Weri krosi di fiti èn de wan eksempre ini a fasi fa yu e moi yusrefi
1. Te wi e sreka wisrefi gi a distrikt kongres, dan fu san ede wi musu poti prakseri na a fasi fa wi o weri krosi èn na a fasi fa wi o moi wisrefi?
1 „Yehovah Kotoigi na bun sma trutru! Unu abi switifasi èn unu e weri krosi di fiti, èn den sani disi e sori taki un abi furu lespeki gi trawan.” Na so wan man di e teki fesi na wan hotel ben taki fu den brada nanga sisa di ben go na wan distrikt kongres a yari di pasa. Na wan tra kongres, wan uma di ben e wroko na wan hotel ben taki: „A de krin fu si taki unu e weri krosi fu plisi Gado.” Iya, sma e luku den wan di e go na den kongres. Fu dati ede wi wani weri krosi „na wan fasi di fiti a bun nyunsu”, èn furu tron disi e pusu sma di no de Kotoigi fu taki bun fu wi èn a e meki sma si krin taki wi na dinari fu Gado (Fil. 1:27). Te wi e sreka wisrefi gi a distrikt kongres, dan a bun fu prakseri sortu krosi wi o weri èn na sortu fasi wi o moi wisrefi.
2. Fu san ede a de wan tyalensi fu weri krosi èn fu moi wisrefi na wan fasi di fiti?
2 Na disipel Yakobus ben skrifi: „Na a fosi presi, a sma di abi a koni fu tapusei, de krin” (Yak. 3:17). A kan de wan tyalensi fu weri krosi èn fu moi wisrefi na wan fasi di fiti. A doti grontapu fu Satan e gi sma a deki-ati fu weri krosi di no fiti; den krosi disi lai pranpran èn den e wiki den seks lostu fu trawan (1 Yoh. 2:15-17). Sobun, te wi e bosroiti san wi o weri èn fa wi o moi wisrefi, dan wi musu gi yesi na a frumane fu Bijbel fu „drai wi baka gi ogridu èn gi den lostu fu grontapu èn taki wi musu libi nanga wan gosontu frustan . . . na mindri a disiten seti fu sani” (Tit. 2:12). Noiti wi no wani taki a fasi fa wi e weri krosi noso a fasi fa wi e moi wisrefi e meki tra sma naki futu, awansi den na wi brada, sma di e wroko na hotel nanga nyan-presi, noso tra sma di e luku fa wi e tyari wisrefi.—1 Kor. 10:32, 33.
3. Sortu aksi sa yepi wi fu frustan sortu krosi wi musu weri èn fa wi musu moi wisrefi?
3 Krosi di fiti: Te yu e sreka gi a kongres, yu kan aksi yusrefi: ’Mi sa weri krosi di fiti, noso mi sa hari sma prakseri nanga a krosi di mi sa weri? Den krosi fu mi e sori taki mi abi lespeki gi den firi fu trawan? A de so taki a blouse fu mi lagi tumusi, noso a syatu tumusi? Den krosi fu mi e poti afu fu mi skin na doro noso den span tumusi na mi skin? Den krosi fu mi krin èn den e smeri switi? Efu mi e tan na ini a birti fu pe a kongres e hori, dan sortu krosi mi e weri na ini a pauze fu a kongres? Mi e weri krosi di fiti, krosi di krin, èn krosi di e sori taki mi na wan preikiman? Noso, mi sa weri krosi di no fiti, krosi di bigi tumusi na mi skin, noso krosi di pritipriti leki broko krosi? Mi sa weri krosi di e sori taki mi no e broko mi ede nanga san tra sma e prakseri, èn krosi di no fiti wan sma di e go na a kongres èn di weri wan lapelkarta? Den krosi di mi e weri te mi no de na a kongres sa meki mi syen fu du okasi preiki?’—Rom. 15:2, 3; 1 Tim. 2:9.
4. Fa trawan kan yepi wi fu weri krosi èn fu moi wisrefi na wan fasi di fiti?
4 Wi kan kisi bun rai fu lepi Kresten. Trow-uma kan aksi den masra fa tra sma sa denki fu a krosi di den wani weri. Papa nanga mama di e dini Gado kan yepi den tini pikin ini a tori disi. Boiti dati, den moro owru sisa kan „tyari den yongu uma kon na den frustan . . fu de gosontu ini denki, fu de krin” ini a fasi fa den e moi densrefi èn e weri krosi „so taki sma no kosi a wortu fu Gado” (Tit. 2:3-5). Den publikâsi fu wi abi bun eksempre di e yepi wi fu si fa fu weri krosi di fiti.
5. Fa wi alamala kan gi Yehovah glori na a kongres?
5 Gi glori na Yehovah: Den distrikt kongres na moi okasi gi wi alamala, no fu de drape wawan, ma fu gi Yehovah glori tu. A no de fu taki, dati wi sa gi en grani nanga a fasi fa wi leki Kresten e handri èn e taki. Ma a fosi sani di furu sma e si na a fasi fa wi e weri krosi, nanga a fasi fa wi e moi wisrefi. Meki wi alamala gi Yehovah glori fu di wi e weri krosi èn e moi wisrefi na wan fasi di fiti.—Ps. 148:12, 13.
[Faki na tapu bladzijde 6]
Sani di sa yepi wi fu weri krosi èn fu moi wisrefi na wan fasi di fiti so taki sma kan prèise Yehovah
◼ A Wortu fu Gado
◼ Te wi o ondrosuku wisrefi
◼ Bun rai fu tra sma
◼ Kresten publikâsi