Den Distrikt Kongres nanga den Internationaal kongres e gi wi deki-ati fu gi Gado glori!
Den „Gi Gado glori” Distrikt Kongres nanga Internationaal Kongres di hori te leki now, gi sma wan moi kotoigi srefisrefi. Den prenspari theokrasia konmakandra disi gi glori na Yehovah nen èn den yepi wi fu go na fesi ini a fasi fa wi e „gi Yehovah a glori di en nen musu kisi” (Ps. 96:8). A de krin taki Yehovah musu kisi glori, fu di a ben meki wondru sani, di e sori wi den tumusi moi eigifasi fu en.—Yob 37:14; Openb. 4:11.
Gebroiki den aksi di e kon now nanga den penti di yu skrifi, fu sreka yusrefi na fesi èn fu teki prati na a takimakandra fu a kongres programa, di o hori ini a wiki fu 20 oktober.
1. Fa den mekisani di no abi libi e gi Gado glori, èn fa dati de tra fasi leki fa libisma e prèise en? (Ps. 19:1-3; „Den sani di Gado meki e gi En glori”)
2. Sortu sani ini a ten disi a fisyun pe Yesus, Moses nanga Elia de na ini, e prenki, èn fa Kresten e kisi deki-ati fu den sani di a fisyun e prenki? (Thema taki „Kefalek moi fisyun fu profeititori e gi wi deki-ati!”)
3. Fa wi kan kweki a srefi sortu sakafasi di a profeiti Danièl ben sori, èn sortu wini a sa tyari gi wisrefi te wi e du dati? (Dan. 9:2, 5; 10:11, 12; „Yehovah e sori sma di abi sakafasi a glori fu En”)
4. (a) Sortu dri sani di abi fu du nanga den krutu fu Gado, wi kan leri fu a profeititori fu Amos? (Amos 1:3, 11, 13; 9:2-4, 8, 14) (b) San Yehovah Kotoigi na ini a ten disi kan leri fu na eksempre ini Amos 2:12 di de wan warskow boskopu? („A profeititori fu Amos—A boskopu fu en gi wi na ini a ten disi”)
5. (a) San na den kefar te wan sma e dringi sopi na wan fasi di no fiti, awansi a no e drungu srefi? (b) Fa wan sma di e dringi sopi na wan fasi di no fiti, kan lusu a problema disi? (Mark. 9:43; Ef. 5:18; „Wai pasi gi a trapu fu dringi sopi pasa marki”)
6. Sortu wini yu e kisi fu a nyun publikâsi ’Zie het goede land’? („’A bun kondre’—A e meki wi tesi fa a Paradijs sa de”)
7. Na sortu dri fasi wi kan „de leki wan spikri èn skèin a glori fu Yehovah”? (2 Kor. 3:18; „De leki wan spikri èn skèin a glori fu Yehovah”)
8. Fu pe a bita-ati komoto di sma e sori wi sondro taki wi du den wan sani, èn san o yepi wi fu hori wi soifri retifasi aladi wi kisi fu du nanga so wan bita-ati? (Ps. 109:1-3; „Den abi bita-ati gi wi sondro taki wi du den wan sani”)
9. O ten wan Kresten musu taki dati wan sma bigi trutru? Fa wan sma kan kon sabi taki a musu leri fu si a sani disi moro bun? (Mat. 20:20-26; „O ten wan sma bigi trutru?—Fa wan Kresten musu si a tori disi”)
10. San kan yepi wi fu de fayafaya na yeye fasi, aladi wi kon weri na skin fasi? („Wi e kon weri, ma wi e tan go doro”)
11. Sortu sani Satan e gebroiki fu panya leitori? Soleki fa Bijbel e sori, dan san na a yoisti sani di wi musu du te sma e pruberi fu pori a bribi fu wi? (Yoh. 10:5; „Luku bun nanga ’a sten fu freimdesma’”)
12. (a) Fa papa nanga mama kan waka baka na eksempre fu Yesus di skrifi na ini Markus 10:14, 16? (b) San yu lobi fu a nyun buku Lessen van de Grote Onderwijzer? („Den pikin fu wi—Wan tumusi warti gudu”)
13. Na sortu fasi yonguwan e prèise Yehovah? (1 Tim. 4:12; „A fasi fa yonguwan e prèise Yehovah”)
14. Sortu pisi fu a drama „Tan kotoigi sondro frede aladi sma e gens wi” yu kan memre heri bun ete?
15. Fa wi kan waka baka den eksempre fu (a) Petrus nanga Yohanes? (Tori. 4:10) (b) Stefanus? (Tori. 7:2, 52, 53) (c) a Kresten gemeente fu a fosi yarihondro? (Tori 9:31; drama èn a lezing „Preiki a bun nyunsu ’sondro fu tapu’”)
16. (a) Na tapu sortu fasi wi teki a fasti bosroiti fu gi Yehovah glori? (b) Sortu dyaranti wi abi aladi wi e fiti den sani di wi ben leri na den „Gi Gado glori” Distrikt Kongres? (Yoh. 15:9, 10, 16; „’Tan meki furu froktu’ fu gi Yehovah glori”)
Te wi prakseri dipi fu den moi rai fu Gado di wi ben kisi na a kongres, dan dati sa meki taki wi e du san wi leri (Fil. 4:8, 9). Disi o tranga a fasti bosroiti di wi teki fu „du ala sani fu gi Gado glori”.—1 Kor. 10:31.