Memre den owru sma di de getrow
1 Aladi a ben de wan weduwe èn aladi a ben owru kaba, toku Ana di ben abi 84 yari, „noiti no ben misi na ini a tempel”. A getrowfasi fu en ben meki taki Yehovah gi en wan spesrutu blesi (Luk. 2:36-38). Na ini a ten disi, furu brada nanga sisa e sori a srefi getrowfasi leki a di fu Ana, aladi den de na ini muilek situwâsi. Te den getrow sma disi musu feti nanga a gosontu fu den noso nanga tra swakifasi di e kon te wan sma e kon owru, dan son leisi den e lasi-ati. Meki wi luku wan tu sani di wi kan du fu gi den deki-ati èn meki wi luku fa wi kan yepi den fu tan abi bun gwenti di abi fu du nanga yeye afersi.
2 Konmakandra nanga a preikiwroko: Te tra sma de klariklari fu tyari den, dan a de moro makriki gi furu fu den getrow sma di owru kaba fu go na den konmakandra doronomo. Na so den getrow futuboi disi di dini Yehovah wan langa pisi ten kaba, e kisi deki-ati na yeye fasi èn a gemeente e kisi wini tu. Yu ben yepi den na so wan fasi kaba?—Hebr. 13:16.
3 Fu teki prati na ini a preikiwroko doronomo e gi Kresten prisiri fu tru. Ma gi den owruwan nanga den sikiwan, disi kan de wan tyalensi trutru. Den lobiwan disi kan go nanga yu leki „kompe wrokoman” na wan fu den difrenti fasi fa wi e du a preikiwroko (Rom. 16:3, 9, 21). Kande yu kan aksi den fu taki tu te yu e preiki nanga yepi fu telefon. Yu kan aksi den tu fu go nanga yu na wan gobaka noso wan bijbelstudie. Efu na owru sma no man waka moro, dan kande yu kan aksi a bijbelstudenti fu kon na a oso fu na owru sma so taki unu kan studeri drape.
4 Studie nanga demakandra: Sontron son sma e kari wan owru sma noso wan siki sma fu kon na den osofamiri studie. Sontron wan heri osofamiri e go studeri na a oso fu den owruwan noso sikiwan. Wan mama ben go nanga en tu yongu pikin na a oso fu wan owru sisa fu studeri Mi boekoe nanga bijbel tori. Na so den ben gi makandra deki-ati. Owru sma e feni en wan prisiri sani tu te trawan e kari den fu kon nyan nanga den noso fu abi prisiri demakandra nanga den. Efu den sikiwan swaki tumusi fu go na tra sma oso, dan kande wi kan go na den fu wan syatu pisi ten nomo fu leisi gi den, fu begi nanga den, noso fu fruteri den wan ondrofenitori di e gi den deki-ati.—Rom. 1:11, 12.
5 Yehovah e si owru sma di de getrow leki tumusi warti sani (Hebr. 6:10, 11). Wi kan de neleki Yehovah te wi e sori warderi gi den owru sma disi èn te wi e yepi den fu tan abi bun gwenti di abi fu du nanga yeye afersi.