Poti prakseri na den moro owroewan èn sikiwan
1 Fa a e gi wi tranga foe abi heri ipi moro owroe brada nanga sisa na ini wi mindri di abi foeroe jari foe getrow dienst foe a Kownoekondre a baka den. Den sma di ben kisi foeroe ondrofeni ini den jari di psa ini a dini foe Jehovah, de troetroe wan fonten foe dek’ati gi wi alamala. Den weti-ede de troetroe wan heri moi kroon èn a de foe den de wan bigi wini gi na gemeente. — Odo 16:31.
2 Nanga aladi wi e kisi winimarki foe den brada nanga sisa foe den jeje presenti di den sortoe owroe sma dati kan gi wi, wi moesoe tan hori na prakseri taki den jari di e kren kan tjari heri ipi problema nanga den (Prék. 12:1-5). Wi e poti boen prakseri na den persoonlek fanowdoe foe wi moro owroe brada nanga sisa èn wi de klarklari foe gi switifasi nanga foeroe-nanga-lobi jepi? (Joh. 13:34, 35) Den fanowdoe foe den kan de tra fasi krinkrin.
3 Sontron den abi fisiti fanowdoe foe jepi den dati a firi foe de joe wawan komoto a pasi, ma nofotron den abi praktis jepi fanowdoe na na sé foe vervoer, boskopoe, doe osowroko nanga tra sani di moe doe ibri dé. Nanga aladi wan moro owroe brada ofoe sisa de tranga na jejesé, a kan taki na a sé foe en skin a no kan sorgoe moro gi wantoe fanowdoe sani. Ooktoe trawan a ini na gemeente di no de so owroe ete, kande abi den sortoe jepi dati fanowdoe foe di den siki ofoe den abi wan malengri na skinfasi.
FA WI KAN GI JEPI?
4 A moro prenspari frantwortoe foe jepi moro owroewan èn sikiwan de na famiriman èn tra famiri. Jeje brada nanga sisa na a tra sé moesoe sori taki wi e broko wi ede èn de klariklari foe gi jepi. Abi demakandra nanga wi getrow owroesma tapoe den komakandra, wani taki foeroe gi den èn efoe den gesontoe e gi pasi foe dati, dan den sa teki joe switi kari foe go makandra nanga den na a Kownoekondrezaal, nanga prisiri. Ete wan fasi foe sori lobifasi boen-ati, de foe sori taki wi lobi teki sma na ini wi oso èn kari moro owroe brada nanga sisa foe kon njan na wi ofoe foe abi wan kewoon switi kristen demakandra.
5 Efoe sani e seti gi na velddienst, dan joe e meki moeiti foe poti den moro owroewan na ini. Den skotoe foe den na skinfasi kande e meki a de fanowdoe taki joe soekoe gebied di no e aksi foeroe foe den krakti. Te joe e teki moro owroe prékiman go na go-baka nanga bijbelstudie dan dati kan de wan dek’ati gi den ososma. Na den owroe sma disi na faja foe na velddienst no gwe èn efoe wi e doe ala san wi kan foe tjari den go na ini na velddienst nanga wi, dan den sa meki na wan tangifasi gebroiki foe na okasi èn den sa doe ala san den kan foe gi na kotoigi di e gi.
6 Den sma di no man foe go dorodoro na den komakandra sa misi na demakandra nanga den brada nanga sisa, a no de foe taki. Sani kan sreka sodati den moro prenspari punt foe den komakandra kan taki makandra nanga den? Ooktoe den sa abi warderi taki den kisi den moro njoen boekoe. Efoe wan owroewan no kan si boen moro, kande ai feni en switi efoe wan sma lési pisi ini na bijbel ofoe foe den boekoe foe na Genootschap gi en.
7 Soso na sabi taki wi e prakseri den, kan mene foeroe gi den. Wan sjatoe, fisiti di e bow sma noso wan kari na konkroetité gi wan sma di no man komoto foe oso, kan doe boen foeroe boen. Kande joe sa kon foe si taki joe égi prisiri e kon moro bigi efoe na a fasi disi joe e waka baka na rai foe ini 1 Johannes 3:18 foe lobi „na ini doe nanga waarheid”. Meki a de so taki Jehovah blesi ala moeiti di joe e doe foe jepi wi getrow moro owroewan èn ooktoe den sikiwan.