Wi e sori lespeki gi Gado te wi e weri krosi di fiti
1. Fa wi kan sori warderi gi a distrikt kongres di sa hori?
1 Dyonsro wi sa abi a grani fu de fisitiman fu Yehovah na a „Gi Gado glori” Distrikt Kongres 2003. Wi de nanga tangi na ati taki Yehovah gi wi wan kari fu kon na a fesa fu en di lai nanga yeye nyanyan! Nanga a fasi fa wi e weri krosi èn nanga a fasi fa wi e moi wisrefi wi kan sori lespeki gi en èn wi kan sori taki wi e warderi den sani di a seti na yeye fasi.—Ps. 116:12, 17.
2. Fu san ede a prenspari gi wi fu de krin èn fu weri krosi di krin?
2 Wi musu de krin èn wi musu du sani na wan fasi di orga: A fasi fa wi de musu sori taki wi e hori wisrefi na den markitiki fu wi Gado, di de krin èn di e orga sani (1 Kor. 14:33; 2 Kor. 7:1). Wi skin musu de krin, a wiwiri nanga den nangra fu wi musu de krin, sosrefi den krosi di wi e weri musu de krin. Furu sma gwenti fu weri krosi di syabisyabi. Pôpi sma fu telefisi noso pôpi sportman e weri krosi di syabisyabi, ma disi no wani taki dati wi leki Kresten musu du a srefi sani. Te wi e weri ala den sani di de na modo, dan kande sma no sa man si a difrenti na mindri den wan di e dini a tru Gado nanga den wan di no e dini en.—Mal. 3:18.
3. Fa wi kan sabi soifri taki a fasi fa wi e moi wisrefi de akruderi a rai na ini 1 Timoteyus 2:9, 10?
3 Weri krosi di fiti wan Kresten dinari: Di na apostel Paulus ben skrifi a Kresten opziener Timoteyus, dan a ben gi a deki-ati taki den „umasma musu weri krosi di fiti, na wan lespekifasi èn nanga krin frustan, . . . den musu weri soleki fa a fiti uma di e taki dati den e anbegi Gado, fu di den e du bun wroko” (1 Tim. 2:9, 10). Te wi wani sabi soifri efu den krosi fu wi fiti, dan a de fanowdu fu prakseri bun fu a tori disi. Den krosi fu wi musu de krin èn den musu fiti, ma den no musu abi tumusi furu pranpran noso wi no musu weri krosi di e wiki den seks lostu fu tra sma.—1 Petr. 3:3.
4, 5. Na sortu warskow Kresten man nanga uma musu gi yesi?
4 Paulus ben gi a warskow sosrefi fu no du tumusi aparti sani di abi fu du nanga ’a brei di sma e brei wiwiri nanga ala sortu modo èn a weri di den e weri gowtu sani noso klara noso bun diri krosi’ (1 Tim. 2:9). Kresten uma musu luku bun te den e gebroiki gowtu sani, make-up, nanga tra sani fu prodo. Den sa de koni trutru efu den e gebroiki den sani disi na wan yoisti fasi.—Odo 11:2.
5 A rai di Paulus gi Kresten uma e fiti sosrefi gi Kresten man. Den brada musu luku bun fu no weri krosi na a fasi fa den sma fu grontapu e weri krosi (1 Yoh. 2:16). Fu gi wan eksempre, na ini son kondre a de wan pôpi sani fu weri krosi di bigi tumusi, ma a fasi disi fu weri krosi no e fiti wan dinari fu Gado.
6. Fu san ede wi musu tan hori wisrefi na den hei markitiki di abi fu du nanga a fasi fa wi e weri krosi èn a fasi fa wi e moi wisrefi te wi e go na a kongres èn te wi e komoto fu a kongres? Fu san ede wi musu du dati sosrefi te wi de na a kongres èn baka a programa ibri dei?
6 Sani di wi e du baka a programa: Na a ten fu a programa, dan moro furu fu den brada nanga sisa e gi wan bun eksempre nanga a fasi fa den e weri krosi èn nanga a fasi fa den e moi densrefi. Ma soleki fa a sori, dan son sma no e broko den ede moro nanga trawan te den de na pasi e go na a kongres èn te den e komoto fu a kongres, noso te den e du sani na ini den fri ten baka a programa. Fu tru, a fasi fa wi e weri krosi nanga a fasi fa wi e moi wisrefi, efu a de na a ten fu a programa noso na tra ten, abi krakti tapu a fasi fa sma e si a pipel fu Gado. Fu di wi e weri a lapelkarta fu a kongres, meki ala ten wi musu weri krosi di fiti Kresten dinari. Furu tron disi e meki sma taki bun fu wi èn wi kan kisi na okasi fu gi kotoigi.—1 Kor. 10:31-33.
7. Sortu krakti a kan abi tapu trawan te wi e weri krosi na wan fasi di fiti?
7 Te wi e lafu na wan switifasi dan disi e moi wi fesi. Na so a de tu, taki te wi e weri krosi na wan fasi di fiti èn te wi e moi wisrefi na wan bun fasi, dan disi e meki sma abi moro lespeki gi a boskopu di wi e tyari èn gi na organisâsi fu san wi e horibaka. Son sma di sa si wi na a „Gi Gado glori” Distrikt Kongres a yari disi, kande sa wani sabi fu san ede wi de difrenti èn kande den sa taki srefi: „Wi wani go nanga unu, fu di wi yere [èn wi si] taki Gado de nanga unu” (Sak. 8:23). Meki ibriwan fu wi sori lespeki gi Yehovah nanga a fasi fa wi e weri krosi èn nanga a fasi fa wi e moi wisrefi.
[Faki na tapu bladzijde 5]
Weri krosi na wan warti fasi èn moi yusrefi na wan fasi di fiti
▪ Te yu de na pasi
▪ Te yu de na a kongres
▪ Na ini yu fri ten