Libi akruderi a gi di wi gi wisrefi abra na Yehovah
1 Awinsi yu no dopu so langa ete noso awinsi yu dopu wan heri pisi ten kaba, toku a no de fu taki dati yu e memre a tumusi prenspari sani disi ini yu libi. A dopu fu wi no ben de a kaba ma na presi fu dati, a ben de a bigin fu a gi di yu gi yu heri libi fu du diniwroko di kan tan fu têgo (1 Yoh. 2:17). Sortu sani wi musu du fu libi akruderi a gi di wi gi wisrefi abra na Yehovah?
2 Waka baka na eksempre fu Krestes: Baka di Yesus dopu, dan a „ben bigin nanga a wroko fu en”, fu „meki a bun nyunsu fu a kownukondre fu Gado bekènti” (Luk. 3:23; 4:43). Na a srefi fasi, di wi dopu fu sori na publiki taki wi gi wisrefi abra na Yehovah, dan wi tron en futuboi di poti na wroko fu meki a bun nyunsu bekènti. Aladi a e aksi furu ten nanga muiti fu kisi den sani di wi abi fanowdu fu man tan na libi, toku a moro prenspari wroko fu wi na a Kresten diniwroko (Mat. 6:33). Na presi fu meki muiti fu kon gudu noso fu abi wan bigi nen na ini a libimakandra, dan den wan di gi densrefi abra na Gado e meki muiti fu ’gi glori na a diniwroko fu den’, neleki fa na apostel Paulus ben du dati (Rom. 11:13). Yu e warderi a grani di yu kisi fu dini Yehovah? Yu e meki muiti fu gi glori na a diniwroko di yu e du gi en?
3 Neleki Yesus, wi musu „kakafutu gi Didibri” (Yak. 4:7). Satan ben tesi Yesus baka di A dopu, èn na ini a ten disi, na a srefi fasi a e tesi den futuboi fu Yehovah di gi densrefi abra (Luk. 4:1-13). Fu di wi de na ini a grontapu fu Satan, meki wi musu leri fu dwengi wisrefi, aladi wi e wai pasi gi iniwan sani di kan pori wi frustan nanga wi ati (Odo 4:23; Mat. 5:29, 30). Kresten e kisi a frumane taki den „no kan nyan na ’a tafra fu Yehovah’ èn na a tafra fu den ogri yeye” (1 Kor. 10:21). Disi wani taki dati wi musu luku bun nanga prisiriten di no bun, takru kompe, èn sani di de fu feni na tapu Internet di kan pori wi. Disi wani taki tu dati wi no musu leisi noso arki sani di e kon fu sma di fadon komoto na bribi. Te wi luku bun nanga den sani disi èn sosrefi nanga tra sani di Satan e gebroiki fu kori wi, dan disi e yepi wi fu libi akruderi a gi di wi gi wisrefi abra na Yehovah.
4 Gebroiki den sani di Gado seti: Yehovah e gebroiki en Wortu nanga a Kresten gemeente fu yepi wi fu libi akruderi a gi di wi gi wisrefi abra na en. Meki en wan gwenti fu leisi Bijbel èn fu begi ibri dei (Yos. 1:8; 1 Tes. 5:17). Prisiri fu go na den gemeente konmakandra (Ps. 122:1). Abi demakandra nanga den wan di e frede Yehovah èn hori den komando fu En.—Ps. 119:63.
5 Nanga a yepi fu Yehovah, yu kan libi akruderi a gi di yu gi yusrefi abra na En èn yu kan abi a prisiri fu dini en fu têgo.—Ps. 22:26, 27; Fil. 4:13.