Gi kotoigi sondro fu taki wan sani
1 Den mekisani fu Yehovah, soleki hemel nanga den stari, e sori wi krin san na den fasi fu en, aladi den no man taki (Ps. 19:1-3; Rom. 1:20). Na so a de tu taki a bun fasi fa wi e tyari wisrefi, den Kresten fasi fu wi, nanga a fasi fa wi e moi wisrefi na wan fasi di fiti, e gi kotoigi sondro fu wi taki wan sani (1 Petr. 2:12; 3:1-4). Wi alamala musu wani „moi a leri fu Gado wi Frulusuman, na ini ala sani” nanga a fasi fa wi e tyari wisrefi.—Tit. 2:10.
2 Fa sondu libisma kan meki taki den leri fu Bijbel e hari a prakseri fu sma? Disi kan soso nanga yepi fu a tiri fu Gado Wortu èn nanga a krakti fu a santa yeye (Ps. 119:105; 143:10). A wortu fu Gado „de na libi, a abi krakti, èn a srapu moro wan feti-owru di e koti na tu sei” (Hebr. 4:12). A e go dipi na ini wi èn a e meki wi tron wan nyun sma di kisi nyun fasi (Kol. 3:9, 10). A santa yeye e meki wi abi tumusi moi fasi, soleki bun-ati, bunfasi, safri-ati, nanga a dwengi di wi musu dwengi wisrefi (Gal. 5:22, 23). A de so taki ibriwan fu wi e meki a wortu fu Gado nanga a santa yeye abi krakti tapu a libi fu wi?—Ef. 4:30; 1 Tes. 2:13.
3 Trawan e luku san wi e du: Te wi e libi akruderi den markitiki fu Yehovah èn te wi e meki muiti fu sori den fasi fu en, dan tra sma e si dati tu. Luku na eksempre disi fu wan man. Den kompe wrokoman fu en ben e spotu en fu di a ben syatu. Wan sisa di ben e wroko na a srefi kantoro, ala ten ben e handri nanga en na wan wartifasi èn nanga lespeki. Disi ben meki taki a man aksi a sisa fu san ede a de heri tra fasi leki den tra wrokoman. A sisa ben fruteri a man taki a e lespeki trawan fu di a e fiti den Bijbel gronprakseri na ini en libi. A fruteri a man sosrefi fu a tumusi moi Kownukondre howpu. A man bigin studeri Bijbel èn te fu kaba a teki dopu. Di a man disi drai go baka na a kondre pe a gebore, dan den famiriman fu en ben fruwondru fu si fa a e tyari ensrefi so bun, èn fu dati ede meki so wan fu den teki a waarheid tu.
4 Meki a de so taki wi e tyari wisrefi bun èn taki wi e gi kotoigi na wrokope, na skoro, noso nanga a fasi fa wi e handri nanga famiriman noso birtisma. Disi sa meki taki trawan sa gi Gado glori.—Mat. 5:16.