„Unu musu bradi un ati”
1. Sortu frantwortu ibriwan fu wi abi?
1 Leki Kresten brada nanga sisa na heri grontapu, ibriwan fu wi abi a frantwortu fu sori lobi na ini a gemeente (1 Petr. 1:22; 2:17). Wi kan kisi a lobi disi te wi e ’bradi wi ati’ fu abi tranga lobi gi makandra (2 Kor. 6:12, 13). Fu san ede a de prenspari fu kon sabi wi brada nanga wi sisa bun?
2. Fu san ede a de prenspari fu kon tron mati nanga wi brada nanga sisa?
2 Wi e tron moro bun mati: Te wi e kon sabi den brada nanga sisa fu wi moro bun, dan wi e kon kisi moro warderi gi a bribi fu den, gi a fasi fa den e horidoro, èn gi den tra moi fasi fu den. Den fowtu di den e meki no prenspari gi wi moro, èn wi matifasi nanga den e kon moro tranga. Efu wi sabi makandra moro bun, dan wi o man gi makandra deki-ati èn wi o man trowstu makandra moro bun (1 Tes. 5:11). Wi kan de sma di e ’gi makandra krakti’ fu kakafutu gi a takru grontapu fu Satan di kan pori wi (Kol. 4:11). Spesrutu fu di wi e libi na ini den muilek lasti dei disi di lai nanga problema, meki wi de nanga tangi trutru taki wi abi bun mati na mindri a pipel fu Yehovah!—Odo 18:24.
3. Fa wi kan gi trawan krakti?
3 Te wi e kisi hebi tesi, dan bun mati kan gi wi krakti nanga trowstu trutru (Odo 17:17). Wan Kresten di ben e firi leki a no warti noti, ben taki: „Mi ben abi mati di ben e prèise mi fu den bun sani di mi ben e du, bika den ben wani yepi mi fu basi den fowtu denki di mi ben abi.” Den sortu mati disi na wan blesi fu Yehovah.—Odo 27:9.
4. Fa wi kan kon sabi trawan na ini a gemeente moro bun?
4 Meki muiti fu kon sabi trawan: Fa wi kan bradi wi ati fu sori lobi gi wi brada nanga sisa? Boiti taki wi e taki trawan odi na den Kresten konmakandra, wi kan meki muiti fu taki nanga den fu sani di bun. Sori taki yu wani sabi den moro bun, sondro taki yu e bumui na ini den libi (Fil. 2:4; 1 Petr. 4:15). Wan tra fasi fa wi kan kon sabi trawan moro bun, na fu gi den wan kari fu kon nyan na wi oso (Luk. 14:12-14). Noso, kande wi kan seti sani fu wroko makandra nanga den na ini a preikiwroko (Luk. 10:1). Te wi e teki fesi fu kon leri sabi wi brada nanga sisa moro bun, dan wi e meki a wánfasi na ini a gemeente gro.—Kol. 3:14.
5. San na wan fasi fa wi kan kon kisi moro mati?
5 A de so taki wi e suku fu de bun mati soso nanga den wan di abi a srefi yari leki wi, noso nanga den wan di abi den srefi marki leki wi? Wi no musu meki den sortu sani disi tapu wi fu kisi moro mati na ini a gemeente. David nanga Yonatan èn Rut nanga Naomi sosrefi, ben kon kisi wan tranga banti nanga makandra, aladi den no ben abi a srefi yari èn den no ben kweki na a srefi fasi (Rut 4:15; 1 Sam. 18:1). Yu kan du muiti fu kisi moro mati? Te yu e du dati, dan yu kan kisi blesi di yu no ben fruwakti.
6. Sortu wini a kan abi gi wi te wi e bradi wi ati fu sori moro lobi gi wi brada nanga sisa?
6 Te wi e bradi wi ati fu sori lobi gi trawan, dan wi e gi makandra krakti èn wi e meki taki a vrede na ini a gemeente e gro. Moro fara, Yehovah srefi e blesi wi te wi e sori lobi gi wi brada nanga sisa (Ps. 41:1, 2; Hebr. 6:10). Fu san ede yu no e poti en leki marki gi yusrefi fu kon sabi so furu brada nanga sisa leki yu man?