Aksi di opo kon

◼ Fa wi musu weri krosi èn moi wisrefi te wi e go na Bethel?

Te wi e go na Bethel fu go luku a presi noso fu miti memre fu a Bethelfamiri, dan „a fasi fa wi e weri krosi, a fasi fa wi e moi wisrefi èn a fasi fa wi e tyari wisrefi musu de a srefi leki san den e fruwakti fu wi te wi e go na den konmakandra fu anbegi na a Kownukondre zaal” (om 132). Ma te son brada nanga sisa e go na a bijkantoro, dan wi si taki den e weri krosi leki na koiri den e go koiri. Den sortu krosi disi no fiti te wi e go na Bethel. Wi musu moi wisrefi èn weri krosi na wan fasi di de wan bun eksempre gi trawan èn na wan fasi di fiti a wartifasi fu futuboi fu Yehovah Gado.—1 Tim. 2:9, 10.

Disi de prenspari srefisrefi te wi e go na Bethel, fu di furu sma di no de Kotoigi e poti prakseri na den sma di e kon na den presi dati. A fasi fa den sma disi o denki fu a pipel fu Gado èn fu na organisâsi fu en, abi fu du nanga san den sma disi e si. A ben o bun efu wi e taki nanga den sma di e studeri Bijbel èn tra sma di wani fisiti Bethel, fu memre den taki den musu weri krosi èn moi densrefi na wan fasi di fiti. A Bethelfamiri sa warderi en efu yu e du dati.

Wi musu luku bun leki Kresten dinari, taki a fasi fa wi e weri krosi noso e moi wisrefi no musu meki sma naki futu (2 Kor. 6:3, 4). Na presi fu dati, meki a de so taki a bun fasi fa wi e tyari wisrefi ala ten „e meki a leri fu wi Frulusuman, Gado, kon moi na ini ala sani”.—Tit. 2:10.