Yonguwan, seti wan bun fondamenti gi a tamara fu yu
1. Fu san ede Kresten yonguwan musu kweki wan tranga bribi?
1 San na a moro prenspari sani di yu abi na prakseri? Fu san yu e denki? Yu e broko yu ede moro furu nanga sani di abi fu du nanga a ten disi, noso yu e broko yu ede nanga sani di musu kon ete èn nanga sani di Gado pramisi? (Mat. 6:24, 31-33; Luk. 8:14) Wan tranga bribi de fanowdu fu man du soleki fa Gado pramisi. A sani disi wi kan leri fu na eksempre fu Abraham nanga Moses (Hebr. 11:8-10, 24-26). Fa yu kan kweki so wan bribi èn fa yu kan seti „wan bun fondamenti gi a tamara”?—1 Tim. 6:19.
2. San wi e leri fu na eksempre fu Kownu Yosia?
2 Suku Yehovah: Efu yu gwenti fu du sani di abi fu du nanga yeye afersi makandra nanga na osofamiri fu yu, dan wi e prèise yu gi dati. Ma no denki taki so wan gwenti wawan sa meki yu kisi wan tranga bribi. Fu man feni „a sabi fu Gado srefi”, dan yusrefi musu suku Yehovah (Odo 2:3-5; 1 Kron. 28:9). A yongu Kownu Yosia ben du dati. Aladi a kweki na ini wan osofamiri di no ben abi yeyefasi kwetikweti, toku „a ben bigin suku a Gado fu David, a fositen tata fu en” di a ben abi 15 yari.—2 Kron. 34:3.
3. Fa yongu Kresten kan suku Yehovah na ini a ten disi?
3 Fa yu kan suku Yehovah? Yu kan du dati fu di yu e ondrosuku finifini san yu e bribi èn ’fu kon sabi gi yusrefi’ efu dati na a waarheid (Rom. 12:2). Fu gi wan eksempre: Yu kan tyari kon na krin san Bijbel e taki fu brudu, noso yu kan buweisi taki a Kownukondre fu Gado bigin tiri na ini hemel na ini 1914? Fu kisi „a soifri sabi fu waarheid” na wan prenspari sani fu seti wan bun fondamenti gi a tamara fu yu.—1 Tim. 2:3, 4.
4. Fa wan preikiman di no dopu ete kan sori taki a e go na fesi?
4 A suku di Yosia suku Yehovah ben tyari bun bakapisi gi en. Fosi a ben abi 20 yari, dan a ben handri nanga deki-ati di a puru ala falsi anbegi fu a kondre (2 Kron. 34:3-7). Na a srefi fasi, den sani di yu e du sa meki sma si taki yu e go na fesi na yeye fasi (1 Tim. 4:15). Efu yu na wan preikiman di no dopu ete, dan yu kan du muiti fu du a diniwroko fu yu moro bun. No de tevrede nanga a prati fu lektuur nomo. Poti en leki marki fu gebroiki a Bijbel, fu taki-go-taki-kon nanga sma, èn fu drai go baka na den sma di wani sabi moro (Rom. 12:7). Disi sa yepi yu fu gro na yeye fasi.
5. Sortu okasi de gi sma di dopu kaba fu du moro na ini a diniwroko?
5 Gi Yehovah a moro bun sani di yu abi: Te yu e gi yusrefi abra na Yehovah èn yu e teki dopu, dan yu e tron wan futuboi fu Gado di a poti na wroko (2 Kor. 3:5, 6). Disi e gi yu na okasi fu dini Yehovah na ini a furuten diniwroko. Kande yu kan go na ini a pionierwroko, noso na Bethel. Kande yu kan go na ini a zendelingwroko, noso na ini bow-wroko di e du na difrenti kondre. Ete wan tu fasi fu du moro na ini a diniwroko, na fu leri wan tra tongo, noso fu froisi go pe moro yepi de fanowdu.
6. Fa wi alamala kan seti wan bun fondamenti gi a tamara?
6 Ma soleki fa wi kan frustan, dan a no ala sma kan gi densrefi fu du diniwroko na den spesrutu fasi disi, ma ibriwan fu wi kan du san wi man fu gi Yehovah a moro bun sani di wi abi (Mat. 22:37). Awansi na ini sortu situwâsi yu de, poti a dini fu Yehovah leki a moro prenspari sani na ini yu libi (Ps. 16:5). Te yu e du dati, dan yu sa seti wan tumusi moi fondamenti gi a tamara.