Aksi di opo kon
◼ Sortu krosi wi musu weri te wi e go na den presi di wi e gebroiki gi a diniwroko fu Yehovah?
Na heri grontapu, yu abi Kownukondre zaal, Kongreshal, Bethel-oso nanga bijkantoro, di meki spesrutu fu gebroiki na ini a diniwroko gi Yehovah. Den presi disi no abi tumusi furu pranpran, den krin, sani seti bun, èn na a fasi disi den e gi Gado glori. Disi de heri tra fasi leki den sani di wi e si nofo tron na ini a sistema fu Satan. A musu de krin fu si na den sma di e go luku den presi disi di wi e gebroiki na ini a diniwroko fu Yehovah, taki den na futuboi fu Yehovah èn taki den e du en wani.
Leki Kresten, wi e „buweisi taki wi na dinari fu Gado” na ini ala san wi e du, sosrefi na a fasi fa wi e weri krosi di fiti èn na a fasi fa wi e moi wisrefi (2 Kor. 6:3, 4). A no de fu taki dati wi musu tyari wisrefi tu na wan fasi di fiti. Ala ten a musu de so taki a fasi fa wi e weri krosi èn moi wisrefi e sori taki wi e tyari wisrefi na wan fasi di fiti èn na wan wartifasi soleki fa a fiti futuboi fu Yehovah Gado. Disi de spesrutu so te wi e go na a edekantoro na ini New York èn sosrefi na den tra bijkantoro di de na heri grontapu.
A buku Wi orga fu du a wani fu Yehovah e sori o prenspari a de taki wi krin na skin sei, taki wi weri krosi di fiti, èn taki wi e sorgu wi skin bun te wi e go na ini a preikiwroko èn te wi e go na den Kresten konmakandra. Na tapu bladzijde 138, paragraaf 3, a e taki: „Memre taki a nen Bethel wani taki ’Oso fu Gado’. Dati meki den krosi fu wi, a fasi fa wi e moi wisrefi, nanga a fasi fa wi e tyari wisrefi musu de a srefi leki te wi e go fu anbegi Gado na den konmakandra di wi e hori na ini a Kownukondre zaal.” Kownukondre preikiman di e libi krosibei fu Bethel èn sosrefi den wan di e libi fara fu Bethel musu hori densrefi na den hei markitiki disi te den e go na Bethel. Na so den e sori na wan fasi di fiti taki den de nanga tangi gi den sani fu Yehovah èn taki den abi lespeki gi dati.—Ps. 29:2.
Den krosi fu wi musu sori taki wi na sma di „e anbegi Gado” (1 Tim. 2:10). Te wi e weri krosi èn moi wisrefi na wan fasi di fiti, dan dati kan yepi trawan fu kisi lespeki gi na anbegi fu Yehovah. Ma wi kon si taki te wan tu brada nanga sisa e go na den presi disi, den e weri krosi leki den e go koiri, den e weri syabisyabi krosi, èn den e weri krosi pe afu fu den skin de na doro. A no fiti kwetikweti te wan Kresten e weri den sortu krosi disi. Ini a tori disi, èn sosrefi na ini ala tra afersi fu a fasi fa wi leki Kresten e libi, wi wani hori wisrefi na den hei markitiki di e meki a pipel fu Gado de heri tra fasi leki grontapusma. Wi wani du ala sani fu gi Gado glori.—Rom. 12:2; 1 Kor. 10:31.
Sobun, a bun fu hori den sani disi na prakseri te wi e go na a edekantoro nanga a bijkantoro na ini New York noso na wan tra bijkantoro. Wi kan du dati tu te sma gi wi wan kari fu go na den presi dati, noso te wi de nanga fakansi èn wi seti sani fu go luku den presi disi. Te wi e go na den presi disi, dan wi musu aksi wisrefi: „A fasi fa mi e weri krosi èn e moi misrefi e sori taki mi e lespeki trawan, den krosi krin, èn den krosi fiti gi a presi pe mi e go? Den krosi di mi e weri e sori tu sortu Gado mi e anbegi? A de so taki a fasi fa mi weri krosi ben o meki taki sma poti prakseri na mi nomo, noso taki den o naki futu?’ Meki a de so, taki a fasi wi e weri krosi èn e moi wisrefi ala ten e „moi a leri fu Gado, wi Frulusuman, na ini ala sani”!—Tit. 2:10.