Osofamiri edeman—Tan hori yusrefi na bun gwenti di abi fu du nanga yeye afersi
1 Aladi Danièl ben libi someni tenti yari langa na mindri na afkodrei nanga a kruktudu fu Babilon, toku sma ben sabi en leki wan sma di ben dini Yehovah „doronomo” (Dan. 6:16, 20). Fa a ben man tan hori a yeyefasi fu en? A Bijbel e sori taki a ben gwenti fu du sani di ben abi fu du nanga tru anbegi. Fu eksempre, a ben abi a gwenti fu begi dri leisi wan dei fu en daki-kamra (Dan. 6:10). A no de fu taki dati a ben abi a gwenti tu fu du tra yeye sani soleki fu leisi a Wet. Dati meki, di a ben kisi wan tesi pe en libi ben kon na ini kefar, dan Danièl no ben degedege fu tan getrow na Yehovah, èn a ben kisi frulusu na wan wondru fasi.—Dan. 6:4-22.
2 Na so a de tu na ini a ten disi, taki wi musu meki muiti fu „tan na ai doronomo” (Ef. 6:18). A grontapu pe wi e libi na ini „de na ini a makti fu na ogriwan” (1 Yoh. 5:19). Gens nanga problema di e tesi a bribi fu wi kan kon wantronso. Na a ten fu a bigi banawtu, dan Gog fu Magog o feti spesrutu nanga den futuboi fu Gado, èn dan a o gersi leki nowan frulusu de gi den futuboi. Dan a o de fanowdu fu poti ala frutrow na ini Yehovah.—Esek. 38:14-16.
3 „Wan prenspari sani na foe meki a leisi di a osofamiri e leisi bijbel, a studeri di den e studeri èn a abi di den abi takimakandra di moesoe boen dorodoro, tron wan fasi foe libi.” Na so a pisi di ben e kon fosi a drama fu a Distrikt Kongres fu 1998 e sori. A nen fu a drama ben de: „Osofamiri—Meki a leisi di oenoe e leisi bijbel ibri dei de wan fasi foe libi!” A e taki moro fara: „Te osofamiri e hori densrefi na so wan programa doronomo èn na wan fasi di e meki bijbel kon na libi, dan a gwenti disi di e poti prakseri na tapoe bijbel kan abi boen foeroe krakti na tapoe na osofamiri. A e meki a sabi foe wi gro. A e tranga a bribi foe wi. Èn a e meki wi kon sabi sma di de leki eksempre — troetroe getrow man nanga oema foe owroeten — di kan meki wi kisi krakti, èn di e gi wi deki-ati foe hori waarheid hei.” Te wi e luku den difrenti bun gwenti di wi abi, di abi fu du nanga yeye afersi, dan osofamiri edeman musu poti prakseri na wán noso tu fasi fa na osofamiri kan go na fesi na yeye fasi.
4 Poti prakseri na a Wortu fu Gado ibri dei: „Te a Kownukondre fu Gado sa tiri sondro taki wan sma e gens en èn te a wani fu en e du na grontapu neleki fa a e du na hemel, dan no wan takru sma — nôno, srefi no wan meti — no sa ’du no wan enkri ogri èn den no sa pori no wan enkri sani.’ (Yes. 11:9; Mat. 6:9, 10)”. Den wortu disi ben skrifi na ini Ondrosuku den Buku fu Bijbel ala dei — 2001 ini a komentaar tapu a bijbeltekst fu 11 september. Dati na wan trowstu gi wi trutru! Leki wan osofamiri edeman, dan yu abi a gwenti ibri dei fu luku a bijbeltekst nanga a komentaar makandra nanga yu osofamiri? Disi e tyari furu wini kon. Efu yu no e feni na okasi fu kon makandra na mamanten yuru, dan kande yu kan du disi na wan tra ten fu a dei. Wan papa ben taki: „Netiyuru te wi e nyan, na wan bun ten gi wi fu luku a deitekst.”
5 Efu yu abi a bun gwenti kaba fu luku a deitekst makandra leki osofamiri ibri dei, dan disi na wan sani fu prèise trutru. Kande yu kan kisi moro wini te yu e leisi wan pisi fu Bijbel na a ten dati tu. Sonwan fu den osofamiri abi a gwenti fu leisi a heri kapitel fu pe a deitekst komoto. Trawan e leisi den kapitel a wán baka trawan, te den kaba leisi wan heri Bijbel buku. A leisi fu Bijbel ibri dei sa yepi yu osofamiri fu kon kisi frede fu du wan sani di no e plisi Yehovah. A o meki a winsi di den abi fu du a wani fu Gado kon moro tranga tu.—Deut. 17:18-20.
6 Yu nanga yu osofamiri o kisi moro wini fu a leisi di unu e leisi Bijbel nanga a deitekst ibri dei, efu unu e teki wan tu miniti fu luku fa fu fiti den sani di unu leri na ini unu libi. A Diniwroko-skoro leribuku, bladzijde 60, e gi a rai disi: „ . . . kande yu wani teki wan tu tekst fu a leisipisi fu Bijbel fu a wiki èn taki nanga den pikin fu san den tekst wani taki. Baka dati, aksi den sani soleki: ’Fa disi kan yepi wi fu sori wi san wi musu du? Fa wi kan gebroiki den vers disi na ini a diniwroko? San den tekst e sori fu Yehovah èn a fasi fa en du sani? Fa dati e meki wi kisi moro warderi gi en?’” Takimakandra fu yeye afersi neleki disi, sa yepi yu heri osofamiri fu „tan si krin san na a wani fu Yehovah”.—Ef. 5:17.
7 Osofamiri studie: Wan moi fasi fa osofamiri edeman kan sori den pikin fu den taki yeye sani e kon na a fosi presi, na fu hori na osofamiri studie doronomo ibri wiki. Wan yongu man e memre: „Son leisi te mi papa ben kon fu wroko, dan a ben weri so te taki pikinmoro a no ben man opo en ai moro; ma awinsi san ben pasa, na osofamiri studie ben e go doro, èn a sani disi ben yepi wi fu frustan o seryusu yeye sani de.” Pikin kan yepi tu fu meki a seti disi abi bun bakapisi. Wan osofamiri nanga neigi pikin ben abi a gwenti fu opo feifi yuru fu abi na osofamiri studie fu di den no ben man du disi na wan tra ten.
8 Fu meki na osofamiri studie abi winimarki trutru, dan wan osofamiri edeman musu ’poti prakseri doronomo na den sani di a e leri sma’ (1 Tim. 4:16). A Diniwroko-skoro leribuku, bladzijde 32, e taki: „Wi kan taki dati wan bun osofamiri studie e bigin nanga na ondrosuku di yu e ondrosuku yu osofamiri srefi. Fa den sma na ini yu osofamiri e go na fesi na yeyefasi? . . . Te yu de na ini a preikiwroko nanga den pikin fu yu, dan den e syen fu taki dati den na Yehovah Kotoigi te den miti nanga tra yonguwan? Den e prisiri fu leisi Bijbel èn fu studeri dati nanga na osofamiri? Trutru den e meki a fasi fa Yehovah e du sani, de a fasi fa den e libi? Efu yu e ondrosuku a tori bun leki osofamiri edeman, dan dati sa sori yu san yu musu du so taki yu kan kweki wan bun yeyefasi na ini ibri sma fu na osofamiri.”
9 Gemeente Konmakandra: Wan prenspari sani di yu musu du ala wiki, na fu sreka yusrefi gi den gemeente konmakandra èn fu go na den (Hebr. 10:24, 25). Sontron, yu kan abi na okasi fu sreka gi wan tu fu den konmakandra nanga yu heri osofamiri. Na presi taki yu wakti te na a lasti momenti fu sreka gi den konmakandra, dan yu kan du disi langa na fesi kaba. Te yu abi a gwenti fu du disi ibri leisi baka, dan disi o meki taki yu o sreka yusrefi moro bun èn yu o kisi moro wini fu den konmakandra.—Odo 21:5.
10 Te wi wani abi bun gwenti di abi fu du nanga yeye afersi, dan a de prenspari fu du sani na wan yoisti fasi èn fu du dati doronomo. San yu kan du efu yu no abi na okasi fu sreka gi ala den konmakandra? A Diniwroko-skoro leribuku, bladzijde 31, e gi a rai disi: „No lasi yusrefi fu luku den tori gawgaw, noso, moro ogri srefi, fu no studeri notinoti, soso fu di yu no kan luku ala den sani. Na presi fu dati, pruberi fu kon sabi omeni yu man studeri, èn dan studeri den sani dati bun. Du dati ibri wiki. Baka wan pisi ten, pruberi fu studeri moro fu den sani di wi musu sreka gi den tra konmakandra.”
11 Te osofamiri e kon fruku na den konmakandra, dan disi e yepi den fu kisi a yoisti fasi fu denki di de fanowdu fu prèise Yehovah èn fu kisi wini fu den leri di a e gi. Yu osofamiri abi a gwenti disi? A de prenspari fu sreka sani bun na fesi èn ibri memre musu wroko makandra fu doro a marki disi. Te yu e si taki den sma fu yu osofamiri e hasti densrefi èn taki den de na bruya ala leisi te unu e go na konmakandra, dan yu musu luku sortu sani yu musu kenki. Wan tu sani de di yu kan sreka na fesi? Te wan memre fu na osofamiri abi furu fu du, dan kande den trawan kan yepi en. Na so ala sma o de srekasreka fu go fruku na den konmakandra nanga wan korostu ati. Te sani orga na wan bun fasi, dan disi e meki taki vrede nanga rostu e kon na ini na osofamiri èn sosrefi na ini a gemeente.—1 Kor. 14:33, 40.
12 Preikiwroko: Wan tra gwenti di abi fu du nanga na anbegi fu wi, na fu poti wan spesrutu ten fu go na a preikiwroko. Wan yongu man di nen Jayson e memre: „Na ini mi osofamiri, ala satra mamanten ben de spesrutu gi a preikiwroko. Disi ben de wan bun sani gi mi bika o moro mi ben go na preikiwroko, o moro mi ben si den winimarki èn o moro mi ben e prisiri.” Furu sma di gro na ini wan osofamiri fu Kotoigi ben kon si a srefi sani disi tu. Den kon si taki, te den abi wan spesrutu ten gi a preikiwroko ala wiki, dan di disi e yepi den fu go na fesi leki Kresten diniman.
13 Wan bun gwenti fu go na preikiwroko nanga yu osofamiri kan meki tu taki den abi moro prisiri èn moro bun winimarki. Fa yu kan doro a marki disi? A Waktitoren fu 1 yuli 1999, bladzijde 21, e gi a rai disi: „¿Yu e gebroiki ten sontron fu na osofamiri studie fu yepi den memre fu yu osofamiri fu sreka gi a velddienst fu a wiki? A kan gi yu furu wini te yu e du dati (2 Timoteyus 2:15). A kan yepi fu meki a diniwroko fu den abi wan marki èn bun bakapisi. Sontron yu ben kan gebroiki wan heri studie fu sreka so wan sani. Furu tron yu ben kan taki fu difrenti pisi fu a velddienst na ini syatu takimakandra na a kaba fu na osofamiri studie noso na wan tra ten na ini a wiki.” Yu osofamiri pruberi disi kaba?
14 Tan gro na yeye fasi: Nanga den sani disi na prakseri, dan yu si wan tu fasi fa yu osofamiri go na fesi? Prèise den èn gi den deki-ati fu tan go so doro. Efu yu e si wan tu sani na san den musu wroko ete, dan bigin fu wroko na wán noso tu fu den sani disi fosi. Te den gwenti fu du den sani disi, dan teki wán noso tu tra sani baka na san yu o wroko. No lasi ati èn no fruwakti tumusi furu fu den (Fil. 4:4, 5). A e teki furu muiti fu wi fu abi bun gwenti di abi fu du nanga yeye afersi, ma disi e tyari bun bakapisi kon, bika Yehovah e gi wi a dyaranti: „Èn fu a sei fu a sma di e hori wan fasti pasi, mi sa meki a si a frulusu di e kon fu Gado.”—Ps. 50:23.