Schema gi na osofamiri—Den gemeente konmakandra
1 Efu yu na wan Kresten papa noso mama, dan a no de fu taki dati yu wani taki den pikin fu yu musu gro kon tron sma di lobi Yehovah èn di e dini en, èn te fu kaba yu wani taki den kisi têgo libi na ini a nyun grontapu di Gado pramisi. Fa yu kan yepi den fu poti na anbegi fu Yehovah tapu a fosi presi na ini den libi? Wan tumusi prenspari fasi fa yu kan du dati, na te yusrefi e gi den na eksempre (Odo 20:7). Wan sisa e memre taki en mama di de wan Kotoigi, gi en wan bun eksempre. A ben taki: „Wi ben sabi taki ala ten wi ben o go na den konmakandra.” A sisa disi tan hori a sani disi na prakseri.
2 Na osofamiri fu yu e frustan fu san ede den musu go na den gemeente konmakandra? Den sani di wi e leri na den konmakandra disi e gi wi krakti so taki wi kan go doro fu du a wani fu Gado, èn a demakandra di wi abi nanga den brada nanga sisa fu wi na trutru wan warti sani di e gi wi deki-ati (Yes. 54:13; Rom. 1:11, 12). Ma a moro prenspari marki fu den konmakandra disi, na fu prèise Yehovah „na mindri den ipi sma di kon makandra” (Ps. 26:12). Den Kresten konmakandra e gi wi na okasi fu sori taki wi lobi Yehovah èn taki wi e anbegi en.
3 „Luku bun”: Te wi abi warderi gi a santa marki fu den konmakandra fu wi, dan dati sa meki taki wi e „luku bun” taki safrisafri wi no e kon kisi a gwenti fu misi den konmakandra fu di wi abi sani fu du di no de so prenspari (Ef. 5:15, 16; Hebr. 10:24, 25). Te yu e meki wan schema gi yu osofamiri, dan yu kan bigin fu skrifi o ten den gemeente konmakandra de. Luku bun taki unu no e du tra sani na a ten di un musu go na den konmakandra. Sorgu taki a go di unu e go na den konmakandra na wan prenspari sani gi yu osofamiri.
4 A e naki wi ati te wi e leisi taki den brada nanga sisa fu wi e du tranga muiti fu go na den gemeente konmakandra nanga den bigi konmakandra, a no so? Aladi a kan de so taki yu no abi fu du so furu muiti fu go na den konmakandra, toku yu kan kisi fu du nanga wan tu tyalensi tu. Satan e meki en moro muilek gi a pipel fu Gado, fu di a no wani taki den musu anbegi Yehovah. Ma yu kan de seiker taki den pikin fu yu o si fa na osofamiri e tan meki muiti fu go na den gemeente konmakandra. Iya, te yu e du dati, dan yu e gi den wan yeye gudu di den no sa frigiti noiti.