A ten fu a Memrefesa—Wan ten fu du moro na ini a diniwroko
1. Sortu krakti den ’fesa di ben musu hori na wan fasti ten’ ben abi tapu den Israelsma di ben e frede Gado?
1 Na spesrutu ten na ini a yari, den Israelsma fu owruten ben abi ’fesa fu Yehovah di ben musu hori na wan fasti ten’ (Lef. 23:2). Te den ben teki ten fu denki fu a bunfasi fu a Gado fu den, dan a bakapisi ben de taki den ben e kisi bigi prisiri èn den ben e kisi deki-ati fu abi faya gi a tru anbegi.—2 Kron. 30:21–31:2.
2, 3. Fu san ede a fiti taki wi e du moro na yeye fasi na a ten fu a Memrefesa, èn o ten wi sa hori a Memrefesa?
2 Na ini a ten disi, a theokrasia wroko di wi e du èn di e gi wi prisiri, e kon moro furu ibri yari na a ten fu a Memrefesa. A de wan ten pe wi e denki dipi fu a warti presenti di Yehovah gi fu a bun fu wi, namku en wan-enkri gebore Manpikin (Yoh. 3:16; 1 Petr. 1:18, 19). Te wi e denki dipi fu a lobi di Gado nanga en Manpikin sori gi wi, dan wi e kisi a firi fu prèise Yehovah èn fu wroko tranga fu du a wani fu Yehovah.—2 Kor. 5:14, 15.
3 A yari disi a Memrefesa sa hori tapu fodewroko 24 maart, baka te son dongo. Fa wi kan teki moro prati na a diniwroko na ini den mun maart, april, nanga mei?
4, 5. (a) San yepi son sma fu miti moro sma nanga a bun nyunsu? (b) Na sortu fasi yu man miti moro sma nanga bun bakapisi na ini a kontren fu yu?
4 Miti moro sma: Suku fasi fu miti someni sma leki yu man te yu e teki prati na a preikiwroko. Yu kan seti sani fu teki prati na a oso-fu-oso wroko te moro sma de na oso, kande na bakadina noso na neti? Efu wan tu sma fu yu bukustudie grupu wani teki prati na a diniwroko bifo a bukustudie bigin, dan a bukustudie-opziener kan seti sani fu hori wan syatu preikiwroko konmakandra so taki den kan wroko na ini wan kontren di de krosibei.
5 Wan tra fasi fu miti furu sma, na fu gi kotoigi na presi pe furu sma de fu feni. Wan sisa na ini Yapan ben wani du a yepi-pionierwroko, aladi a ben abi wan grontapuwroko pe a ben wroko heri dei. Wan owruman ben gi en a rai taki kande a ben kan du stratiwroko krosibei fu wan presi pe sma e teki loko ibri dei, bifo a ben go na en grontapuwroko. Aladi a ben e syensyen na ini a bigin èn aladi son sma di ben de na pasi fu go na wroko ben e lafu en, toku a teki deki-ati, èn a ben kan tyari tijdschrift doronomo gi 40 sma. Den sma disi ben de sma di ben de na pasi fu go na wroko, sma di ben e wroko na a presi pe sma kan teki loko, èn sosrefi sma di ben abi wenkri na ini a birti. A ben prati sowan 235 tijdschrift na ini wan mun. Fu di a ben e gebroiki wan tu momenti ibri dei fu taki fu Bijbel penti nanga sma, meki a ben kan bigin studeri Bijbel nanga siksi sma.
6. Fa yonguwan kan du moro na ini a diniwroko fu den?
6 Okasi fu gi kotoigi: Furu preikiman di e go na skoro ete e kisi difrenti fakansi na ini a yari. Den fakansi disi kan de bun okasi fu go na ini a yepi-pionierwroko. Boiti dati, Kresten yonguwan kan du moro na ini a diniwroko te den e gi kotoigi na skoro. Yu sa fruwondru fa den pikin na ini a srefi klas fu yu sa wani sabi moro fu a bribi fu yu. Fu san ede yu no e gi kotoigi na den takimakandra di e hori na ini a klas, noso te yu musu skrifi fu wan tori na ini a klas? Trawan ben gi kotoigi di den gebroiki den video fu a genootschap. Sonwan bigin bijbelstudie nanga den pikin na ini a klas fu den, èn den yepi den fu go na fesi na yeye fasi teleki den gi densrefi abra na Gado èn teki dopu. Disi na tumusi bun fasi fu „prèise a nen fu Yehovah”.—Ps. 148:12, 13.
7. (a) Fa wan brada ben gebroiki den okasi di a ben abi fu gi kotoigi na tra sma? (b) Yu abi wan srefi sortu ondrofenitori?
7 Te yu e du den sani di yu gwenti fu du ala dei, dan meki muiti na difrenti fasi fu taki nanga sma fu a tumusi bun Gado fu wi èn fu den tumusi moi pramisi fu en. Wan brada di e teki a srefi loko ibri dei, e luku efu a fiti èn dan a e gi kotoigi na den sma di de na ini a srefi loko nanga en. Fu eksempre, aladi a ben e wakti na a presi fu teki wan tra loko, a ben e gi kotoigi na wan yonkuman ibri dei sowan feifi miniti. Leki bakapisi fu dati, a yonkuman nanga wan kompe-wrokoman fu en, ben agri fu bigin wan bijbelstudie. Den ben hori a bijbelstudie na ini a loko aladi den ben e reis. Wan pisi ten baka dati, wan owru uma di ben arki san den ben taki, go na a brada èn a aksi en wan bijbelstudie. En tu e prisiri nanga a studie fu en di a e kisi tapu den dei te a e go nanga a loko. Na a fasi disi, a brada studeri nanga tin difrenti sma na ini a loko.
8. Sortu fasi fu a diniwroko kan yepi sma di grani, noso di siki fu du moro na ini a preikiwroko?
8 Ma fa a de dan, efu yu no man du so furu moro fu di yu kon grani, noso fu di yu siki? Furu fasi de ete fa yu kan du moro fu prèise Yehovah. Yu pruberi fu gi kotoigi nanga yepi fu telefon? Efu yu no sabi seiker fa yu musu du disi, dan taki nanga a Bukustudie-opziener fu yu. Kande a kan seti sani, taki preikiman di e gebroiki telefon fu gi kotoigi, e wroko makandra nanga yu. Te unu e wroko makandra, dan unu kan leri fu makandra èn unu kan yepi makandra fu gi wan bun kotoigi. Na ini Wi Kownukondre diniwroko fu februari 2001, bladzijde 5, 6, yu kan feni rai fa fu gi kotoigi nanga yepi fu telefon.
9. Fa wi kan yepi bijbelstudenti fu doro a marki fu teki prati na a preikiwroko, makandra nanga a gemeente?
9 Te nyunwan e go na a Memrefesa, dan a kan taki den e kisi a deki-ati fu prèise Yehovah moro furu. Yu kan yepi den fu wini a frede di den abi kande fu teki prati na a preikiwroko, fu di yu e fruteri den moi ondrofeni di sma ben abi na ini a preikiwroko èn fu di yu e leri den safrisafri fa den kan fruklari den leri fu Bijbel èn fa den kan opo taki gi a bribi fu den (1 Petr. 3:15). Efu wan bijbelstudenti e taki dati a wani bigin preiki a bun nyunsu, dan go taki nanga a fesiman-opziener. A sa seti sani fu abi wan takimakandra nanga a studenti fu luku efu a man teki prati na a preikiwroko, makandra nanga a gemeente. Na ati fu Yehovah musu prisiri trutru te a e si taki nyunwan e teki a fasti bosroiti fu horibaka gi a reti di a abi fu tiri hemel nanga grontapu!—Odo 27:11.
10. (a) Fa wan bun schema kan yepi wi fu du a yepi-pionierwroko? (b) Yu ben man seti sani fu du a yepi-pionierwroko na a ten fu a Memrefesa a yari di pasa? Fa so?
10 Yu kan dini leki yepipionier? Wi musu si den 50 yuru di wan yepipionier musu doro, leki wan seryusu sani (Mat. 5:37). Disi wani taki dati yu sa musu wroko sowan 12 yuru ibri wiki na ini a preikiwroko. Kande yu kan gebroiki wan fu den schema na tapu bladzijde 5 di e fiti a situwâsi fu yu. Efu dati no kan, dan kande yu kan seti yu eigi schema di e gi yu pasi fu du a yepi-pionierwroko na ini maart, april, noso mei. Aksi Yehovah fu blesi a muiti di yu e du fu du moro na ini yu diniwroko.—Odo 16:3.
11. Fa den owruman nanga den dinari ini a diniwroko kan horibaka gi den sma di sa dini leki yepipionier?
11 Den owruman nanga den dinari ini a diniwroko sa horibaka gi a muiti di yu e du fu meki a ten fu a Memrefesa disi kon tron wan spesrutu ten fu prèise Yehovah. Kande furu fu den sa du a yepi-pionierwroko tu. Den owruman sa seti moro preikiwroko konmakandra efu dati de fanowdu, soleki tapu den lati bakadina, tapu den mofoneti fu den mindriwiki dei, èn tapu satra nanga sonde. Fu kon si pe èn o ten den konmakandra disi sa hori èn suma sa teki fesi na den, dan den owruman kan taki nanga den sma di teki a bosroiti fu go na ini a yepi-pionierwroko noso di e prakseri fu du dati. Den owruman sa du muiti fu seti sani, so taki tra preikiman kan wroko makandra nanga yu tapu den dei nanga a ten, di yu poti fu du a preikiwroko. Na a fasi disi, den sani di seti kan waka bun, èn bun furu wroko kan du.—Odo 20:18.
12. San e naki wi ati fu prèise Yehovah ala ten?
12 Du ala san yu man: Efu a situwâsi fu yu no e gi yu pasi fu dini leki yepipionier, dan memre taki Yehovah e prisiri nanga a muiti di wi e du, èn nanga den sani di wi e gi, ’spesrutu efu wi e gi san wi abi, èn taki wi no e gi san wi no abi’ (2 Kor. 8:12). Wi abi furu fu san wi musu taigi Yehovah tangi. Fu dati ede David ben skrifi: „Mi sa blesi Yehovah ala ten; a prèise fu en sa de na ini mi mofo doronomo” (Ps. 34:1). Meki wi teki a fasti bosroiti dati na a ten fu a Memrefesa.
[Faki na tapu bladzijde 3]
Fa yu kan wroko moro na ini a diniwroko?
◼ Preiki te sma de na oso
◼ Gi kotoigi na presi pe furu sma de fu feni
◼ Gi kotoigi na wrokope noso na skoro
◼ Gi kotoigi nanga yepi fu telefon
◼ Dini leki wan yepipionier
[Schema na tapu bladzijde 5]
Eksempre fu schema di wan yepipionier kan gebroiki—Difrenti fasi fu wroko 12 yuru na ini wan wiki na ini a preikiwroko
Mamanten—Munde te go miti Satra
Gebroiki sonde na presi fu iniwan fu den dei dyaso na ondrosei:
Dei O ten Yuru
Munde Mamanten 2
Tudewroko Mamanten 2
Dridewroko Mamanten 2
Fodewroko Mamanten 2
Freida Mamanten 2
Satra Mamanten 2
Ala nanga ala: 12
Wroko tu heri dei
Yu kan luku sortuwan fu den tu dei na ini a wiki yu wani wroko. (Den tu dei fu a schema di yu o gebroiki kan meki taki yu wroko ala nanga ala 48 yuru nomo na ini a mun.)
Dei O ten Yuru
Dridewroko A heri dei 6
Satra A heri dei 6
Ala nanga ala: 12
Tu leisi mofoneti èn satra nanga sonde
Yusrefi kan luku sortu tu dei mindriwiki yu o wroko mofoneti.
Dei O ten Yuru
Munde Mofoneti 1 1⁄2
Dridewroko Mofoneti 1 1⁄2
Satra A heri dei 6
Sonde Wan afu dei 3
Ala nanga ala: 12
Wroko dri bakadina èn tapu satra
Gebroiki sonde na presi fu iniwan fu den dei dyaso na ondrosei.
Dei O ten Yuru
Munde Bakadina 2
Dridewroko Bakadina 2
Freida Bakadina 2
Satra A heri dei 6
Ala nanga ala: 12
Mi eigi schema gi a preikiwroko
Yusrefi kan luku omeni yuru yu e wroko tapu iniwan fu den dei disi.
Dei O ten Yuru
Munde
Tudewroko
Dridewroko
Fodewroko
Freida
Satra
Sonde
Ala nanga ala: 12