanga den sortu problema disi?
9 Nyun yeye gudu: Wi ben prisiri srefisrefi fu kisi a nyun buku Aanbid de enige ware God (Anbegi a wan enkri tru Gado). Sortu krakti a ben abi tapu yu di den ben meki bekènti fu san ede den tyari a buku kon na doro? Fu san ede a sa de wan bun yepisani na ini a wroko di wi abi fu meki disipel fu gebroiki a buku disi leki a di fu tu buku fu studeri nanga sma?
10 Baka dati wi ben kisi a moi buku Nader dicht tot Jehovah (Kon krosibei na Yehovah). San na wan tu spesrutu sani di ben kari na ini a buku? Sortu prenki yu ben lobi srefisrefi? A banti di yu abi nanga Yehovah kon moro bun di yu leisi a buku? Sortu tra sma kan kisi wini fu a buku?
11 A „Fayafaya Kownukondre preikiman” Distrikt Kongres ben gi wi a deki-ati na yeye fasi di wi abi fanowdu fu man kakafutu gi problema na ini den muilek ten disi. Fu man kisi trutru winimarki fu a tumusi moi yeye seti disi, dan wi musu meki furu muiti fu man memre den sani di ben taki, warderi den sani di wi ben kisi, èn fiti den sani di wi ben leri na ini wi libi (2 Petr. 3:14). Efu wi e du disi a sa gi wi krakti fu tan hori wi soifri retifasi èn wi sa de fayafaya Kownukondre preikiman di e waka baka na eksempre fu wi Masra Yesus Krestes, di e gi Yehovah glori.—Fil. 1:9-11.