Aksi boksu

● Fu san-ede wi musu poti spesrutu prakseri tapu wi krosi nanga na fasi fu sorgu fu wi srefi na dorosei te wi e tyari wan fisiti go na a Bethel-oso na ini wi kondre, a ede-kantoro na ini Brooklyn ofu wan bijkantoro na ini wan tra kondre?

Den e fruwakti fu kresten taki den e kibri wan yoisti maniri. Wi krosi nanga wi fasi fu sorgu wi srefi na dorosei musu sori ala ten a srefi maniri nanga wartifasi di e fiti na den dienstknekti fu Yehovah Gado. Disi e teri spesrutu te wi e fisiti a Bethel-oso na ini wi eigi kondre, a ede-kantoro na ini Brooklyn ofu wan bijkantoro na ini wan tra kondre. Te wi e taki fu a prenspari fasi fu krosi nanga a fasi fu sorgu wi srefi na dorosei di fiti; dan a buku Georganiseerd om onze bediening te volbrengen e taki fu a fanowdu fu de krin na skinfasi èn fu de bescheide nanga wi krosi nanga na fasi fu sorgu wi srefi na dorosei te wi e teki prati na a preikiwroko èn e fisiti kresten konmakandra. Morofara na tapu blz. 132, na ini par. 2 tanapu: „A srefi fasi a de tu te wi e tyari wan fisiti go na a Bethel-oso na ini Brooklyn ofu wan fu den tra bijkantoro fu a Genootschap. Memre taki a nen Bethel wani taki „Oso fu Gado”, so bun wi krosi, wi fasi fu sorgu wi srefi na dorosei èn wi fasi fu tyari wi srefi musu de a srefi leki san den e fruwakti fu wi te wi e fisiti konmakandra fu anbegi na ini a Kownukondrezaal.”

Na apostel Paulus ben taki taki wi de ‘wan kino-prei gi a grontapu èn gi engel èn gi libisma’ (1 Kor. 4:9). Fu dati-ede wi fasi fu sorgu unu srefi na dorosei musu abi positief krakti tapu a fasi fa trawan e si a tru anbegi fu Yehovah. Ma a de krin fu si taki son brada nanga sisa abi a firi fu weri den krosi na wan mi no ke fasi te den e fisiti den bijkantoro fu a Genootschap. Den sortu krosi disi no fiti te wi e fisiti den seti fu a bijkantoro. Na ini a afersi disi wi wani hori, neleki na ini ala tra pisi fu wi kresten libifasi, den srefi hei markitiki di e meki Gado pipri de tra fasi leki a grontapu, fu di wi e du ala sani fu Gado kisi glori (Rom. 12:2; 1 Kor. 10:31). A bun tu fu poti na a prakseri fu den beibristukaman fu wi nanga trawan di fu a fosi tron o tyari wan fisiti go na a Bethel-oso na ini wi eigi kondre ofu wan tra bijkantoro fu a Genootschap, taki a de prenspari fu poti prakseri na tapu den krosi nanga wan fasi fu sorgu unu srefi na dorosei di fiti.

Sobun, efu yu wani go fisiti den seti fu na Genootschap, aksi yu srefi dan: ’Mi krosi nanga a fasi fu sorgu mi srefi na dorosei de bescheide? (Mika 6:8) Den e trowe wan bun leti tapu a Gado di mi e anbegi? Mi ben sa puru tra sma prakseri ofu tanteri den nanga a fasi fa mi sorgu mi srefi na dorosei? Mi e gi trawan a yoisti eksenpre di kande fu a fositron e tyari wan fisiti?’ Meki alaten, nanga yepi fu wi krosi èn wi fasi fu sorgu unu srefi na dorosei, wi moi, „a leri fu wi Frulusuman, Gado ini ala sani”. —Tit. 2:10.