A distrikt kongres e gi wi deki-ati fu waka nanga Gado

A „Waka nanga Gado” Distrikt Kongres memre wi ibri tron baka san na a krin rai di Yehovah gi wi, namku: „Disi na a pasi. Waka na tapu, un pipel”! (Yes. 30:21) Te wi e gebroiki den rai di wi ben kisi, dan dati sa yepi wi fu ’tan luku bun fa wi e waka’ (Ef. 5:15). Efu wi e denki dipi fu san wi ben leri, dan dati sa yepi wi te wi „e tan waka na ini a waarheid”.—3 Yoh. 3.

Gebroiki den aksi di e kon now èn den sani di yu skrifi na a kongres, fu sreka yusrefi na fesi, èn fu teki prati na a takimakandra fu a kongres programa te wi sa luku baka san wi leri. A takimakandra disi o hori ini a wiki fu 18 oktober.

1. Fa Heinok ben man waka nanga Gado, aladi a ben e libi na ini bruya ten? (Hebr. 11:1, 5, 6; Yud. 14, 15; „Waka nanga Gado na ini bruya ten”)

2. Na ini sortu afersi fu wi libi wi kan fiti a gronprakseri di skrifi na ini Lukas 16:10? („Yu de ’getrow na ini a moro pikin sani’?”)

3. (a) Kari fo moi sani di wi e leri na ini Hosea kapitel 6 te go miti 9, èn di sa yepi wi fu waka nanga Gado (Hos. 6:6, 7; 7:14; 8:7). (b) Sortu tra sani wi leri na ini Hosea kapitel 10 te go miti 14, di sa yepi wi sosrefi fu waka nanga Gado? („A profeititori fu Hosea e yepi wi fu waka nanga Gado”—Symposium)

4. San na wan tu moi sani di Kresten masra nanga Kresten wefi kan du fu tan abi wan bun trowlibi? (Odo 12:4; Ef. 5:29; „No prati ’san Gado poti na ondro wán tyatyari’”)

5. Fa wi e sori lespeki gi den santa konmakandra fu wi? (Preik. 5:1; Yes. 66:23; „Sori lespeki gi den santa konmakandra fu wi”)

6. (a) San na dri prenspari pisi fu wi preikiwroko di wi musu ondrosuku, efu wi wani sorgu taki wi du a wroko disi na wan bun fasi? (Yes. 52:7; Sak. 8:23; Mark. 6:34) (b) Sortu moi sani fu a buku Goed nieuws voor mensen uit alle landen (Bun nyunsu gi sma fu ala nâsi) yu kan gebroiki bun? („Bun nyunsu gi sma fu ala nâsi”; „Yepi den wan di e taki wan tra tongo”)

7. Fa wi kan yepi nyunwan fu kisi deki-ati fu preiki a Kownukondre boskopu? (Krut. 7:17; „Yepi furu sma fu kon preiki makandra nanga wi”)

8. Fa wi kan sori taki wi abi na overtoigi dati „a bigi dei fu Yehovah de krosibei”? (Sef. 1:14; „Wi e waka nanga bribi, no nanga san ai e si”)

9. (a) O seryusu a de te sma e naki futu? (Mark. 9:42-48) (b) Fa wi kan sorgu taki wi no naki futu? (Ps. 119:165) (c)  Fa wi kan sorgu taki wi no e meki trawan naki futu? (1 Kor. 10:24; „No du ’nowan sani di kan meki sma naki futu’”)

10. Fa wi kan teki bun bosroiti te wi e suku wan trowpatna, te wi e suku fu abi wan bun gosontu, èn te wi e du bisnis? (Ps. 26:4; Mat. 6:25; 1 Tim. 6:9; „De nanga yu krin frustan ala ten”)

11. (a) Sortu prenspari sani wi kan leri fu den okasi pe Yesus ben abi demakandra nanga sma di ben kari en kon na den oso? (Luk. 10:42; 24:32) (b) Efu wi wani abi prisiriten, dan fa wi kan du dati na so wan fasi taki wi, èn sosrefi trawan e kisi nyun krakti? (1 Kor. 10:31-33; „Prisiriten di fiti èn di e gi nyun krakti”)

12. Soleki fa Psalm 23 e sori, dan sortu blesi wi leki skapu fu Yehovah e kisi, èn san na den frantwortu fu wi? (1 Kor. 10:21; „Yehovah na wi Skapuman”)

13. Fa Kresten e poti prakseri na a rai di gi nanga yepi fu santa yeye, di e taki dati den musu ’bai a yoisti ten gi densrefi’? (Ef. 5:16; „Bai a yoisti ten gi unsrefi”)

14. (a) Openbaring 14:7 e taki fu ’a yuru fu krutu’. Sortu sani abi fu du nanga a pisi tori disi tu? (b) Fa wi kan sori krin taki wi e difrenti trutru fu Babilon a Bigiwan? („’Tan na ai’—A yuru fu krutu doro”) (c) San na wan tu moi sani di yu si na ini a Tan na ai!-brochure?

15. Kari dri fasi di wi abi fanowdu fu kan sorgu taki wi no „gowe libi a reti pasi” (2 Petr. 2:15; „Luku bun fu no ’gowe libi a reti pasi’”).

16. Fa yonguwan kan wai pasi gi „a pasi fu den ogriwan”? (Odo 4:14; „Yonguwan—Waka a pasi fu regtfardikifasi”)

17. (a) Fa Paulus ben de wan tumusi bun eksempre fu wan sma di horidoro? (Tori. 14:19, 20; 16:25-33) (b) Fu san ede wi no abi fu frede den sma di de feanti fu a tru anbegi? (A drama nanga a lezing di nen „Gi kotoigi finifini na ini a ten disi, awinsi yu e kisi gens”)

18. Sortu blesi den wan di e waka nanga Gado e kisi? („Te wi e tan waka a pasi fu Gado, dan wi sa kisi blesi now èn fu têgo”)

Meki wi abi a fasti bosroiti fu poti prakseri na ’a wortu na wi baka’, so taki wi kan tan waka nanga wi hemel Tata fu têgo.—Yes. 30:21; Yoh. 3:36.