Du muiti fu kisi wan krosibei banti nanga Yehovah
1. San wan sisa kon frustan fu a gwenti di a ben abi na ini a waarheid?
1 „Den wan-enkri sani di mi ben e du na ini den 20 yari di mi de na ini a waarheid, na fu go na den konmakandra èn fu go na ini a preikiwroko”, na so wan Kresten sisa ben fruteri. Ma a e taki moro fara: „Mi kon frustan taki aladi den sani disi prenspari, toku den sani disi wawan no kan yepi mi te problema bigin kon. . . . Now mi sabi taki mi musu kenki a fasi fa mi ben e denki, èn mi musu bigin seti wan programa fu studeri so taki mi kan kon sabi èn lobi Yehovah trutru, èn so taki mi kan warderi a sani di en Manpikin du gi wi.”
2. Fu san ede a de prenspari fu du muiti fu kon kisi wan krosibei matifasi nanga Yehovah?
2 Wi musu du muiti fu kisi wan krosibei mati fasi nanga Yehovah. Wi musu du moro leki fu hori wisrefi nomo na spesrutu Kresten gwenti. Efu wi no e begi Yehovah doronomo, dan baka wan pisi ten a no sa de leki wan mati moro, fu di wi no e hori a kontakti nanga en (Openb. 2:4). Meki wi go ondrosuku fa begi, èn a studeri di wi e studeri Bijbel kan yepi wi fu kon kisi wan krosibei matifasi nanga Yehovah.—Ps. 25:14.
3. Fa wi musu studeri efu wi wani kon krosibei na Gado?
3 Begi, nanga dipi prakseri de tumusi prenspari: Efu wi wani taki bijbelstudie musu doro wi ati, dan wi no musu hari strepi nomo na ondro den bun piki ini den buku di wi e studeri, èn wi no musu leisi den tekst nomo di kari. Wi musu prakseri dipi fu kon sabi san a tori e fruteri fu a wani fu Yehovah, san a e fruteri fu den markitiki fu en èn fu a fasi fa a de (Ex. 33:13). Te wi e kon frustan yeye tori dan dati sa abi krakti tapu den firi fu wi, èn a sa meki wi go prakseri fu wi eigi libi (Ps. 119:35, 111). Wi musu studeri nanga a marki fu kon krosibei na Yehovah (Yak. 4:8). Wi musu meki ten èn wi musu feni a yoisti momenti nanga presi fu man studeri seryusu. Disi e aksi tu taki wi musu dwengi wisrefi fu du disi doronomo (Dan. 6:10). Yu e meki ten ala dei fu prakseri dipi fu den tumusi moi fasi fu Yehovah, aladi yu abi bun furu fu du?—Ps. 119:147, 148; 143:5.
4. Fa kan kisi wan krosibei matifasi nanga Yehovah te wi e begi fosi wi bigin studeri?
4 Begi nanga wi heri ati prenspari trutru te wi e studeri. Efu wi wani taki Bijbel waarheid naki wi ati èn buweigi wi fu „kan du santa diniwroko gi Gado na wan fasi di a feni bun, aladi wi e frede èn e lespeki en”, dan wi abi a santa yeye fu Gado fanowdu (Hebr. 12:28). Fu dati ede, fosi wi bigin studeri, wi musu aksi Yehovah fu en yeye (Mat. 5:3). Te wi e denki dipi fu den Buku fu Bijbel èn te wi e meki gebroiki fu den yepisani di na organisâsi fu Yehovah meki, dan wi e opo wi ati gi Yehovah (Ps. 62:8). Te wi e bigin studeri na a fasi disi, dan dati na wan fasi fu anbegi pe wi e sori taki wi e dini Gado fayafaya èn wi e tranga a matifasi di wi abi nanga en.—Yud. 20, 21.
5. Fu san ede a de prenspari fu denki dipi fu a Wortu fu Gado ala dei?
5 Soleki fa a de nanga ala matifasi di sma abi nanga makandra, dan wi musu meki muiti doronomo fu meki a banti dati kon moro tranga wi heri libi langa. Fu dati ede, meki wi bai a yoisti ten ala dei fu kon krosibei na Gado, aladi wi sabi taki en, fu en sei, sa kon krosibei na wi.—Ps. 1:2, 3; Ef. 5:15, 16.