Na presi foe den jongoewan ini na kristen maatschappij
„Prijse Jah! . . . oen jonkoeman en ooktoe oen wendje.” — Ps. 148:1, 12.
1, 2. (a) Fa a de wroko tapoe joe te den frigiti joe ofoe djompo joe abra? (b) Fa Jehovah Gado nanga Jezus Kristus e si pikin?
KANDE a sani disi pasa nanga joe: Wan soema ben kari joe kon na wan ofoe tra okasi foe wan bigi fesa, pe den poti tapoe na presi foe ala fisitiman wan karta nanga hen nen na tapoe. Ma wan fowtoe meki, dati joe no kisi wan presi. Disi kan de wan ferferi nanga hati sani. A no de wan prisiri sani foe den djompo joe abra ofoe frigiti joe, a no so?
2 So srefi toe, son soema ben sa kan frigiti jongoe soema ofoe djompo den abra, foedi den e feni dati den no de warti foe kisi belangstelling nanga aandacht. Na Mekiman foe wi, Jehovah Gado ofoe hen Manpikin, Jezus Kristus, no e si jongoewan tapoe na fasi disi. Di den discipel foe Jezus ben wani foe tapoe den pikin-nengre foe kon na hen, Jezus ben piri-ai gi den: „Meki den jongoe pikin kon na mi; no proberi foe tapoe den” (Mark. 10:14). Jezus ben poti krakti na tapoe, dati srefi pikin meki-sani de diri ini na ai foe Gado, di a ben taki: „Den no e seri pikin fowroe foe wan moni di no abi foeroe warde? Tog no wan sa fadon na gron, sondro foe oen Tata sabi” (Matt. 10:29). Efoe soboen, srefi pikin fowroe Jehovah e feni wan warti sani, omeni moro pikin-nengre de diri gi hen!
3. Foe sainde a no ala pikin, en ooktoe no ala engel, de wan diri sani gi Gado?
3 Ma so wan diri fasi ini Gado ai no e kon so maar! A no ala jongoewan de wan diri sani gi Gado — soleki a de toe nanga ala engel. Na bijbel e taki: „Den engel di no ben hori den fosi presi, ma di ben libi den égi joisti libi-presi, a ben kibri nanga tégo banti ondro deki doengroe gi na kroetoe foe na bigi dé” (Judas 6). Den engel abi den wroko ini hemel, pe den e dini Jehovah Gado leki wan pisi foe hen organisatie. Ma den di wi e taki dja foe den, ben si wan tra sani, di den ben feni moi, en foe datede den ben libi den „joisti libipresi” foe den. San den ben si?
4, 5. (a) Foe sainde bepaalde engel ben tapoe foe dini Gado, en san Gado ben doe nanga ogri di ben kon leki wan bakapisi foe disi? (b) Sortoe leri wi alamala kan leri foe disi?
4 Na bijbel e verteri: „Den manpikin foe na troe Gado ben (go) loekoe den oemapikin foe libisoema en den ben si, dati den ben moi; en den ben go teki oema gi densrefi” (Gen. 6:2). Den „manpikin disi foe Gado” ben de soso mansoema tapoe grontapoe? Nono. Den ben de engel-manpikin foe Gado, di ben libi den joisti libipresi foe den ini hemel en den ben kon ini libisoema skin foe abi seks nanga den moi oema tapoe grontapoe. Leki bakapisi foe na krakti foe na hoeroedoe foe den en bakaten di foe den basra-pikin foe den, meki sani tapoe grontapoe kon esesi takroe, sodati Gado ben teki na bosroiti foe tjari wan grontapoe vroedoe kon. Na bijbel e taki: „Foe datede Gado ben si dati na ogridoe, foe libisoema ben kon de pasa marki tapoe grontapoe en dati ibri lostoe foe den prakseri foe hen ati alaten soso ben de takroe. Foe datede Jehovah ben taki: ’Mi sa kiri poeroe tapoe grontapoe den libisoema, di mi ben meki.’” — Gen. 6:5, 7.
5 Gi wi alamala, jongoe nanga owroe wan leri de ini disi en dati na disi: Jehovah abi wan presi gi hen troe dienstknegti en den moe tan hori fasti na a presi disi tapoe wan joisti fasi. Ja, fe kan de wan diri sani gi Jehovah, wi moesoe sabi na presi foe wi ini na seti foe hen en hori fasti na dati. Oen jongoewan, san de na joisti presi foe oen?
NA PRESI FOE DEN JONGOEWAN INI NA SETI FOE GADO
6. (a) San de na joisti presi foe wi? (b) San e meki dati wi de diri ini na ai foe Jehovah?
6 Foedi Jehovah lobi libisoema en e broko-ede nanga den, meki a ben gi hen Manpikin Jezus Kristus foe poti na joisti presi gi wi alamala. Kristus ben poti na fundamenti foe wan kristen maatschappij. Ini na ten disi na maatschappij dati foe troe aanbegiman de na mindri Jehovah Kotoigi. Na joisti presi foe datede gi jongoe nanga owroewan de ini na kristen maatschappij disi. Ma prakseri disi: wan soema no e kon de wan diri sani ini na ai foe Jehovah soso te a de fisiti den konmakandra foe Jehovah Kotoigi ofoe e de makandra nanga den; na banti disi e kon moro foeroe foe na getrouwfasi foe wan soema nanga Jehovah! „San den e soekoe . . .” so 1 Korinte 4:2 e taki, de „dati den feni ibri soema getrouw.” Wan getrouw pikin foe siksi ofoe ti-na-siksi jari de moro diri ini na ai foe Jehovah leki den makti engel di ben libi den joisti libipresi en no ben tan getrouw. Den engel dati no abi no wan presi moro ini na seti foe Gado.
7. San de na moro prenspari wroko di wi alamala moe doe?
7 Wi alamala — jongoe en owroewan, man nanga oema di de wan pisi foe na kristen maatschappij, moe doe getrouw en makandra wan toemsi prenspari wroko. Na wroko dati de, dati wi moe meki na prakseri foe wi Tata bekenti en foedi wi e taki foe hen, doe diniwroko leki hen kotoigi. Soso te wi doe disi, dan wi de tapoe wi joisti presi. Na di foe 148 Psalm e taki: „Prijse Jah . . . oen jonkoeman en ooktoe oen wendje, oen owroesoema makandra nanga den boi. Dati den prijse a nen foe Jehovah.” Jongoe soema e kisi spesroetoe na dekati: „Prakseri now oen moro bigi Mekiman ini den dé foe oen jongoe jari.” — Pred. 12:1.
8, 9. (a) Fa densani di no abi wan sili e doe den wroko ini den sani di Gado meki? (b) Fa wi moe meki na prakseri foe sainde wi e libi kon troe?
8 Na aksi de: Joe de tapoe na joisti presi? Joe e prijse Jehovah troe troe? Opo na bijbel foe joe pikinso na a di foe 148 psalm dati. Loekoe fa alaten baka na dekati e gi foe prijse Jehovah. Na son, na moen, den stari, den bon, den fo-foetoe meti nanga den fowroe, ja, ala meki sani foe Gado e kisi na tranga foe prijse hen. En prakseri pikinso tapoe sortoe moi fasi den e doe disi. Na opo foe na son ofoe na dongo foe na son, di e de nanga moi moi kloroe, de wan bigi grani gi na Mekiman foe na son. Den stari foe neti, di de tapoe wi ede leki moi diamanti tapoe blaka fluweel, ofoe na solfroe kloroe moen di e skijn tapoe den skwala foe na se, e tjari kon na krin dati wan bigi Architect de frantwortoe foe ala den moi sani disi. Na instinctief koni foe meti, na fré di fowroe e fré foe wan presi go no a tra presi — wi ben sa kan go doro en ben kan si fa den sani di Jehovah ben meki, e prijse hen troe troe. Ma fa a de nanga oenoe, „oen jonkoeman nanga wendje”, ofoe foe taki tra fasi, oen jongoe man nanga jongoe oema?
9 Na skin foe oenoe foe hensrefi de kaba wan grani gi Jehovah. Na moifasi, nanga na gaw en koni fasi di wan jongoe sportman ofoe oema e bewégi hensrefi, e sori tapoe na wroko foe wan Meesterontwerper. Ma libisoema ben meki ooktoe foe prijse Jehovah nanga na getrouwfasi di den e tjari den libi foe den en nanga den boen sani di den e taki foe hen nanga hen wroko. Wi moe abi na fasti bosroiti leki na psalmsingiman David, di ben taki: „Mi mofo sa prijse Jehovah grani.” Ooktoe na fasi fa wi e tjari wisrefi moe de wan eksempel. Kristen soema e kisi na tranga „foe drai libi sande ogri, en foe doe san boen” (Ps. 145:21; 1 Petr. 3:11). Joe e sori dati joe e warderi Jehovah foe na boen-ati foe hen, foedi joe e prijse hen tapoe na fasi disi? Joe de tapoe joe joisti presi?
OKASI FOE PRIJSE JEHOVAH
10. Fa kristen jongoewan son tron kan prakseri foe na positie foe den ini na gemeente?
10 A wan sari sani foe si dati libisoema abi na firi foe broko den ede foe positie. Den discipel foe Jezus ben broko-ede foe disi. Jakobus nanga Johannes ben aksi srefi ofoe Jezus ben kan gi den wan prenspari presi na sé hen ini hen kownoekondre (Mark. 10:35-37). Son foe den jongoewan ini na ten disi abi net so wan fasi toe. Den e feni dati den no abi grani ofoe okasi foe doe sani ini na gemeente. ’Mi de wan pikin ofoe wan tini nomo. San mi kan doe?’ kande den sa aksi. Tog, oen jongoewan joisti abi spesroetoe okasi foe prijse Jehovah.
11. Sortoe spesroetoe okasi jongoewan abi foe prijse Jehovah?
11 Ini wan bigi pisi foe na jari, oenoe de ini krosibé contakti nanga skoromati, so toe méstri nanga leriman. Soboen, wan skijnwerper e poti tapoe na fasi fa oen e waka en libi, foedi foeroe soema e si oenoe. Aksi joesrefi: Na fasi fa mi e waka en libi e de leki wan grani gi Jehovah, na Gado di soema taki mi de wan nanga hen? Hori na prakseri dati na fasi fa joe e waka nanga libi kan de wan grani gi hen ofoe sa poti sjen tapoe hen. En djaso ete wan sani de foe teki na prakseri: Mi e gebroiki den okasi na skoro foe taki foe den prakseri foe Jehovah? Na fasi foe wi no moe de leki di foe na psalmsingiman: „Mi mofo sa taki foe na grani foe Jehovah?” (Ps. 145:21). Foeroe kristen jongoewan e si na sani so, dati skoro de na „gebied” foe den, sodati den e de nanga ai foe den okasi foe gi kotoigi. Joe e doe disi toe?
12. (a) Foe sainde jongoewan e feni hen moeiliki foe gi kotoigi na skoromati nanga méstri? (b) San wan jongoewan ben ondrofeni?
12 Son jongoewan e feni hen moeiliki foe gi kotoigi na den skoromati ofoe méstri foe den. Wan reden de, dati den e sjen pikinso foe soema sabi den leki bijbelondrosoekoeman ofoe dati den de soema di abi belangstelling foe taki foe Gado. Wan tini ini California ben proberi foe trawan no moe sabi dati hen de wan kotoigi foe Jehovah. Soleki joe kan verstan, dan disi no ben meki a de moro kolokoe, foedi a ben de alaten nanga skreki-ati dati wan soema ben sa kon sabi dati. Te foe kaba, na tini disi go prakseri na tori disi ernstig. A ben abi na overtoigi dati a ben abi na troe bribi, soboen, foe sainde a ben sa moe sjen foe dati? A ben teki na bosroiti foe taki na publiki foe hen religie en na boen okasi foe sori trawan krin na redelijkheid foe bijbel leri. No wawan te foe kaba, dati disi meki hen moro kolokoe, ma a ben wini ooktoe na respeki foe foeroe leriman nanga skoromati.
13, 14. San de wan toe okasi foe gi kotoigi tapoe skoro?
13 Na tini disi ben si dati tapoe skoro foer okasi de foe meki bekenti na fasi fa Gado e si sani. Oenoe kan feni den okasi disi ooktoe. Foe eksempel, na klas ben sa kan loekoe den boekoe foe wan ofoe tra barinem skrifiman, di ben skrifi foe na sili ofoe wan tra tori di abi foe doe nanga na bijbel. Ini na opstel foe joe ofoe ini na taki-makandra ini na klas joe ben kan sori tactvol fa na fasi fa na skrifiman e si na tori , de tra fasi nanga san na bijbel e taki foe na tori (Ezech. 18:4; Pred. 9:5, 10). Kotoigi ini den tini-jari ben doe disi troe troe en disi ben opo na pasi foe taki moro fara tapoe skoro foe na bijbel.
14 Tapoe wan seker momenti ini na skoroten na tori foe na bigin foe libisoema e kon foe taki ini na klas, en ooktoe dan wan moi okasi de baka foe gi kotoigi. Joe kan gebroiki tori foe na boekoe Is de mens ontstaan door evolutie of door schepping? (Libisoema ben doe kon foe evolutie ofoe foedi Gado meki den?), en ini na boekoe dati bewijsi e gi, dati Gado ben meki sani. Kotoigi ini den tini-jari ben doe disi en leki wan bakapisi foe dati, den ben prati foeroe foe den boekoe disi gi skoromeester nanga skoromati. Ooktoe a kan de so, dati ini na klas foe oenoe tori kon foe taki leki meki mofo, seksualiteit, drug, dringi foe sopi pasa marki ofoe tra tori. Foeroe tron a ben de so dati kristen jongoewan ben tjari na boekoe Maak je jeugd tot een succes, pe ala den tori disi ben taki, en skoroméstri soleki skoropikin ben njan boen foe na boekoe disi.
15-17. (a) Sortoe moi ondrofeni jongoewan ben abi tapoe skoro nanga na gi foe kotoigi? (b) Sortoe toe aksi kristen jongoewan moe aksi densrefi?
15 Kristen jongoewan tapoe na heri grontapoe, di de getrouw en nanga opo ai en di e teki fesi foe doe sani, e gi wan toemsi moi kotoigi tapoe skoro. Wan kristen jongoewan e skrifi foe eksempel: „Ini den pauze di de mindri den joeroe foe les, mi ben abi foeroe okasi foe gi kotoigi, spesroetoe na a ten foe den féstidé. Spesroetoe, foedi mi ben libi boekoe nanga bijbeltori tapoe mi tafra, sodati trawan ben kan si disi, meki foeroe skoropikin di wani sabi moro ben kon na mi. Na moro moi ondrofeni di mi ben abi ben de nanga mi skoromisi di e gi maatschappijleri. Mi ben libi gi wan foe den skoropikin foe hen wan boekoe en di na meisje ben lési disi tapoe wan seker dé ini na klas, na maatschappij-skoromisi disi ben si disi, en a aksi hen pe a ben feni na boekoe.” Na bakapisi? Baka wan pisi ten, ala dé ini na bakadina-pauze bijbel takimakandra ben e hori nanga na skoromisi. Te foe kaba, wan toe foe den skoropikin ben bigin foe go fisiti den kristen konmakandra. Na skoromisi ben go so moi na fesi, dati a ben tron wan Kotoigi di gi hen srefi abra!
16 Ini wan tra eksempel, wan jongoe Kotoigi ben meki hen wan gwenti foe gi na hen skoroméstri den tijdschrift De Wachttoren nanga Ontwaakt! Wan toe dé na baka nanga respeki a ben aksi hen méstri: „Fa joe ben feni na tori di ben tanapoe ini na tijdschrift?” Ini na bigin na méstri ben doe leki a no ben verstan den aksi foe na leerling. Na tan hori doro foe na tini nanga respeki esesi ben abi krakti tapoe hen. Na méstri go redeneer dati efoe hen e tanapoe a tapoe dati na leerling foe hen moe arki hen foe kon sabi wetenschappelijk tori, dan hen foe hen sé ben moe doe wan sani nanga a hori doro di na leerling foe hen e hori doro foe hen leri moro foe na bijbel. Na so foeroe bijbel takimakandra foe tori ini den tijdschrift ben bigin. Te foe kaba na méstri disi teki wan abonnement tapoe den tijdschrift, ben go makandra nanga hen osofamiri na a Koninkrijkszaal e a ben tron wan dopoe Kotoigi!
17 Den sortoe ondrofeni-tori disi e kon foeroe. Ja, doesoen doesoen soema ben kisi wan sabi foe na waarheid foe Gado, foedi jongoewan ben gi kotoigi tapoe skoro. Joe leki wan kristen jongoewan abi nofo dekati nanga lobi gi Jehovah foe stré gi hen wortoe nanga gronprakseri? En san de net so prenspari toe: Joe abi na moreel krakti foe waka en libi akroederi den regvaardiki marki foe Gado? Efoe disi de so, dan joe de wan pisi foe wan bigi groepoe jongoewan tapoe na heri grontapoe, di e hori den joisti presi. Den gebroiki den okasi foe den foe prijse Jehovah.
18. Foe sainde nofo tron jongoewan kan gi wan extra boen kotoigi?
18 Jongoewan nofo tron kan gi wan boen kotoigi. Oenoe gewoonlijk kan feni hen moro boen nanga tra jongoewan; Oenoe foe taki hen so, kan taki na „tongo” foe den. Son bigisma ooktoe wani foe arki na oenoe, oen jongoewan, soleki den owroe soema ini na tempel foe Jeruzalem ben arki na a twarfoe jari Jezus (Luk. 2:46, 47). No veragti foe datede na toemsi moi bijdrage di oenoe kan gi. Efoe oenoe opo oenoe srefi gi disi, dan Gado kan gebroiki oenoe tapoe wan prenspari fasi ini na meki kon troe foe hen prakseri foe meki na boen njoensoe foe na kownoekondre préki tapoe na heri grontapoe bekenti. — Matt. 24:14.
19. Fa jongoewan kan de leki wan grani gi Jehovah ini na kristen gemeente?
19 Ooktoe inisé foe na gemeente jongoewan kan gi wan bigi bijdrage na a prijse foe Jehovah. Ini na grontapoe foe now, foeroe jongoewan e gebroiki doti-taki, en den no e weri krin en den no abi boen maniri. Te oenoe, jongoe kristen, soboen abi respeki, de netjes en ala sani seti boen en oen abi wan opregti belangstelling gi jeje afersi, dan disi e meki wan boen indruk tapoe soema di e fisiti na Koninkrijkszaal. Den e kon spesroetoe ondro na indruk te den e jere oenoe e hori wan, boen oefenlezing di oen ben sreka na fesi ofoe te den e arki oenoe te oenoe de gi enthousiast en nanga opregti overtoigi commentaar, ofoe te den e si foe eksempel dati oenoe e sorgoe gi den waka-microfoon, e taki trawan odi na fesi en baka na konmakandra, e jepi na a boekoe-tafra en e jepi foe krin na zaal. Ja, fisitiman kan kon so ondro na indruk foe na eksempel di oenoe leki jongoewan e gi, dati disi e bewégi den foe taki foe na gemeente: „Gado de troe troe ini oen mindri.” — 1 Kor. 14:25.
20. Sortoe fasi jongoewan no moe abi foe datede, en sortoe vertrouw den kan abi?
20 Soboen, no teki wan negatief fasi: „Mi de soso wan pikinnengre ofoe wan tini. San mi ben sa man doe?” Joe kan doe foeroe sani, di de wan jepi gi joe brada nanga sisa en di de leki wan grani gi Jehovah. En joe kan abi na vertrouw dati Jehovah sa si disi en sa pai joe. „Bikasi Gado no de onregvaardiki, sodati a sa frigiti na wroko foe joe nanga na lobi, di joe ben sori gi hen nen, foedi joe ben dini den santawan en e tan dini den.” — Hebr. 6:10.
21. San de wan toe afersi di wi ben wani poti prakseri ini na tra artikel?
21 A de troe dati a no de makriki foe dini Jehovah ini na takroe grontapoe pe wi e libi na ini, spesroetoe den jongoewan. Foeroe druk e kon foe proeberi foe dwengi oenoe foe libi na joisti presi foe oenoe. Den tesi de bigi en na a srefi ten bijna no de foe si. No frigiti, dati srefi wan toe foe den engel foe Gado ini hemel ben kon ini na tesi foe libi den joisti presi en leki wan bakapisi foe dati lasi foe tégo na boen-ati foe Jehovah. En san ben meki den ben gwe? Seks lostoe di no ben de joisti. A no moe de foe datede wan froewondroe sani gi wi dati den moro prenspari tesi ini disi ten de tapoe na tori foe seks. Meki wi go loekoe wan toe fasi foe druk foe na grontapoe, di abi leki marki foe broko na bribi foe jongoe kristen.