Dinari ini na diniwroko — Wan blesi gi a pipel foe Jehovah
„Meki den tesi den disi fosi efoe den boen nofo foe dini èn baka dati, te den de fri foe kragi, dini leki dinari.” — 1 TIMOTÉUS 3:10.
1. Soema e jepi foe djaranti na kolokoe èn na wanfasi foe na gemeente?
JEHOVAH de „na kolokoe Gado” èn a wani dati en diengtknegti de kolokoe (1 Timóteus 1:11). Foe dat’ede meki a ben sorgoe ini owroeman nanga dinari na ini na diniwroko leki wan blesi gi en pipel. Den man disi di abi frantwortoe e dini wan boen marki èn e jepi foe djaranti na kolokoe, na wanfasi nanga a waka tapoe wan gratifasi foe na kristen gemeente. Jehovab Kotoigi de toemsi tangi foe na foeroe-nanga-lobi èn boen dienst di den dinari di ben poti a wroko e doe na inisé foe a theokratis organisaatsi foe Gado!
2. Sortoe fasi owroeman nanga dinari na ini na diniwroko moe abi, ma san den no moe lasi noiti na prakseri?
2 Ma awinsi owroeman nanga dinari na ini na diniwroko e gi wan toemsi prenspari jepi na ini a gemeente, tokoe den no moesoe hé na égi prensparifasi foe den. Den moe hori na ini prakseri dati Jezus Kristus ben gi en bakaman na dek’ati foe de nanga sakafasi. A ben taki wan dé gi den: „A sma di saka ensrefi leki a jongoe pikin disi, en de na moro bigiwan na ini a Kownoekondre foe hemel” (Mattéus 18:4). Èn na discipel Jakobus ben skrifi: „Saka joesrefi na ini den ai foe Jehovah èn en sa hé joe” (Jakobus 4:10; Romeini 12:3). Dati den man disi moe abi wan sakafasi, no wani taki den moesoe loekoe a wroko foe den leki owroeman èn dinari na ini na diniwroko leki noti. Den kan de nanga sakafasi èn tokoe e teki fesi a ini den dienstactiviteit. Noiti den moe lasi na den fesi na boen marki di na activiteit foe den e dini, ma alaten den moe hori na ini prakseri dati den abi a fesi Jehovah nanga a fesi den kristen brada nanga sisa foe den foe doe den wroko so boen leki den man foe doe en.
3. Nanga san wi kan teki gersi na wanfasi activiteit foe Jehovah Kotoigi èn fa man di gi densrefi na Gado kan doe wan sani foe na wanfasi disi èn na go na fesi foe den kownoekondre afersi kon moro foeroe?
3 Na wanfasi activiteit foe Jehovah Kotoigi na ini a ten disi kan teki gersi nanga wanfasi na ini na libisma skin. Na apostel Paulus ben teki na jejeskin foe Kristus foe dat’ede agersi troetroe nanga na libismaskin di de foe foeroe pisi. Tokoe ala pisi foe na skin e wroko nanga makandra foe na boen foe makandra (1 Korinte 12:12-31). Èn den owroeman nanga dinari na ini na diniwroko de séker wan blesi gi Jehovah pipel, bikasi den man disi e meki na wanfasi wroko makandra ini na kristen gemeente ini a ten disi go a fesi. (Teki gersi Kolosse 2:18, 19.) Den memre foe a gemeente di de mansma èn di e span densrefi foe hori baka gi Jehovah organisatorise regelingen di e ’proeberi foe kisi wan opziener wroko’, e jepi na ini wan prenspari pisi foe na kristen wanfasi kon èn foe meki den kownoekondre afersi go a fesi (1 Timoteus 3:1). Ma meki wi go loekoe fosi pikinso fa wan kristen man kan kon ini aanmerking foe kisi na wroko foe dinari ini na diniwroko.
’Tesi den efoe den de boen nofo foe dini’
4. (a) Foe san-ede meki dinari na ini na diniwroko na ini a ten di e kon „moesoe tesi fosi foe si ofoe den de boen nofo gi na wroko”? (b) Den man disi moe de klari foe doe san?
4 Na apostel Paulus ben ferteri en kompewrokoman Timóteus san den e aksi wan mansma bifo den kan kisi a wroko leki dinari na ini na diniwroko. Paulus ben skrifi foe eksempre: „Meki den tesi den disi fosi efoe den boen nofo foe dini èn bakadati, te den de fri foe kragi, dini leki dinari” (1 Timóteus 3:1). Disi e sorgoe dati den no poti man a wroko di no boen nofo èn di no e doro bepaalde fundamenti bijbelmarki. Ooktoe wan sma e kisi nanga disi na ten foe kan si den réde foe ati foe dinari na ini na diniwroko foe a ten di e kon. Wan lostoe foe kisi wan boen nen no moesoe boewégi den man disi, bika disi ben sa sori na tapoe wan mankeri foe sakafasi. Leki wan erkenning dati wan kristen ben gi ensrefi krinkrin abra na Gado sondro wan kondisi, meki wan brada moro foeroe moe de klari foe dini na ini ibri hoedanigheid pe Jehovah wani foe gebroiki en na ini en organisaatsi. Ija, dinari na ini na diniwroko ini a ten di e kon moesoe de klari foe doe dienst net so leki na getrow Jesaja, di ben taki: „Dja mi de! Seni mi.” — Jesaja 6:8.
5. (a) Sortoe marki gi dinari na ini na diniwroko e tjari kon na krin na ini 1 Timóteus 3:8? (b) San a wani taki foe de „serjoesoe”? (c) San Paulus ben méne di a ben taki dati dinari ini na diniwroko no moe de „dobroetongo”?
5 „Dinari na ini na diniwroko ooktoe moe de serjoesoe, no nanga dobroetongo, no moe gi densrefi abra na foeroe wini, no moe lostoe wini di no de eeriek”, Paulus e tjari kon na krin (1 Timóteus 3:8). Aladi son dinari na ini na dini wroko kan de betrekkelek jongoe, tokoe den no de troetroe jongoesma èn den moe de „serjoesoe”. Den ben moe leri toe foe teki prenspari sani tapoe wan serjoesoe fasi. (Teki gersi Odo 22:15.) Den ben moe de sma di e hori densrefi na den wortoe èn doe sani nanga den égi konsensi, no de man di e firi foe prakseri leki foe frantwortoe. Ija, den moe hori wortoe èn teki na wroko foe den serjoesoe. Te foe kaba san kan de foe moro serjoesoe belang leki santa dienst gi Jehovah? A de wan afersi foe libi nanga dede — gi den leki gi tra sma. (Teki gersi 1 Timóteus 4:16.) Boiti foe dati, Paulus ben bedoel, di a ben taki dati dinari na ini na diniwroko no moe de „dobroetongo”, dati den moe de opregti èn waarheidgetrow, no moe wani foe konkroe èn no moe de nanga falsi fasi, ma go leti tapoe a tori. — Odo 3:32.
6. San na wantoe fasi fa dinari na ini na diniwroko moe sori dati den de ini balans?
6 Balansfasi de wan sani di no mag makandra na ini na persoonlek libi foe man di den feni boen foe de dinari na ini na diniwroko. Di Paulus ben taki dati den no ben moesoe de man di e gi densrefi abra na foeroe win, ofoe di ben „angri foe wini sani a wan oneerlekfasi”, a no de foe taki dati a ben méne dati den ben moe tan farawe foe droengoe, gridifasi nanga oneerlekfasi. Den kristen man disi ooktoe ben moe tan farawe foe wiki srefi na indruk dati den abi belangstelling psa marki na ini prisiri ofoe sani na skinfasi. Den moe feti alaten a baka foe poti jejesani na a fosi presi na ini den libi. Disi sa jepi den foe kibri na ini na ai foe tra sma èn san de moro prenspari, na ini na ai foe Gado „wan krin konsensi”. — 1 Timóteus 3:8, 9.
7. (a) Foe san-ede wi kan taki dati den frantwortoe foe den dinari na ini na diniwroko no de troetroe gi jongoe sma? (b) Dati wan dinari ini na diniwroko no trow, san dati kan tjari kon na krin gi en?
7 Den hebi frantwortoe di e kon tapoe na skowroe foe dinari na ini na diniwroko, no de gi troetroe jongoesma. De boekoe e taki foe den sortoe man disi leki sma di doro den jari dati den ben sa kan trow èn ben sa kan abi wan osofamiri. Na ini den omstandigheden dati den ben sa „abi tapoe wan toemsi moifasi na tiri tapoe pikin èn den égi osofamiri” (1 Timóteus 3:12). Disi wani taki dati wan jongoeman pas e de boen nofo gi na wroko foe wan dinari na ini na diniwroko baka te a ben trow èn abi wan osofamiri? Nono, kwetkweti. Efoe a no go es’esi na ini wan trowlibi sondro foe sreka ensrefi boenboen ofoe bifo a ben feni wan boen kristen patna trow, dan dati srefi kan tjari wan séker marki foe lepifasi kon na fesi, di de fanowdoe foe doe tapoe wan joisti fasi persoonlek afersi èn den moro serjoesoe gemeente frantwortoe.
8. Sortoe frantwortoe de na tapoe dinari na ini na diniwroko te joe loekoe 1 Timóteus 3:13 èn Mattéus 24:14?
8 Paulus ben taki dati „den wan di e dini tapoe wan toemsi boenfasi, . . . ekisi gi densrefi wan boen nen èn bigi fri foe taki na ini na bribi di abi foe doe nanga Kristus Jezus” (1 Timóteus 3:13). Wan fasi fa den kan sori na fanowdoe „bigi fri foe taki”, de foe teki prati actief na a préki foe „na boen njoensoe disi foe na kownoekondre” (Mattéus 24:14). Den moesoe ferstan, dati den, makandra nanga den owroeman, e tjari na frantwortoe foe teki fesi na ini na préki na oso foe oso èn na ini tra fasi foe na diniwroko (Tori foe den Apostel 5:42; 20:20, 21). Omoro na ogri seti foe sani foe Satan e kon es’esi na wan kaba, omoro na prékiwroko activiteit e kon moro fanowdoe. Dinari na ini na diniwroko foe dat’ede moe hori na tranga fanowdoe foe na kownoekondre prékiwroko na fesi foe na gemeente foe di densrefi e gi wan toemsi moi eksempre na ini na velddienst.
Kisi jepi foe na foeroeten dienst
9. Sortoe dienst foeroe kristen ben teki na tapoe den te joe loekoe na tranga fanowdoe foe wi ten?
9 Nanga ini prakseri a tranga fanowdoe foe a moeilek ten foe meki foeroe kristenman nanga oema ben teki na foeroeten diniwroko a tapoe den. Foeroe foe den, di den e kari pionier, e gi ala dé gemiddeld a mindri toe nanga féfi joeroe na a prékiwroko, sonwan foe den leki zendeling na ini dorosé kondre. Trawan de na ini na foeroeten dienst tapoe na edekantoro foe na Wachttoren Genootschap ofoe tapoe den bijkantoro foe na Genootschap na wan tra pe na tapoe na grontapoe. A dienst foe den de wan fonten foe prisiri èn satisfaksi gi densrefi èn gi den sma di den e dini foe a boen foe den. Èn na ini foeroe geval na ondrofeni na ini na foeroeten dienst ben jepi foe kweki den égifasi di den ben abi fanowdoe foe dini tapoe wan boenfasi na gemeente lekl dinari na ini na diniwroko.
10, 11. Fa man di wani tron dinari na ini na diniwroko kan njan boen foe na foeroeten dienst, soleki e kon dja na fesi na ini den sani di sma ben taki?
10 Wan fosten dinari na ini na diniwroko di de now wan owroeman na ini na gemeente na ini Berlijn, e taki foe na pionierwroko di a ben teki doe jari psa kaba leki wan jongoe man: „Mi kan taki dati a ben de wan stap di noiti mi ben sari foe en. Jehovah ben blesi mi. Mi matifasi nanga en kon moro krosbé.” Ija, netleki doesoendoesoen trawan na brada disi ben kon si dati na foeroeten diniwroko kan meki na matifasi foe wan sma nanga Jehovah kon moro dipi èn kan meki na go na fesi foe en kristen lepifasi go moro esi.
11 Ete wan brada di e pionier someni jari kaba e tjari kon na krin fa na foeroeten dienst ben jepi en. „Mi ben bro èn ben kisi wan balans loekoe tapoe sani, sodati mi no ben de so esi foe kroetoe sani”, ai taki. „Mi ben de moro kolokoe èn fiti misrefi moro na ini na demakandra nanga difrenti sortoe sma”. Den sani disi no de égifasi di man moe abi di nanga ala prisiri wani de dinari na ini na diniwroko?
12. (a) Sortoe okasi de foe teki prati na a foeroeten dienst? (b) Sortoe bekwwamheid di wan sma moe abi foe teki prati na a foeroeten dienst, sa jepi wan dinari na ini na diniwroko foe doe en dienst?
12 Efoe den bijbel frantwortoe foe kristen man e gi pasi foe doe dati, dan na teki prati na a foeroeten diniwroko kan de wan moi okasi foe ’tesi den fosi efoe den boen nofo foe doe wroko’. Sonwan kan teki na diniwroko disi tapoe wan fasi foe doe en alaten, trawan, foe ten na ten. Jongoewan ben sa kan doe en na a ten foe skorofakansi èn owroewan na ini den fakansiten ofoe tapoe tra ten di fiti na ini a jari. Foe kan teki prati na a foeroetendienst dan a no de foe taki dati wan sma moe de na ini balans èn moe prati en ten soifri. Den bekwaamheid disi wan dinari na ini na diniwroko abi fanowdoe èn den sa jepi en foe doe en wroko. Sortoe wroko?
Den wroko foe den dinari na ini na diniwroko
13. Sortoe denki Tori foe den Apostel 6:1-6 e gi wi foe na sortoe foe wroko di dinari na ini na diniwroko e kisi?
13 Aladi Tori foe den Apostel 6:1-6 no abi foe langalanga nanga na aanstelling foe dinari na ini na diniwroko, tokoe san e taki drape e gi wel wan denki sortoe wroko, te joe loekoe en boen, sa moe gi na ini na diniwroko. A no de foe gi leri na kompe bribiman, ma foe prati njanjan, den „sébi man di den ben sabi boen” di den ben teki na a ten dati, ben loekoe dati den apostel ben kon fri foe ’gi densrefi na begi èn na a diniwroko foe na wortoe’. Te dinari na ini a diniwroko e doe den sortoe wroko disi now dan den e gi den owroeman moro ten foe tjari èn foe gi leri na „a ipi foe Gado”. — 1 Petrus 5:2, 3.
14. Sortoe difrenti wroko dinari na ini na diniwroko kan kisi?
14 Foe den wroko foe dinari na ini na diniwroko na boekoe Orga foe doe wi diniwroko e taki: „Wán dinari na ini na diniwroko kan abi leki wroko foe sorgoe gi na lektuur foe na gemeente, sodati a e kon makriki gi wi alamala foe kisi na lektuur di wi abi fanowdoe foe gebroiki srefi èn foe na velddienst. Wan trawan e sorgoe kande foe den tijdschrift na ini a gemeente. Dan wan trawan baka abi leki wroko foe sorgoe foe na gemeente boekhouding, èn gi gebied èn skrifi wan bericht foe disi. Ofoe den e gebroiki den foe sorgoe foe den microfoon, na geluidsinstallatie, foe sorgoe foe na podium ofoe foe jepi den owroeman tapoe tra fasi. Na ini na ondrow nanga krin foe na kownoekondrezaal foeroe wroko de foe doe èn foe dat’ede den e aksi foeroetron dinari na ini na diniwroko foe jepi na ini na sorgoe foe den frantwortoe disi. Den e kisi toewijzing ooktoe leki zaalwaktiman, bari wan switikon gi njoen sma èn foe jepi foe hori orde na a ten foe gemeente komakandra.” — Bladzijde 59.
15. (a) San wan dinari na ini na diniwroko abi moro fanowdoe foe kan doe en dienst na wan boen fasi, boiti praktis bekwaamfasi? (b) A belangstelling foe dinari ini na diniwroko moe go na a fosi presi tapoe san, aladi den abi someni sani foe sorgoe gi?
15 Ibri brada nanga praktis bekwaamheid kan doe a wroko disi? Nono, bika den „man di den ben sabi boen” èn di na ini na fosi jarhondro ini Jeruzalem den ben teki ben „foeroe nanga jeje èn koni”, ofoe „na praktissé èn na jejesé den ben de srekasreka” (Tori foe den Apostel 6:3, Phillips). Awinsi den ben de kaba owroeman a mindri Jehovah pipel, den ben kisi asrefi sortoe wroko di dinari na ini na diniwroko e doe now. Soboen efoe disiten dinari na ini na diniwroko wani doe a wroko foe den tapoe wan boenfasi, dan den moe de „srekasreka na praktis èn na jejesé”. Aladi den e broko den ede nanga den finifini pisi foe na organisaatsisé, tokoe na belangstelling foe den na a fosi presi moe go na a dini foe sma, èn a moe de na tapoe sowan fasi dati den sma dati e njan boen foe dati na jejesé.
16. Sortoe wroko dinari na ini na diniwroko kan kisi efoe nofo owroeman no de na ini na gemeente?
16 Foe di dinari na ini na diniwroko moe abi jejefasi, meki den kan gebroiki den wawantron gi wroko di te joe loekoe en boen owroeman moe doe. Na ini Orga foe doe wi diniwroko (blz. 60) e tjari kon na krin: „Efoe nofo owroeman no de foe hori na gemeente boekoestudie, dan wantoe foe den moro bekwaam dinari na ini na diniwroko e gebroiki leki studieleider foe sorgoe foe wan foe den groepoe di den gi den. Den kan gi den prati tapoe na dienstkomakandra èn na theokratis diniwrokoskoro èn den kan kisi na toewijzing foe hori publiki taki na ini na gemeente pe den de. Ooktoe tra grani kan gi a wantoe foe den dinari na ini na diniwroko efoe wan spesroetoe fanowdoe de foe dati èn efoe den e doro den marki foe na toewijzing. — Teki gersi 1 Petrus 4:10.
17. Sortoe man Stéfanus ben de, èn sortoe aksi disi e tjari kon na fesi na ini a tori foe dinari na ini na diniwroko?
17 Wan foe den „sébi man di sma ben sabi boen” foe bijbelten ben de Stéfanus, wan man foeroe nanga bribi èn nanga santa jeje” (Tori foe den Apostel 6:5). Bifo Stéfanus ben dede foe en bribi ede leki wan getrow man, a ben gi wan faja kotoigi a fesi foe na djoe Sanhedrin. Lési a tori, dan joe sa kisi na overtoigi dati a ben abi jejefasi, wan toemsi boen kotoigi di ben opo ensrefi gi na tiri foe Jehovah jeje èn di ben de klarklari foe gi en libi na ini Jehovah dienst (Tori foe den Apostel 6:8-7:60). Efoe joe de wan dinari na ini na diniwroko, joe e teki joe gemeente wroko nanga joe velddienst dan net so serjoesoe leki Stéfanus ben teki en frantwortoe èn na grani foe taki na waarheid?
O fara den e doro den markitiki
18. San wi kan taki foe na wroko foe foeroe dinari na ini na diniwroko, èn sortoe djaranti den kan abi?
18 Foeroe dinari na ini na diniwroko e sori wan toemsi boen eksempre na ini na kristen libi nanga waka, e doe den gemeente frantwortoe foe den toemsi boen èn e teki fesi na ini na velddienst. Kompe anbegiman e warderi srefsrefi a wroko foe den èn Jehovah sa blesi en, bika djoe kristen ben kisi na djaranti: „Gado no de onregtvaardiki sodati a ben sa frigiti joe wroko èn a lobi di joe ben sori gi en nen, foe di joe ben dini den santawan èn e tan dini den.” — Hebrewsma 6:10.
19. (a) Sortoe aksi ibri dinari na ini na diniwroko ben sa kan aksi ensrefi? (b) Foe san-ede a kan de boen foe taki foe problema di son dinari na ini na diniwroko abi problema nanga den?
19 Ma ibriwan dinari na ini na diniwroko ben sa kan aksi ensrefi nanga leti: Mi e doro den bijbelmarki? Mi e doe wan sani troetroe foe na wanfasi foe na gemeente kon? Mi e doe tapoe wan fasi di fiti èn nanga faja den wroko di mi kisi? Èn mi e gi wan boen eksempre na ini na velddienst? Son dinari na ini na diniwroko abi foe doe nanga problema foe doro san den e aksi foe den. Meki oen go taki foe dat’ede foe wantoe foe den problema disi. Nanga disi ibri dinari na ini na diniwroko e kisi jepi „foe go loekoe san en égi wroko de” (Galacia 6:4). Ooktoe trawan sa kisi nanga disi moro warderi gi na foeroe-nanga-lobi wroko di den man disi e doe, di e dini wan boen marki a mindri Jehovah Kotoigi èn di de wan troetroe blesi gi a pipel foe Gado.
Joe kan leg disi uit
◻ Fa dinari na ini na diniwroko de wan blesi gi Jehovah pipel?
◻ Fa brada di wani tron dinari na ini na diniwroko kan kisi jepi foe na foeroeten dienst?
◻ Foe san-ede meki dinari na ini na diniwroko moe de „srekasreka na praktis èn na jejesé”?
◻ Fa na getrow Stéfanus ben de wan moi eksempre gi dinari na ini a diniwroko na ini a ten disi?
[Prenki na tapoe bladzijde 2]
Owroeman nanga dinari na ini na diniwroko de wan blesi gi na gemeente
[Prenki na tapoe bladzijde 4]
Pionierwroko de wan boen opleiding gi den wan di e angri foe tron dinari na ini a diniwroko ofoe owroeman