Weri krosi èn moi yusrefi na wan fasi di fiti
1 „Ala den mansma, èn srefi den yongu boi e weri das. Ala den umasma nanga ala den umapikin, den tini nanga den pikinwan, den alamala weri wan yapon noso wan koto. Nowan jeans-bruku noso opo empi no de fu si. Ala sma di de dyaso e prisiri pasa marki.” Dati na san wan nyunsu boskopu ben taki. Fu sortu grupu fu sma a ben e taki? A ben e taki fu sma di ben de na wan politiek konmakandra? A ben de wan grupu fu sma na wan sport wega? Noso a ben de sma di ben go arki rock poku? Kwetikweti! A ben e taki fu wan grupu fu brada nanga sisa di ben de na wan fu den bigi distrikt kongres fu a yari di pasa.
2 Na wan tra foto pe wan kongres ben hori, wan man di e skrifi nyunsu boskopu na koranti ben taki fu den Kotoigi: „Ala den mansma weri wan dyakti nanga wan das. Den umasma weri krosi na wan fasi di fiti èn toku den weri tumusi moi.” Wan waktiman sosrefi di luku a fasi fa sani waka e taki: „Unu na sma di abi bun maniri, unu abi lespeki, unu krin, èn unu e seti ala sani so moi. San mi e si moi srefisrefi. Na ini a doti grontapu disi unu ben man fu puru a doti poti na wan sei!” A switi fu yere dati sma e taki den moi sani disi fu wi! Wi e prisiri srefisrefi dati sma ben man taki so furu bun sani fu den brada fu wi, a no so? A no de fu taki dati a fasi fa ibriwan fu den Kotoigi di ben de na a kongres ben weri krosi, meki taki sma ben man taki na so wan bun fasi fu na eksempre fu den.
3 Na heri grontapu sma kon sabi wi fu di a de krin taki a fasi fa wi e moi wisrefi èn a fasi fa wi e weri krosi de heri trafasi (Mal. 3:18). Fu san ede? Fu di wi e waka baka a Bijbel rai fu „moi [wisrefi] nanga krin krosi, nanga bescheidenfasi èn nanga gosontu frustan, . . . na a fasi di e fiti [sma] di e taki dati den e lespeki Gado”.—1 Tim. 2:9, 10.
4 San yu krosi nanga a fasi fa yu e moi yu skin e sori? Den krosi di wi e weri èn a fasi fa wi e weri den, e fruteri krinkrin suma na wi. Dati wani taki dati den e fruteri san wi e bribi, fa wi e denki, èn san wi abi na prakseri fu du. Den modo di wi e weri e fruteri sma suma na wi èn na sortu sei wi de. Noiti wi no musu horibaka gi den lagi denki èn a lagi fasi fa sma e tyari densrefi na ini a grontapu disi; wan fasi fu libi di sma lobi sote. Wi no e luku nomo efu wan sani de na modo èn efu ala sma e weri en, ma wi e luku efu a fiti dati wan sma di e taki dati en na wan futuboi fu Gado e teki a modo dati abra (Rom. 12:2). Na presi fu weri krosi di e sori taki wi no e broko wi ede srefisrefi nanga fa trawan e denki, noso di kan gi wan sma na prakseri taki wi e libi wan huru libi, dan wi wani sori taki wi na sma di wani fu „gi glori na Gado” trutru.—1 Petr. 2:12.
5 Te wan sma nyun na ini na organisâsi, te a no abi so furu ondrofeni, noso te a swaki na yeye fasi, dan dati kan meki son leisi taki a e waka baka ala den modo fu grontapu, sondro fu prakseri fosi san dati kan meki sma prakseri fu Yehovah nanga na organisâsi fu en. Wi alamala kan ondrosuku wisrefi fu si efu a denki fu grontapu abi krakti tapu a fasi fa wi e denki. Wi kan aksi wan brada noso wan sisa di sma e lespeki èn di lepi na yeye fasi, fu taigi wi krin fa a de nanga a modo fu wi. Wi kan aksi den efu wi e weri krosi èn e moi wi skin na wan fasi di fiti. Baka dati wi kan go sidon denki seryusu fu den rai di a brada noso sisa gi wi.
6 Sonwan e agri taki a prenspari fu luku bun fa den e weri krosi te den e go na wan kongres. Ma furu tron den no e broko den ede tumusi nanga fa den e weri krosi baka ibri dei fu a kongres. Tan hori yusrefi na den hei markitiki di fiti wan Kresten dinari (2 Kor. 6:3, 4). Awinsi pe wi e go na a pisi ten dati, den lapelkarta fu a kongres nanga a yoisti fasi fa wi e weri kosi èn e moi wisrefi, e sori taki wi na Kotoigi fu Yehovah. Sobun ala ten wi musu weri krosi di bun èn di fiti; krosi di e sori taki wi „no de wan pisi fu grontapu”.—Yoh. 15:19.
7 Meki wi du ala san wi man na a „Fayafaya Kownukondre preikiman” Distrikt Kongres fu a yari disi, fu sori taki wi na „wan santa pipel gi Yehovah Gado”. A bun fasi fa wi e tyari wisrefi sa meki taki Yehovah kisi „prèise nanga grani nanga bigi nen”.—Deut. 26:19.
[Faki na tapu bladzijde 6]
Difrenti fasi fa wi kan gi glori na Yehovah:
■ Weri krosi na wan fasi di fiti wan futuboi fu Gado.
■ Luku bun nanga modo di e sori a yeye fu grontapu.
■ Sori taki yu e weri krosi di fiti èn taki yu e gebroiki koni te yu e du dati.