A Dinariskoro—Wan bigi doro di opo gi den wan di wani du moro
1 Nanga yepi fu a profeiti Yeremia, Yehovah ben taki na fesi: ’Mi sa meki skapuman opo kon na mindri a pipel fu mi, di sa tiri den trutru; èn den no sa frede moro, èn nowan sani sa meki den beifi, èn nowan fu den sa mankeri’ (Yer. 23:4). Na ini a ten disi so wan wroko e du na mindri sma fu ala nâsi. Dusundusun gemeente owruman e du a wroko disi. Boiti dati, yu abi yongu man di furu leki dowdropu, di ben de klariklari fu du a diniwroko fu Yehovah (Ps. 110:3). Fu tru, den brada disi na wan blesi gi den gemeente fu a pipel fu Gado! A wroko fu tyari sma kon na wan na ini na anbegi fu Gado, e go doro. Fu dati ede meki brada de fanowdu ete di man tyari frantwortu èn di de klariklari fu dini den brada nanga sisa fu den.
2 A Dinariskoro na wan moi seti pe owruman nanga dinari ini a diniwroko di no trow, e leri fa fu tyari moro frantwortu. Moro leki 22.000 studenti fu sowan 140 kondre go na a skoro disi kaba. A skoro disi hori sowan 999 leisi sensi a bigin na ini 1987. Gi den brada disi, a skoro ben de neleki ’wan bigi doro di opo gi den fu kan du furu wroko’.—1 Kor. 16:9.
3 A marki fu a skoro: A marki fu a Dinariskoro na fu gi leri na lepi brada, so taki den kan teki frantwortu na den tapu awinsi pe dati de fanowdu na ini na organisâsi. A skoro e meki taki den kan teki fesi moro bun na ini a preikiwroko, den kan tiri na ipi moro bun, èn den kan gi leri moro bun na ini a gemeente. Baka te den klari a skoro nanga bun bakapisi, dan son studenti e kisi a wroko fu dini leki spesrutu pionier, noso leki opziener di e reis na ini den eigi kondre, noso na ini wan tra kondre. Trawan e kisi a wroko fu dini na ini a gemeente pe den komoto, noso fu dini na ini kontren di a bijkantoro musu luku èn pe moro yepi de fanowdu.
4 Na ini den aiti wiki fu a skoro, den studenti e studeri Bijbel fayafaya. Den e taki finifini fu someni difrenti Bijbel leri. Den e leri fa fu luku na ipi èn den e leri fa fu lusu den problema di e opo kon na ini a libi fu wan Kresten. Den studenti e leri sosrefi fa Bijbel e sori taki den musu teki fesi, fa den musu handri nanga krutu afersi, èn fa den musu orga sani. Den e kisi spesrutu leri fa fu hori lezing èn den e kisi yepi fu gro moro esi na yeye fasi.
5 Sortu markitiki wan sma musu doro fu kan go na a skoro: A no de fu taki dati spesrutu markitiki de di wan brada musu doro efu a wani go na a skoro. Den wan di e gi den nen fu go na a skoro musu de brada di e dini tu yari kaba leki owruman, noso dinari ini a diniwroko. Den alamala musu de sma di no trow. Den no musu yongu moro leki 23 yari èn den no musu owru moro leki 50 yari. Den wan di e gi den nen musu man leisi, skrifi, èn taki a tongo di den sa taki na a skoro. Den musu abi wan bun gosontu, èn den no musu abi spesrutu datra yepi, noso spesrutu nyanyan fanowdu. Den brada di e kisi na okasi moro makriki na den wan di e dini leki gewoon pionier.
6 Den wan di e gi den nen musu de klariklari fu dini awinsi pe den de fanowdu, èn den musu man du dati tu. Disi wani taki dati den musu abi a srefi denki leki a profeiti Yesaya, di ben de fayafaya fu du wan spesrutu wroko. A ben taki: „Dya mi de! Seni mi” (Yes. 6:8). Na ini en heri libi a ben sori sakafasi tu. Den wan di wani go na a Dinariskoro musu du dati fu di den lobi den brada nanga den sisa fu den èn den musu abi a tranga firi fu wani dini den. Den no musu go na a skoro fu di den wani kisi hei posisi. Baka te den wan di klari a skoro kisi so wan bun leri, dan den musu gebroiki den sani di den leri, so taki trawan kan kisi wini fu dati.—Luk. 12:48.
7 Den winimarki: Na ini aiti wiki, den wan di klari a skoro leri bun furu sani, fu di den ’kisi krakti nanga yepi fu den wortu fu bribi di de leki nyanyan, èn nanga yepi fu den moi leri di den kisi’ (1 Tim. 4:6). Disi sa meki taki den o man yepi trawan na ini a gemeente noso na ini a kring fu den, èn den sa man gi den wan disi deki-ati tu. Na furu presi pe den wan di klari a Dinariskoro e dini, den ben man yepi meki a preikiwroko go na fesi; na tra presi den preikiman kisi deki-ati fu go na ini a pionierwroko, spesrutu den yonguwan kisi a deki-ati dati. Sani ben seti tu fu poti moro prakseri na nyun sma di e moksi densrefi nanga a pipel fu Gado.
8 Yu na wan owruman noso wan dinari ini a diniwroko di no trow èn di no yongu moro leki 23 yari èn di no pasa 50 yari ete? Fu san ede yu no e prakseri fu gi yu nen fu go na a Dinariskoro? Yu na wan yongu brada di wani du moro na ini a diniwroko fu Yehovah te yu kon moro owru? Fu san ede yu no e libi wan libi sondro pranpran èn sondro sani di e puru yu prakseri, so taki yu kan kisi na okasi fu ’pasa go na ini a bigi doro di opo fu kan du furu wroko’? Disi kan meki taki yu kisi furu prisiri. Fu tru, a Dinariskoro sori fu de wan blesi gi den wan di klari a skoro, èn sosrefi gi den gemeente fu a pipel fu Gado na heri grontapu.
[Faki na tapu bladzijde 3]
Fa den kisi wini fu a skoro
„A skoro meki taki mi kon moro bun na ini mi diniwroko èn mi kisi a koni fu tiri na ipi moro bun nanga yepi fu den Buku fu Bijbel.”
„A skoro gi mi moro deki-ati fu tyari den difrenti frantwortu di mi abi na ini a gemeente.”
„A kenki pikinmoro ibri pisi fu mi libi, èn a kenki a fasi fa mi e denki fu den seti fu Gado èn fu na organisâsi fu en.”
„A leri di mi kisi meki taki mi kon frustan fu san ede a bun fu de klariklari fu dini awinsi pe dati de fanowdu.”