Dinari na ini na diniwroko e kibri wan boen nen!
„Den wan di e dini na tapoe wan toemsi moi fasi e kisi gi densrefi wan boen nen èn bigi fri foe taki sondro frede na ini a bribi di abi foe doe nanga Kristus Jezus.” — 1 TIMÓTEUS 3:13.
1. Wan man di den poti leki dinari na ini na diniwroko moe feti na baka sortoe marki, èn san trawan na ini na gemeente sa wani foe doe?
MAN di e doe dienst now leki dinari a ini na diniwroko ’den ben tesi fosi foe si efoe den ben boen nofo foe wroko’ (1 Timóteus 3:10). Ma na aanstelling foe den no ben de tapoe ensrefi wan marki. Na marki di den e feti na en baka de foe go a fesi foe kisi gi densrefi wan boen nen foe di den e doe den wroko na tapoe „wan toemsi moi fasi” (1 Timóteus 3:13). Ibri memre foe na wanfasi kristen gemeente ben sa wani hori baka gi den foe doro a marki dati.
2. Fa den sani di dinari na ini na diniwroko e doe abi krakti na tapoe den memre foe na gemeente?
2 Na apostel Paulus ben sori dati a de foe a boen foe ala memre foe na jeje skin foe Kristus te den e wroko nanga makandra èn e broko ede foe makandra (1 Korinte 12:12-31). Na so ooktoe a e tjari gi ibri memre foe na gemeente wini kon te dinari na ini a diniwroko e doe a wroko di Gado gi den tapoe „wan toemsi moifasi”. Ma te na a tra sé dinari na ini a diniwroko abi foe doe nanga problema di e tapoe den foe doe den wroko foe den tapoe wan joisti fasi dan disi kan druk hebi tapoe ala memre foe na gemeente.
3. (a) Sortoe problema ala sma di de wan pisi foe Jehovah pipel abi gelijk? (b) San wan ondrosoekoe di no ben psa so langa ete e tjari boen kon a fesi?
3 Ala sma di de wan pisi foe Jehovah pipel abi foe feti na srefi stré, „no wan stré tegen broedoe nanga meti, ma tegen den godelowsoe krakti na ini den hemel kontren” (Efese 6:12). Tapoe disi e kon ete, dati ala den dienstknegti foe Jehovah moe stré tegen den égi onvolmaaktifasi èn sondoe firi. Tokoe a de so dati dinari na ini na diniwroko leki groepoe na wan moro tranga fasi ben abi foe doe nanga bepaalde problema leki tra groepoe a mindri Jehovah Kotoigi. Disi e kon boen a fesi foe wan ondrosoekoe di no so langa psa ben doe na ini wán west-Europeeskondre na ini moro leki 320 gemeente nanga 1360 dinari na ini na diniwroko.
De joe wawan sondroe foe trow
4. Fa dinari na ini na diniwroko di no trow ete moe si a fasi dati den no trow, èn sortoe dek’ati trawan kan gi den?
4 Foe den dinari na ini na diniwroko di den ben aksi wantoe sani dan pikinso moro leki 10 procent no trow ete, soboen den de fri foe bepaalde frantwortoe di den pikinmoro 90 procent trowman moe doe. Ma brada di no trow moe loekoe boen dati den no gebroiki na fri disi foe feti soso na baka égi prisiri soleki ontspanning ofoe prisiri demakandra psa marki. Ooktoe den no moe gl pasi dati na natuurlek lostoe foe trow poti ala tra sani na ini a libi a baka (Mattéus 6:32). Ooktoe den no moe meki druk foe na sé foe mati di trow tjari den so fara foe go es’esi na ini wan trow ofoe foe trow na wan onverstandikifasi. Èn seker a sa de so dati kristen di e broko ede gi makandra sa respeki na fasi foe no-trow foe kompebribiman di no trow èn den sa gi den dek’ati foe gebroiki na moro bigi fri foe den foe gi moro ten na theokratis belang, foe di den e teki kande na tapoe den na foeroetendienst.
5. Sortoe moro bigi kefar de gi dinari na ini na diniwroko di trow leki gi den di no trow?
5 Leki fa na ondrosoekoe di wi kari dja na fesi e taki dan sowan 62 procent foe den dinari na ini na diniwroko abi wan osofamiri nanga wan ofoe moro pikin. Gi den na kefar dati a ati foe den „kon hebi nanga den sorgoe foe na libi” de moro bigi leki den brada di no trow. (Lukas 21:34-36). Di Paulus foe dat’ede ben rikomanderi na mi-no-trowfasi, a ben taki: „Mi wani dati joe de fri foe sorgoe. A man di no trow e broko-ede nanga den sani foe Masra fa a kan kisi na boen-ati foe Masra. Ma na man di trow e broko ede nanga den sani foe na grontapoe fa a kan kisi na boen-ati foe en oema, èn a prati. Ooktoe a sma di trow en njoen wenkefasi, e doe boen, ma a sma di no trow en sa doe moro boen.” — 1 Korinte 7:32-38.
6. San trow dinari na ini na diniwroko moe doe, èn soema kan gi kande boen rai?
6 Ala di Jehovah pipel no e bribi dati ’trow e sroto na ini hemel’, tokoe ben sabi dati hemel koni de fanowdoe foe loesoe trow problema (Psalm 19:7; Odo 3:5, 6). Foe dat’ede meki dinari ini na diniwroko di trow moe waka so soifri leki a kan na baka a rai foe a Wortoe foe Gado. Den moe feti na baka wan joisti balansi na ini a doe foe osofamiri frantwortoe èn tokoe noiti gebroiki disi leki wan pardon foe libi den theokratis wroko foe den na ini a gemeente na wan sé. Foe doe disi dan wan boen schema di wan sma go prakseri boen doro de fanowdoe. Moro owroe man nanga oema di trow di abi moro ondrofeni, kan gi kande boen rai na jongoewan na ini disi te den e aksi den foe disi.
7. (a) Fa na osofamiri foe wan dinari na ini na diniwroko di trow kan abi krakti na tapoe en moeiti nanga jeje go na fesi? (b) San wan dinari na ini na diniwroko di wani foe trow, kan hori boen na ini prakseri?
7 Gi wan dinari na ini na diniwroko di trow a de wan bigi jepi te en osofamiri e hori baka gi en. A wan sani di de foe si dati osofamiriman di e aksi foeroe ten nanga prakseri psa marki ofoe na a abi foe sani na skinfasi e aksi foeroe, kan de wan skotoe gi en jeje go a fesi. Ma a de wan blesi te en heri osofamiri e hori baka gi en moeiti foe „dini tapoe wan toemsi moi fasi” (1 Timóteus 3:13). A de foe dat’ede toemsi prenspari dati wan dinari na ini na diniwroko di wani trow, bifosi en firi tai na wan trowpatna foe a ten di e kon, e proeberi foe si ofoe a de na joisti sma di sa meki den go na fesi na jejefasi!
Wroko èn lobi foe goedoe
8. (a) Son dinari na ini na diniwroko de opo-opo gi sortoe kefar na ini a tori foe grontapoewroko? (b) Te wan sma go denki dipi foe sortoe tekst a kan kisi jepi foe feti tége a lobi foe goedoe?
8 Aiti toe den tin dinari na ini a diniwroko di den ben aksi sani foe kon sabi, ben de moro jongoe leki siksi tenti jari. Ini moro foeroe geval den e doe soboen grontapoe wroko foe sorgoe gi densrefi èn gi den osofamiri foe den. Pikinmoro féfi foe ibri tin toe den de a mindri twenti nanga fotenti jari owroe — wan libimarki pe man na ini grontapoe moro foeroetron e abi wan faste wroko ofoe e go a fesi ini wan wroko èn e doe moeiti foe go a fesi èn foe kisi sékerfasi a monisé. Te joe de wan dinari na ini na diniwroko foe den jari dati, no loekoe psa noiti na kefar foe abi wan grontapoe fasi foe feti na baka goedoe di kan swaki joe na jejefasi. Hori moro foeroe na ini prakseri dati Paulus ben taki: „Efoe joe abi njanjan nanga wan libipe, dan dati moe de nofo gi oenoe” (1 Timóteus 6:8). Ooktoe Jezus ben gi toemsi moi rai di kan jepi wi alamala foe feti tége a lobi foe goedoe. Lési na rai dati gi joesrefi na ini Mattéus 6:19-34.
9. Ini akroederi nanga Matt. 16:26, dan san moro foeroe de gi jongoe dinari a pasi foe koni?
9 Spesroetoe oenoe, oen moro jongoe dinari na ini na diniwroko, loekoe pikinso na den man di nanga „sukses” e feti a baka wan wroko foe go a fesi na ini ofoe toe kisi goedoe ma di e poti Jehovah na dorosé foe den plan foe den. (Teki gersi nanga Odo 16:3; 19:21.) A ben sa de te joe loekoe en boen wan koni sani foe waka na baka na eksempre foe sma di no abi wan jejefasi, èn di e fetl na baka goedoe èn di sa dede na a ten foe na bigi benawtoe? (Mattéus 24:21). Sortoe dienstknegti foe Jehovah ben sa wani kenki nanga den? „Bika”, Jezus ben taki, „sortoe boen a sa abi gi wan sma efoe a wini na heri grontapoe, ma lasi en sili?” (Mattéus 16:26) A de séker na pasi foe koni foe bow nanga Jehovah organisaatsi wan boen èn séker tamara na presi foe bow nanga a grontapoe disi di e go dede, èn di didon na ini na makti foe Satan na wan sjatoe tamara di de toemsi onzeker. — 1 Johannes 5:19.
De getrow na Gado Kownoekondre
10. Sortoe sé na ini a tori foe politiek afersi na „kompani foe jongoeman” di e kon moro foeroe dé foe dé ben teki, makandra nanga dinari na ini na diniwroko?
10 Den ben taki na profétifasi foe Jehovah Messiaans kownoe: „A pipel foe joe sa pristeri ensrefi nanga en heri ati na tapoe a dé foe joe sroedatimakti. Na ini a moifasi foe a santafasi foe na bere foe na moesoedé, joe ben abi joe kompani foe jongoeman net leki dowdropoe” (Psalm 110:3). Na profétitori foe disi e kontroe foe sensi 1914, èn den sma di de na „kompani foe jongoeman” di dé foe dé e gro kon moro bigi e ferstan dati na ini na fosi presi den moe de getrow na Gado Kownoekondre èn na Jezus Kristus leki Kownoe. Aladi den man disi ben gi densrefi abra na Gado makandra nanga den dinari na ini na diniwroko, soboen na relatieffasi e saka densrefi na ondro politiek „hémakti”, den moe gi jesi „na Gado leki den rigeriman moro leki libisma” na ini ibri situwasi pe wan stré de (Romeini 13:1; Tori foe den Apostel 5:29). Soleki fa Jezus ben taki, dan en bakaman „no de wan pisi foe na grontapoe disi” (Johannes 15:19; 18:36). Den e tan de neutraal na ini politiek-afersi foe den naatsi, nanga a ferstan dati wan tra fasi foe libi ben sa meki den tron toriman foe a Kownoekondre foe Gado.
11. Den brada di ben kibri den kristen neutraliteit, kan abi na djaranti foe san?
11 Ma efoe dinari na ini a diniwroko ofoe trawan lasi now den wroko ofoe srefi den fri foe di den kibri den kristen neutraliteit? (Jesaja 2:2-4; Johannes 17:16). Na ini na geval dati den sabi dati den jeje brada nanga sisa foe den sa gi den ala jeje jepi di kan èn efoe a de fanowdoe ooktoe jepi na skinfasi. Disi de so foe di Jehovah pipel na wan lobifasi e broko ede gi makandra. — Teki gersi Johannes 13:34, 35; 1 Korinte 12:24, 25.
Na fanowdoe foe kisi moro ondrofeni
12. San a wani taki foe kisi wan toemsi boen nen?
12 Gemiddeld a di foe dri pisi foe den dinari na ini na diniwroko di den aksi sani foe kon sabi de moro mendri leki tin jari actief leki Jehovah Kotoigi. A no de foe taki dati den man disi ben teki na jepi nanga tiri foe den memre foe na gemeente di abi moro ondrofeni. Ma na ’kisi foe wan boen nen’ wani taki dati den e tan leri foe trawan èn e tan kisi ondrofeni. A wani taki ooktoe dati alaten nomo den e poti persoonlek marki a den fesi èn nanga heri konsensi e feti a baka foe doro den. Efoe foe dat’ede joe leki dinari na ini na diniwroko e angri fajafaja foe dini boen marki ofoe e feti a baka foe dini na ini na granifasi dati, dan joe ben poti wantoe persoonlek marki na joe fesi? Foe san-ede foe eksempre joe no ben sa teki na bosroiti foe poti wan datum pe joe ben lési na heri bijbel ofoe foe san-ede joe no ben sa teki na bosroiti foe de na ini a jepi pionierdienst na ini bepaalde moen?
13. Sortoe rai di ben gi a Timóteus ben sa de leki wini gi wan brda di nanga ala prisiri ben wani tron dinari na ini na diniwroko ofoe di e dini now na ini a fasi dati?
13 Efoe joe de jongoe na ini jari ofoe no abi foeroe ondroofeni, dan joe kan njan boen foe san tanapoe na ini 1 Timóteus 4:12-15. Ala di den wortoe disi ben skrifi gi na jongoe opziener Timóteus, dan foeroe foe san Paulus ben taki drape foe taki èn foe waka nanga libi, ben sa de leki wini gi ibri brada di nanga ala prisiri wani tron dinari na ini na diniwroko ofoe de dati kaba. Na apostel ben skrifi: „No meki no wan sma loekoe a tapoe joe jongoe jari. Ma presi foe dati tron wan eksempre gi den getrowwan na ini taki, na ini libi nanga waka, na ini lobi, na ini bribi, na ini krinlibi. Go doro te leki mi kon foe poti joesrefi na tapoe na lési, na fermane, na leri foe sma. No wisiwasi na presenti di de na ini joe, di joe ben kisi nanga jepi foe wan taki foe sani a fesi èn di na skin foe owroeman ben poti den anoe na tapoe joe. Go denki dipi foe den sani disi. Go krinkrin na ini den, sodati na go na fesi foe joe mag de foe si na ala sma na publiki.” Na sortoe sani joe moe wroko spesroetoe sodati „a go na fesi foe joe ala sma kan si na publiki?” Bepaal na ini begi, san joe moe doe èn doe en dan nanga jepi foe Jehovah jepi.
Kakafoetoe gi las’ati
14, 15. (a) Sortoe dek’ati foe bijbel de gi dinari na ini na diniwroko di abi foe doe nanga grani ofoe wan takroe gesontoe? (b) Fa den man disi kan gi tranga na tra sma na ini a gemeente?
14 Foeroe dinari na ini na diniwroko no abi foe doe nanga problema di de moro foeroe na mindri jongoe man. Den moe kakafoetoe gi grani ofoe wan takroe gesontoe, san kan tjari las’ati kon. Ma den di e tan tranga na jejefasi, kan kisi trowstoe foe den wortoe di e kon èn di Paulus ben skrifi gi salfoe kompe kristen: „Wi no e las’ati ma awinsi na sma di wi de na dorosé e kon moro mendri, na sma di wi de na inisé, séker dé foe dé e kon moro njoen. Bika aladi na benawtoe de foe wan sjatoe ten, èn lekti, ai tjari gi wi wan glori di moro nanga moro e pasa ala sani èn e tan tégo, aladi wi no poti ai na tapoe den sani di wan sma e si ma tapoe den sani di wan sma no e si. Bika den sani di wan sma e si, de foe wan pisten, ma den sani di wan sma no e si de foe tégo” (2 Korinte 4:16-18). Jehovah dienstknegti di abi wan grontapoe howpoe, abi ooktoe ferwakti di e gi dek’ati namkoe tégo libi tapoe wan paradijs grontapoe. — Lukas 23:43; Johannes 17:3.
15 Den dinari na ini na diniwroko di foe na takroe gesontoe ofoe na grani foe den no man foe doe someni leki trawan, abi soboen boen réde foe kibri wan prisiri, positief jejefesi. Nanga disi den e sori warderi gi na waarheid èn wan dipi bribi na ini sani di de foe tégo. Sowan toemsi moi jeje, di tai na wan sakafasi dienst, sa de leki wan bigi wini èn ooktoe dek’ati gi ibri sma na ini a gemeente.
16. Foe san-ede wan dinari na ini na diniwroko no moe lasi ati te den no poti en leki owroeman?
16 Efoe joe de dinari na ini a diniwroko, tan dan foe feti „baka a wroko foe wan opziener” foe di joe o meki joe leri-bekwaamheid èn jejefasi kon moro boen (1 Timóteus 3:1). Ma no las’ati te no so gaw den poti joe leki owroeman. Hori na ini prakseri dati joe leki dinari na ini na diniwroko di „e doe joe wroko tapoe wan toemsi boenfasi”, e dini boen marki èn de wan troetroe wini gi na gemeente. A de wan bigi grani foe doe dienst na ini sortoe hoedanigheid toe na ini Jehovah organisaatsi èn foe jepi kompe bribiman foe doe na komando foe na kownoekondre prékiwroko. — Mattéus 24:14; 28:19, 20.
Fa trawan kan gi jepi
17. Fa wan oema nanga den pikin kan jepi wan dinari na ini na diniwroko?
17 Te ala sma na ondro Jehovah pipel e ferstan sortoe marki dinari na ini na diniwroko e dini, dan den sa wani foe hori baka gi den moeiti foe den. A ben sa de foe eksempre moro makriki gi so wan man ’foe tan dini tapoe wan toemsi moi fasi’ efoe en oema nanga pikin de tevréde nanga den fanowdoe sani foe tan na libi èn no e angri foe foeroe luxe, sodati a ben sa moe doe ekstra grontapoe wroko. — 1 Timóteus 6:6-8.
18. (a) Fa owroeman kan jepi dinari na ini na diniwroko? (b) Foe san-ede wan boen kommunkatie a mindri owroeman nanga dinari na ini na diniwroko kan de toemsi prenspari?
18 Owroeman kan jepi dinari na ini na diniwroko foe di den e gi den ibri fanowdoe tiri nanga rai. Èn te den e go na fesi den moe prijse den opregti. Owroeman kan go makandra nanga dinari na ini na diniwroko na ini na velddienst, jepi den foe sreka lezing, èn prati nanga den na goedoe foe kristen ondrofeni. A de wan sani di de krin dati wawan lési sowan belangstelling nanga communicatie ben mankeri. Di den ben aksi wan dinari na ini na diniwroko foe san-ede a ben abi so wan lagi velddienstbericht, a ben taki gi na kringopziener: „Foe san-ede joe e aksi dati? Jari kaba a lagi, ma joe de na fosiwan di e taki wan sani foe en.” Owroeman di e gi dinari na ini a diniwroko lobi rai di e bow den bribi èn di e jepi den nanga pasensi nanga den problema foe den nofotron e abi na prisiri dati den e si boen bakapisi.
19. Fa ibri memre foe a gemeente kan jepi den dinari na ini na diniwroko foe hori wan toemsi boen nen?
19 Te joe loekoe en boen dan ibri memre foe a gemeente kan jepi dinari na ini na diniwroko foe kibri na toemsi boen nen foe den. Fa so? Foe wroko nanga den èn foe sori wan dipi warderi di joe e firi gi a wroko foe den. Net soleki ala pisi foe na libisma skin te joe taki en normaal e wroko makandra foe hori gesontoe na skinfasi, na so ala memre foe na gemeente moe wroko makandra foe djaranti na gemeente wan boen jeje gesontoe. (Teki gersi nanga 1 Korinte 12:24, 25.) Dinari na ini na diniwroko di e wroko tranga e doe wan pisi na ini disi foe di den e dini boen marki èn e hori wan toemsi moi nen. Meki den, èn ala Jehovah loyaal Kotoigi loekoe na wan tamara foe tégo kolokoe foe kon èn na ini wanfasi go doro foe prisiri na ati foe na „kolokoe Gado”. — 1 Timóteus 1:11; Odo 27:11.
Joe ben sa kan leg den sani di e kon now uit?
◻ Nanga sortoe problema dinari na ini a diniwroko abi foe doe?
◻ San den oema nanga pikin foe dinari na ini na diniwroko kan doe foe jepi den?
◻ San owroeman kan doe foe jepi dinari na ini na diniwroko?
◻ San ibri memre foe a gemeente kan doe oe jepi dinari na ini na diniwroko?
[Prenki na tapoe bladzijde 8]
Dinari na ini na diniwroko moe doe den frantwortoe na ini a wroko foe meki discipel èn inisé foe na gemeente
[Prenki na tapoe bladzijde 10]
Dinari na ini na diniwroko di de moro owroe kan doe foeroe foe jepi èn foe gi tranga na a gemeente
[Faki na tapu bladzijde 12]
6 Efoe wan man di de fri foe fowtoe, na man foe wán wefi, di abi bribi pikin, di den no e gi nen foe loesoe fasi foe libi noso trangajesi. 7 Bika wan opziener moe de leki wan beheerder foe Gado, fri foe fowtoe, no e lobi foe kisi atibron, no wan droengoe trobiman, no wan sma di e naki, èn di lobi oneerlek wini, 8 ma di lobi foe teki sma na oso, wan sma di lobi boen sani, gesontoe foe ferstan.