Gi kotoigi nanga jepi foe a boen fasi fa joe e tjari joesrefi
1 Na ini a libimakandra foe now di e gi toemoesi foeroe primisi foe doe sani, foeroe jongoesma e gi den libi sondro foe denki na drug, a de di sma de sondro boen gwenti nanga wet, oproeroe èn ogri di sma e doe nanga tranga. Heri tra fasi a de nanga a boen fasi fa jongoewan na ini a kresten gemeente e tjari densrefi, wan sani di de moi foe si èn di seiker de wan moi sani gi Jehovah. A e dini leki wan krakti kotoigi di kan hari tra sma kon na a waarheid. — 1 Petr. 2:12.
2 Foeroe ondrofenitori e sori taki a boen fasi fa kresten jongoewan e tjari densrefi, ben abi wan positief krakti tapoe trawan di ben e loekoe den. Wan skoromisi ben taki foe wan jongoe kotoigi di a ben gi leri, a ben taigi a heri klas taki a Gado, Jehovah, foe na oemapikin disi, na a troe Gado. A skoromisi ben taki a sani disi foe di a fasi fa na oemapikin ben tjari ensrefi, ala ten de na wan lespeki fasi. Wan trawan ben skrifi a Genootschap, èn a ben e taki: „Mi ben sa wani prèise joe gi den toemoesi boen jongoe sma di joe abi ini joe relisi. . . . Den jongoewan foe joe de troetroe wan eksempre. Den abi lespeki gi den owroewan foe den, den abi maniri, èn den e weri krosi na wan bescheiden fasi. Èn den sabi den bijbel heri boen! Dati na fa relisi moesoe de troetroe!”
3 A boen fasi fa wan kotoigi di ben abi seibi jari ben tjari ensrefi na ini en klas, ben naki na ati foe wan tra skoromisi. A sani di ben hari a skoromisi, ben de a safoe èn switi fasi fa a boi ben de, èn dati ben meki a boi ben de heri tra fasi leki den tra boi. A serjoesoefasi fa a boi ben si a relisi foe en, ben naki na ati foe a skoromisi, a boi no ben e sjen taki a ben de tra fasi leki trawan foe den sani ede di a ben bribi. A skoromisi ben kan si taki a konsensi foe a boi ben oefen èn taki a ben man „foe si san boen èn san ogri” (Heb. 5:14). Te foe kaba a mama foe a boi ben fisiti a skoromisi, èn den ben bigin wan bijbelstudie. Baka ten a skoromisi ben teki dopoe èn baka dati a ben tron wan gewoon pionier!
4 A boen fasi fa wan kotoigi ben tjari ensrefi na skoro, ben abi krakti tapoe wan jonkoeman foe a skoro foe en. A kotoigi ben de tra fasi troetroe — a ben abi maniri srefisrefi, ben studeri boen, èn ala ten a ben weri krosi na wan bescheiden fasi; so srefi, na oema kotoigi disi noiti no ben freiri nanga den boi, soleki fa den tra oemapikin ben doe. A jonkoeman ben kan si taki a kotoigi ben libi akroederi bijbel gronprakseri. A jonkoeman ben aksi a kotoigi wan toe sani foe a relisi bribi foe en èn den sani di a ben leri, ben naki en ati. A jonkoeman ben bigin studeri, heri esi a ben teki dopoe, èn te foe kaba a ben abi wan prati na a pionier wroko èn na a Betheldiniwroko.
5 Efoe joe na wan jongoe kresten di wani gi wan boen kotoigi na trawan, dan de na ai gi a fasi fa joe e tjari joesrefi na ala fasi. Noiti no meki a de di joe de na ai go na baka, foe di joe e bigin feni en boen fa grontapoe e gi toemoesi foeroe primisi foe wan sma tjari ensrefi, e loekoe sani, noso foe a fasi foe libi foe den. De wan kefalek boen eksempre na ini a fasi fa joe e taki, e weri krosi, e sorgoe joesrefi, no wawan te joe abi wan prati na ini a velddienst èn na den gemeente konmakandra, ma so srefi toe te joe de na skoro èn te joe abi wan prisiriten (1 Tim. 4:12). Joe sa abi troetroe prisiri te wan sma e kisi belangstelling gi a waarheid foe di joe ben ’meki joe leti skèin’ nanga jepi foe a boen fasi fa joe e tjari joesrefi. — Mat. 5:16.