Dinari ini a diniwroko e du wroko di prenspari

NA INI wan brifi di na apostel Paulus ben skrifi gi a gemeente na Filipi, a taki: „Mi, Paulus, de nanga Timoteyus èn wi de srafu fu Krestes Yesus. Mi e skrifi ala den santawan di de bakaman fu Krestes Yesus èn di de na Filipi, makandra nanga den brada di e teki fesi na ini a gemeente nanga den dinari ini a diniwroko” (Fil. 1:1). Luku taki na ini na odi fu en Paulus taki tu fu dinari ini a diniwroko. A de krin taki na ini a ten dati den man disi ben abi a prenspari frantwortu fu yepi den owruman na ini a gemeente. Na so a de tu na ini a ten disi. Dinari ini a diniwroko e yepi den owruman na difrenti fasi èn den e yepi fu meki sani waka bun na ini a gemeente.

² Yu sabi den dinari ini a diniwroko fu yu gemeente? Yu sabi san na den wroko di den e du di e tyari wini kon gi yu nanga den tra brada nanga sisa? Yehovah e warderi a muiti di den brada disi e du. Paulus e taki: „Den man di e du a wroko fu den na wan bun fasi, e meki taki den kisi wan bun nen na trawan èn den man taki fri fu a bribi di abi fu du nanga Krestes Yesus.”​—1 Tim. 3:13.

BIJBEL E SORI FA WAN BRADA MUSU TYARI ENSREFI FU KAN TRON WAN DINARI INI A DINIWROKO

³ Dinari ini a diniwroko musu de Kresten di e libi wan krin libi, den musu man tyari frantwortu èn den musu du den wroko bun. Disi e kon na krin te wi e luku san Paulus ben taki na ini a brifi di a ben skrifi gi Timoteyus. Na ini a brifi a fruteri fa wan brada musu tyari ensrefi efu a wani tron wan dinari ini a diniwroko. A ben taki: „Dinari ini a diniwroko musu de seryusu tu. Den no musu hoigri. Den no musu lobi dringi tumusi furu win. Den no musu gridi fu feni wini na wan fasi di no fiti. Nanga wan krin konsensi den musu tan horibaka gi a Kresten bribi di de wan santa kibritori fu Gado. Sosrefi, luku fosi efu den man disi bun nofo fu du a wroko. Efu nowan fowtu de fu feni na den tapu, dan meki den tron dinari. Dinari ini a diniwroko musu de masra fu wán wefi nomo. Den musu tiri den pikin nanga na osofamiri fu den na wan bun fasi” (1 Tim. 3:8-10, 12). Te den brada di poti leki dinari ini a diniwroko e tyari densrefi soleki fa Bijbel e taki, dan dati e meki taki a gemeente no kisi porinen, fu di den wan di abi frantwortu na ini a gemeente e tyari densrefi bun.

⁴ Dinari ini a diniwroko e preiki ibri mun, awinsi den na yongusma noso bigisma. Neleki Yesus den e du a preikiwroko fayafaya. Na a fasi disi den e sori tu taki den de leki Yehovah di wani taki ala sma kisi frulusu.​—Yes. 9:7.

⁵ Dinari ini a diniwroko musu de wan eksempre tu na ini a fasi fa den e weri krosi, a fasi fa den e moi densrefi, a fasi fa den e taki, a fasi fa den e denki èn a fasi fa den e tyari densrefi. Den brada disi de nanga krin frustan èn dati meki trawan e lespeki den. Boiti dati, a matifasi di den abi nanga Yehovah nanga den grani di den abi na ini a gemeente prenspari gi den.​—Tit. 2:2, 6-8.

⁶ Den brada disi sori taki den „bun nofo fu du a wroko”. Srefi fosi den tron dinari ini a diniwroko, den ben sori kaba taki den na sma di e du den wroko nanga den heri ati. Den sori taki den e poti Kownukondre afersi na a fosi presi na ini den libi èn taki den de klariklari fu du iniwan wroko di den kisi. A no de fu taki dati trawan na ini a gemeente kan teki na eksempre fu den.​—1 Tim. 3:10.

SORTU WROKO DEN E DU?

⁷ Dinari ini a diniwroko e du difrenti bun wroko fu horibaka gi den brada nanga den sisa fu den. Disi e meki taki den owruman abi nofo ten fu poti prakseri na a frantwortu di den abi fu gi leri èn fu sorgu gi a gemeente. Te den owruman e gi den dinari wroko fu du, dan den e hori na prakseri san ibriwan fu den brada disi man du èn san a gemeente abi fanowdu.

⁸ Meki wi go luku san na wan tu fu den wroko di den brada disi e du. Wán fu den kan kisi a frantwortu fu sorgu gi den buku di wi abi fanowdu gi wisrefi èn gi a preikiwroko. Trawan e kisi a wroko fu luku den monitori noso a gebied fu a gemeente. Den kan kisi a frantwortu sosrefi fu seti den mikrofon, fu sorgu gi poku, fu de zaal-waktiman èn fu yepi den owruman na tra fasi. Furu wroko de fu du fu sorgu gi a Kownukondre zaal èn fu hori en krin. Dati meki furu tron den owruman e aksi den dinari fu yepi tyari den frantwortu dati.

⁹ Na ini son gemeente pe yu abi nofo dinari ini a diniwroko, ibriwan fu den kan du wan fu den wroko disi. Na tra presi a kan de so taki wán dinari e du difrenti wroko. Son leisi a bun fu poti moro leki wán brada fu du wan spesrutu wroko. Efu nofo dinari no de fu sorgu gi sonwan fu den frantwortu disi, dan den owruman kan poti tra dopu brada di de bun eksempre, fu den wroko dati. Na so fasi den e kisi ondrofeni di kan yepi den bakaten fu tron dinari ini a diniwroko. Efu brada no de, dan den owruman kan aksi son sisa di de wan bun eksempre, fu yepi nanga son wroko aladi den sisa disi no kan tron dinari. Wan sma na wan bun eksempre te a e tyari ensrefi bun èn te a e anbegi Gado fayafaya. Boiti dati, a e go na den konmakandra doronomo, a e go na ini preikiwroko èn en osofamiri-libi bun. Den felem di a e luku, den poku di a e arki, den krosi di a e weri, a fasi fa a e moi ensrefi, nanga tra sani di a e du e sori tu taki a de wan bun eksempre.

¹⁰ Na ini gemeente pe nofo owruman no de, dan lepi dinari kan kisi a frantwortu fu luku den aksi nanga wan sma di wani dopu. Den aksi disi abi fu du nanga prenspari leri fu Bijbel. Den skrifi na ini a buku disi na „Tra prenspari sani”, „Pisi 1​—Den sani di wi leki Kresten e bribi”. Fu di „Pisi 2​—A fasi fa Kresten musu libi” abi fu du nanga sani di wan sma e syen fu fruteri trawan kande, meki wan owruman musu luku a pisi disi nanga a sma.

¹¹ Efu den owruman si taki a de fanowdu, dan ten na ten den kan kenki den frantwortu fu den dinari. Ma na a tra sei, a bun te den e meki den brada du a srefi wroko wan heri pisi ten, so taki den kan sabi a wroko bun.

¹² A kan de fanowdu taki den owruman gi dinari ini a diniwroko tra prenspari frantwortu sosrefi. Ma dan a musu de krin gi ala sma taki den dinari disi „go na fesi” (1 Tim. 4:15). Efu nofo owruman no de, dan wan dinari kan kisi a frantwortu fu yepi wan grupu-opziener. Son leisi a kan kisi a frantwortu fu tron wan grupu-dinari di e wroko ondro a tiri fu den owruman. Den kan kisi a frantwortu sosrefi fu hori prati na a Kresten libi nanga preikiwroko konmakandra, fu hori a Gemeente Bijbelstudie, èn fu hori Bijbel-lezing. Dinari ini a diniwroko kan kisi tra grani tu te dati de fanowdu èn efu den bun nofo fu du en (1 Petr. 4:10). Den dinari musu de klariklari fu yepi den owruman.

¹³ Aladi a wroko di den dinari e du no de a srefi leki a wroko fu den owruman, toku a wroko fu den dinari na santa diniwroko di den e du gi Gado, wroko di de prenspari tu fu meki a gemeente drai bun. Te fu kaba, efu den dinari e du den wroko bun èn efu den bun nofo fu de skapuman èn fu gi leri, dan den owruman kan aksi efu den brada dati kan tron owruman tu.

¹⁴ Efu yu na wan brada di yongu noso di no dopu so langa ete, dan yu e du muiti fu tron wan dinari ini a diniwroko? (1 Tim. 3:1) Fu di someni sma e kon na ini a tru anbegi ibri yari, meki lepi brada de fanowdu fu tyari frantwortu na ini a gemeente. Efu yu wani kisi moro frantwortu, dan yu musu wani yepi trawan. Wan fasi fa yu kan du dati, na te yu e denki dipi fu a moi eksempre fu Yesus (Mat. 20:28; Yoh. 4:6, 7; 13:4, 5). Te yu e si omeni prisiri a e gi te yu e gi trawan sani, dan yu o wani du moro fu yepi trawan (Tori 20:35). Dati meki a bun te yu de klariklari fu yepi sma, fu yepi sorgu gi a Kownukondre zaal noso fu yepi nanga wan prati na a Kresten libi nanga preikiwroko konmakandra te wan tra sma no man hori en. Efu yu wani du moro, dan yu musu studeri doronomo, fu di dati o yepi yu fu kon abi wan tranga bribi nanga tra moi fasi (Ps. 1:1, 2; Gal. 5:22, 23). Boiti dati, wan brada di wani tron dinari ini a diniwroko musu sori taki a man tyari frantwortu. Te a kisi wan wroko fu du na ini a gemeente, dan a musu du en bun.​—1 Kor. 4:2.

¹⁵ Den dinari ini a diniwroko e poti na wroko nanga yepi fu santa yeye èn a gemeente e kisi wini fu dati. Ala sma na ini a gemeente kan sori warderi gi a tranga wroko fu den dinari te den e wroko makandra nanga den. Na a fasi disi, a gemeente e sori warderi gi den sani di Yehovah seti fu meki sani waka bun na ini en osofamiri fu anbegiman.​—Gal. 6:10.