Jongoewan, kaka foetoe gi grontapoe fasi foe druk!
„No meki na grontapoe, di lontoe joe kwinsi joe go ini hen égi vorm.” — Rom. 12:2, „Philips”.
1, 2. (a) Tapoe sortoe vermane wi wani poti ernstig prakseri? (b) Foe sainde spesroetoe now, a de toemsi prenspari foe loekoe na vermane disi?
NA BIJBEL e gi wi nofo tron tranga foe kaka foetoe gi den moeiti foe Didibri foe poeroe wi foe na smara pasi foe libi. Na apostel Paulus ben skrifi foe eksempel: „No meki na grontapoe, di lontoe joe kwinsi joe go ini hen égi vorm.” Prakseri ernstig foe na vermane disi ini Romeini 12:2. A ben skrifi foe kibri en tjari wi. Dja na tapoe sé wi teki a tekst poeroe foe The New Testament in Modern English foe na anoe foe J.B. Phillips, ma a boen ooktoe foe lési tra vertaling, di e taki: „No meki na fasi foe waka nanga libi foe na grontapoe seti joe” (Jeruzalem Bijbel). “Joe no moe teki den gwenti foe disi grontapoe” (An American Translation). “No kon de leki na seti foe sani.” — Nieuwe Wereldvertaling.
2 A de moro tranga fanowdoe leki sortoe tra ten, dati wi loekoe boen foe no kon de leki na seti foe sani. Foe sainde? Foedi, a no langa pasa kaba — ini na libiten foe miljoen miljoen soema di e libi ete — Kristus ben iti poeroe foe hemel Satan nanga hen engel. Baka te na bijbel ben skrifi foe na doe disi, a de taki: „Heloe foe grontapoe nanga se, bikasi Didibri saka kon na oenoe, en a abi bigi atibron, foedi a sabi dati a abi soso wan pikin ten ete” (Openbaring 12:9, 12). Wi e libi na a momenti disi leti mindri na sjatoe ten disi foe heloe! Foe datede meki Satan ini hen atibron e poti druk tapoe wi ini wan krakti moeiti foe tjari wi so fara foe fiti wisrefi na a waka en libi foe na grontapoe. Fa a de doe dati?
SEKS DI NO MAG
3, 4. Sortoe methode ben gebroiki ini na te di pasa nanga foeroe winimarki foe poeroe Gado dienstknegti foe wan getrouw waka nanga libi?
3 Efoe wan methode abi winimarki, a no de wan logisch sani dan, dati Satan sa tan gebroiki hen? We, san ben de ini na tori foe tjari engel so fara foe libi na joisti libipresi foe den ini hemel? Ja, a ben de verkeerti lostoe foe seks (Gen. 6:1-4; Judas 6). Loekoe ooktoe san ben pasa sjatoe bifo den Israëlsoema ben hari go ini na kondre Kanaän, baka di den ben waka lontoe bijna fo-tenti jari ini na sabana. Di den Moabiet soema ben si den, wan „frede di ben meki den siki” ben kon tapoe den. Disi ben kon, foedi den Israëlsoema ben de so foeroe en foedi na blesi foe Jehovah ben de tapoe den (Num. 22:1-3). Foe datede meki den Moabietsoema ben joeroe na proféti Bileam, foe doe moeiti dati Gado ben kon so fara foe vroekoe den Israëlsoema. Na plan disi no ben waka boen. Te foe kaba Bileam, ondro na tiri foe Satan, ben kon nanga wan plan di ben abi winimarki. Sortoe plan disi ben de?
4 Bileam ben gi den oema foe Moab nanga Midian na rai foe sori den Israëlsoema, dati den lobi foe teki den na den mindri, en disi den ben doe ooktoe foe kari den kon na wan fésti njanjan, pe joe ben abi na moro boen njanjan nanga na moro boen win. Den Israëlsoema . . . ben kon boboi densrefi leki wan bakapisi foe na njan foe na boen njanjan en na dringi foe na tranga-ede win en nanga disi dansi ben gebroiki foe wiki den lostoe foe den. Den ben meki na tan-na-ai foe den kon slap, sodati den oema disi ben kori den Israëlsoema foe abi seks nanga den. Den ben kisi den Israëlsoema so fara srefi dati den ben boigi gi falsi Gado. Nanga sortoe bakapisi? Jehovah ben kisi atibron nanga hen pipel en a ben kiri 24.000 foe den! Go prakseri disi pikinso: den 24.000 disi ben de klari foe hari go ini Kanaän — na Pramisi Kondre — baka foeroe jari di den ben waka lontoe ini wan dré sabana. Tog den no ben kisi na kon troe foe na pramisi, foedi den ben meki den kori den foe doe hoeroedoe! — Num. 25:1-9; 16:18; 31:16.
5. Sortoe parallel wi kan si mindri den Israëlsoema di ben de foe go ini na Pramisi Kondre nanga na positie foe wi ini disi ten? San wi kan verwakti soboen, dati Satan sa proeberi foe doe?
5 Te joe loekoe na situatie foe wi ini disi ten, joe kan si wan parallel? Disi de troe troe (1 Kor. 10:11). Wi de na a mofodoro foe Gado seti foe sani di Gado pramisi, klarklari foe go na ini, soleki den Israëlsoema di ben de foe go ini na Pramisi Kondre. San joe ben sa verwakti dati Satan ben sa proeberi, efoe joe loekoe den eksempel foe fositen? Ja, a ben sa proeberi foe tjari na pipel foe Gado go ini situatie, pe den sa doe hoeroedoe, sodati Jehovah no ben sa feni den boen foe go ini hen regtvaardiki njoen seti.
6, 7. Sortoe bewijsi de dati na grontapoe e libi regtvaardiki moreel marki na wan sé?
6 Joe no e agri, dati na hoeroedoe foe na grontapoe foe Satan de wan troe troe ogri sani gi na jeje gosontoe foe kristen soema ini disi ten? Loekoe fa na grontapoe poti regtvaardiki wet na wan sé. Di wan kroetoe-bakra ini New Mexico (Amerkan kondre) ben lési strafoe ini wan tori pe wan twenti-na-dri jari oema ben doe hoeroedoe nanga wan boi foe tina-féfi jari, a ben taki dati na doe disi ben kan doe en dati wet no e tapoe hen. „Na lanti di e meki wet, ben poeroe hoeroedoe leki wan ogridoe”, a ben skrifi. „A ben erken na fasi foe libi, dati disi no de tegen den boen gwenti foe na twintigste eeuw.” Akroederi nanga na bosroiti disi, na koranti Express foe Easton (Pennsylvania, Amerkankondre) ben taki: „Na seks revolutie pasa kaba en seks ben wini. Na moro foeroe foe den tini no e gebroiki seks moro langa foe meki oproeroe nanga makti di de na den tapoe. Gi foeroe soema seks de wan pisi foe den aladé libi.”
7 Son owroesma no e verstan kande foeroe san jongoesma e ondrofeni ibri dé tapoe na tori foe hoeroedoe. Boen foeroe foe den jongoewan foe now e bigin froekoe kaba ini den tini jari ofoe na fesi nanga seks activiteit en grati go ini seks-libi de wan tori foe aladé. Studi e sori dati moro leki wan tapoe féfi Amerkan oemapikin ini na ten foe tina-siksi jari gi den srefi abra na seks — en ini son tra kondre na nomroe de srefi moro bigi. Na tijdschrift Time e taki foe wan opini-ondrosoekoe di na tijdschrift Redbook ben meki na mindri 18.349 soema: „90 procent foe den wan ondro 25 jari e verteri dati den ben doe hoeroedoe bifo den ben trow . . . Bijna ala oema — 89 procent — ben doe orale hoeroedoe.”
8, 9. (a) O bigi na druk de foe doe hoeroedoe? (b) Joe e si ini na gemeente bewijsi, di e sori dati soema e fadon gi na druk disi?
8 Na druk di e kon tapoe jongoewan foe doe hoeroedoe, de toemsi bigi. Wan wendje foe twenti-na-toe jari ben kragi: „Efoe na ten te joe de tina-aiti jari en joe no abi ondrofeni foe seks ete, dan a moro boen den sroto joe ini wan klooster. Ala den oemapikin di de mati foe mi ben gi densrefi abra na seks sensi na ten foe middelbare skoro. Den ben spotoe mi sote, dati mi bigin verteri ala sortoe lé tori fa mi grati go ini seks, soso foe mi verdedig misrefi. Mansoema e ondrofeni foe na sé foe den soema di den e miti aladé moro druk foe doe hoeroedoe, foedi moro jongoeman e doe hoeroedoe leki jongoe oema. Ini wan Fransi tijdschrift den ben taki foe eksempel, dati, aladi 28 procent foe den Fransi oema- pikin no de wendje moro, 54 procent foe den tina-féfi jari Fransi boi ben doe hoeroedoe.
9 Aladi a de wan sari sani, den bericht di e kon na ini e sori dati ooktoe foeroe jongoe kristen e fadon gi na druk foe wan grontapoe di den prakseri de tapoe seks, soleki den 24.000 Israël- soema foe owroeten ben fadon gi na hoeroedoe foe den oema foe Moab nanga Midian. Disi de wan trapoe di Satan e gebroiki te now foe meki den dienstknegti foe Gado fadon! San wi kan doe foe kibri wisrefi en ondrofeni na blesi foe Jehovah?
NA FASI FA FOE DE NANGA SOEMA FOE NA TRA GESLACHT
10. Fa Gado e loekoe hoeroedoe? (1 Kor. 5:1, 9-13).
10 Na a fosi presi a de toemsi prenspari foe doe leki fa Jehovah e sori en no loekoe den wet foe hen Wortoe leki den komoto foe libisoema. Hoeroedoe-man no sa kisi den blesi foe na Kownoekondre. „Lon komoto gi hoeroedoe” na bijbel e gi komando. „Gado sa kroetoe hoeroedoe-man nanga soetadoeman” (1 Kor. 6:9, 18; Hebr. 13:4). No wan enkri libisoema wet no kan kenki na wet foe Gado. Dati libisoema e teki en feni boen san verkeerti, no e meki ete dati a de joisti ini na ai foe Jehovah. Seks-libi mindri soema di no trow de fowtoe; a de wan ernstig sondoe, wins san soema e taki ofoe doe ini disi. Tapoe na „njoen grontapoe” presi no sa de gi hoeroedoe soema (Openb. 21:1-4, 8). Foe datede, san disi wani taki foe na fasi fa wi moe tjari wisrefi nanga wan soema foe na tra geslacht? San wi taki foe eksempel foe na meki foe mofo?
11. (a) San na Wortoe foe Gado e taki foe trow nanga wan soema di no e aanbegi Jehovah? (b) Foe sainde na rai disi e fiti ini na te disi?
11 Na wet di Gado ben gi den Israël soema foe na trowlibi, ben de so: „Oenoe no mag trow nanga den. Oenoe no mag gi oen oemapikin na den manpikin foe den, en oenoe no mag teki den oemapikin foe den gi oen manpikin.” Na a srefi fasi, kristen soema e kisi na rai „foe trow soso ini Masra”, nanga tra wortoe, soso nanga tra aanbegiman foe Jehovah (Deut. 7:3; 1 Kor. 7:39). So-wan marki kan gersi leki a de tapoe joe toemsi. Ma disi de so troe troe? Te joe loekoe fa hoeroedoe e de so foeroe ini na grontapoe foe now, dan na rai disi e fiti en de net so boen leki di Gado pipel ben libi na mindri den pori Kanaänsoema ofoe mindri den soema foe na owroe Korinte di ben poti den prakseri soso tapoe seks. Soboen, te wi e kisi na vermane foe no trow nanga wan soema foe wan tra bribi, a no ben sa de ooktoe wan sani di no de joisti foe meki mofo nanga hen?
12. (a) San na wan mofo? (b) Foe sainde a ben sa de wan sani di no de wan verstan sani foe meki wan mofo nanga den soema di no e dini Jehovah?
12 San a wani taki meki wan mofo? Webster’s Third New International Dictionary e taki hen so: „Wan akroederi mindri toe soema foe ala toe geslacht foe abi makandra prisiri ini wan ofoe tra switi activiteit.” Ma troe aanbegiman foe Gado kan abi nanga soema di no e dini Jehovah „prisiri ini wan switi activiteit”? Prakseri baka den 24.000 Israëlsoema di ben doe disi wel. Boiti dati, wan mofo abi gewoonlijk na marki foe leri sabi moro boen wan trowpatna foe na ten di e kon. Te joe hori na rai foe na bijbel na prakseri, dati wan aanbegiman foe Jehovah no moe trow nanga wan soema foe wan tra bribi, dan a no ben sa de wan verstan sani foe meki mofo nanga so wan soema ofoe teki na mofo di meki. Ma san wi kan taki foe na meki foe wan mofo nanga wan tra kristen?
13, 14. Fa soema e si gewoonlijk fasti verkering, ma san e komoto nofotron foe disi?
13 Foeroe druk e oefen tapoe jongoe kristen foe meki mofo. Leki fa wan Gallup-opinie-ondrosoekoe e sori wi, dan wàn tapoe dri Amerkan tini-oemapikin e taki, dati den abi fasti verkering. Ma a de wan verstan sani foe meki mofo tapoe so wan fasi? San kan pasa? Wan meisje e poeroe kon na krin: „Na problema e kon te mi de nanga wan boi di mi lobi en wi e waka tapoe wan doengroe pasi ofoe te wi sidon tapoe na bangi ini mi kamra . . . ’Na tron disi mi sa meki a de sondro fowtoe’ mi e poti ini mi prakseri, ma wi e bosi en pré nanga makandra so langa, te leki mi e lostoe so tranga dati na boi go didon na mi.”
14 Joe sa taki dati disi de wan fasi foe doe di de ongewoon ofoe abnormaal? Kwet-kweti; a de heel normaal. Wan tra jongoe soema e skrifi ooktoe: „Efoe toe jongoe soema e si makandra moen en jari langa ibri mamanten, bakadina nanga neti, dan a de so dati bijna a no kan dati den no tron boen krosibé mati foe makandra. Baka wan pisi ten dan hori makandra anoe nanga bosi no de aparti moro en den e denki dati den lobi makandra. Mi de tina-aiti en mi abi wan baby foe wan moen . . . Ja, wi ben moe trow, soboen mi denki dati mi sabi foe san mi e taki.” Bewijsi de foe san na tini disi taki. Ondro na tori „Na epidemie foe tini di de nanga bere”, na New York Times foe 18 juni 1978 e taki: Ibri jari so wan miljoen tini-oemapikin e kisi bere, wan tapoe tin ini den jari foe 15 te miti 19. So wan 600.000 foe den e meki troe troe wan pikin en na gebortoe nofotron e tjari bakapisi kon, di e poti wan doengroe tapoe na libi foe na mama.” Den sortoe tori disi de troe troe ernstig en meki wan soema kon de nuchter.
15. (a) San son soema e taki foe na meki foe mofo foe den jongoewan foe sori dati a no de ogri? (b) Ma wan soema di lobi Jehovah, kan go poti hensrefi ini ogridoe en sortoe eksempel de foe disi?
15 Ma son soema sa taki kande foe sori dati a no de ogri foe meki mofo: „Wi de kristen soema. Wi sabi dati hoeroedoe fowtoe en foe datede wi no sa fadon go ini den sortoe sani dati.” Foe troe, joe no sa abi na plan foe go na ini. Ma te joe de nanga wan soema di joe e firi gi hen, dan na seks lostoe kan hari joe go ini ogri. Loekoe pikinso kownoe David, di ben de wan spesroetoe dienstknegti foe Jehovah, wan „man di ben de wan prisiri gi Gado ati”. A ben sabi na wet foe Gado. A ben sabi dati a ben verkeerti foe abi seks-libi nanga Bethséba, na oema foe wan tra man. Tog a ben doe dati. Foe sainde? Foedi a ben gi pasi foe kon ini wan positie foe seks lostoe ben kan kori hen. — 1 Sam. 13:14; 2 Sam. 11:1-4.
16. (a) Sortoe demakandra de moro boen gi jongoe kristen? (b) O voorzigti soema di e meki mofo moe de, bikasi den abi ernstig trowplan?
16 Soboen, a de troe troe prenspari foe de voorzigti te a de kon tapoe na tori foe meki wan mofo. A de wan boen sani te jongoe soema kan kon makandra foe prisiri nanga makandra, ma disi kan pasa moro betre ini wan groepoe na presi dati wan paar den wawan e hari go koiri. Kande den papa nanga mama nanga tra bigisma ini na gemeente, kan orga ten na ten picnick ofoe tra gosontoe, switi demakandra. Ma na den sortoe okasi dati a de toemsi prenspari, dati kristen soema loekoe boen, dati na fasi foe waka nanga libi foe den ala ten de wan grani gi na Gado di den e aanbegi. Efoe joe abi trowplan en joe e meki geregeld mofo nanga na toekomstig patna foe joe, dan a de wan sani foe verstan, dati oen wani de wan pisi ten nanga makandra foe taki nanga makandra foe égi afersi ede. Ma joe moe loekoe boen, dati joe no go fréri hebi en disi kan tjari joe go ini hoeroedoe. A de wan verstan sani foe no go soekoe presi pe joe de aparti foe tra soema en di kan meki joe fadon go ini fréri.
DISCOPOKOE NANGA DISCOTHEEK
17. (a) San na discotheek nanga discopokoe? (b) O popu den de?
17 Foeroe jongoewan e feni hen wan ontspanning foe arki na discopokoe en dansi tapoe dati. San wi kan taki foe na go na discotheek? Discopokoe kon de toemsi popu en discotheek de presi foe go prisiri. Discotheek — disco te joe taki hen sjatoe — de presi pe grammafoonplaat e drai foe soema kan dansi, aladi son tron dansi-orkest e de „live” drape toe. Na disiten discopokoe abi na spesroetoe marki, dati na ritme alaten joe e jere hen baka en disi de spesroetoe foe den modern dansi. Ala sortoe difrenti presi abi na nen disco, foe pikin nightclub nanga wan pikin presi foe dansi te go miti den bigi nanga moi dansi-oso. Soso ini na foto New York wawan joe abi moro leki 1500 disco. „Na wan enkri sani, di e meki den okasi disi, di no de a srefi, de wan”, so na tijdschrift Esquire e tjari kon na krin, „de na pokoe nanga na algemeen sfeer foe wiki den lostoe foe joe.”
18. Sortoe aksi de tapoe na tori foe disco? En foe sainde?
18 Den presi disi de boen presi pe kristen kan de foe abi ontspanning? Disi de wan aksi di foeroe soema ben aksi. Teki foe eksempel na brifi foe wan tina-siksi jari meisje, di e sari foe na krakti di na go na disco ben abi tapoe na moro owroe sisa foe hen. „Joe sabi a de toemsi prenspari”, so a de skrifi, „bikasi mi e bribi now dati mi sisa ben sa kan lasi na tégo libi . . . Na aksi foe mi na oenoe, brada, na disi foe datede: Oenoe ben sa wani de so boen foe druk wan artikel foe na krakti nanga gevaar di den presi disi abi? Mi prakseri dati foeroe soema sa kisi jepi foe disi.”
19-21. (a) San wi kan taki foe disco? (b) Sortoe reden de, dati kristen soema moe tan farawe foe den presi disi? (1 Kor. 15:33; Joh. 17:16).
19 Meki wi loekoe foe datede disi: San na a „algemene sfeer foe wiki den loestoe foe joe” di de leki wan marki foe na moro bigi pisi foe den disco? Na koranti Daily News foe New York ben taki: „Ala sani di abi foe doe nanga disco de sexy — Na sensueel nanga theaterfasi fa a oso seti, Afrikan ritme foe na pokoe, na fasi fa den soema e weri krosi en a fasi fa den e dansi. Discodansi de wan moksi foe boigi, drai lontoe, seki joe djoenkoe . . . Ini disco den seksueel lostoe e kon moro tranga, moro bigi en e kisi grani.” Na tijdschrift Esquire ben sori tapoe „den foeroe leti pasa marki, den babari, ritme, bewegi, drug, vreemde drama, dren” en taki moro fara: „Ala sani e go so na hé leki wan soema kan teki; moro fara a de moksi nanga ala tra sortoe sani di pasa marki foe verkracht te foe kaba tapoe wan bigi fasi na presi foe na libisoema lostoe nanga sabi sani.”
20 Efoe na wan okasi foe dansi krakti e poti tapoe seks en den fisitiman moro foeroe no abi foeroe respeki gi den toemsi moi en gosontoe moreel marki di Gado Wortoe poti, dan a de krin dati disi no de wan boen presi gi wan kristen. Disi de so ofoe na okasi de now bekenti leki „disco” ofoe a abi wan tra nen. Hori na prakseri, dati na grontapoe foe Satan e doe ala moeiti foe kwins wi poti ini na vorm foe hen; a no de foe datede wan sani di wi kan verwakti, dati Satan ben sa gebroiki korifasi prisiri leki wan beti foe meki wi go ini wan trapoe? Hori ini prakseri fa den ben kori den Israëlsoema nanga san ben gersi na a bigin na teki prati ini prisiri di no ogri, ma ete 24.000 foe den ben lasi na okasi foe go libi ini na Pramisi Kondre. Wi no wani dati disi pasa nanga wi, a no so? Foe datede meki wi moe kaka foetoe gi druk foe na grontapoe; wi moe feti foe no gersi na seti foe sani disi. No meki a kori joe! Den wan di e kon ini moreel moeilijkheid — san e meki den e sluit den uit son tron — de nofotron soema di e meki hen wan gwenti foe go na disco nanga tra presi foe prisiri.
21 A kan de troe dati kande a no ala disco „den seksueel lostoe e kon moro tranga, moro bigi en e kisi grani.” Wan restaurant (njanjan oso) kan meki foe eksempel reclame dati a de wan disco, aladi na prisiri no de so bigi leki tra presi. We, a no de na frantwortoe foe na Tiri Skin ofoe den owroeman foe na gemeente foe taigi trawan dati den no mag go na so wan okasi (pe a prisiri no de so bigi), ma ala soema sa moe de toemsi voorzigti. A wan sani di de so, dati disco abi na nen foe no broko-ede kwet-kweti nanga den moreel skotoe. En ini disi de toe disco-pokoe. Na singiman en meki singiman Johnny Bristol ben si a fasi disi en a ben taki: „Na tapoe na momenti disi, ala sani ini pokoe de seks.” Kande wan toe discopokoe de di no pori na moreel fasi, soleki ooktoe wan toe boen film de ete. Na fasi disi de krin. Na prisiri foe na grontapoe pori en kon de takroe, foedi a meki tapoe wan korifasi foe meki soema bribi dati hoeroedoe nanga soetadoe no afoe de fowtoe. Ma den de fowtoe! En Gado sa „kroetoe soetadoeman”. — Hebr. 13:4.
22, 23. Foe sainde wan lepi kristen no sa go na discotheek, winsi a de feni dati a no e doe hen ogri kande na jeje fasi?
22 No prakseri, dati den sani di wi taki djaso de foe pori joe prisiri, ofoe joe de now wan tini ofoe wan bigisma. Kwet-kweti! Wi wani dati joe de kolokoe en dati joe njan boen foe wan gosontoe libi — foe tégo. Ma Satan abi hen korisani, prisiri — soleki a ben de ini owroeten — disi kan kori joe foe doe sani, so dati joe kisi na atibron foe Jehovah. Tan farawe foe den peti disi en jepi trawan foe tan farawe foe den toe. Aladi joe kan prakseri dati a no de doe joe ogri na moreel sé te joe e go na bepaalde discotheek, loekoe dan sortoe krakti disi kan abi tapoe tra kristen te joe e go na den presi disi. Foe di den e si dati joe e go na den, dan disi kan meki na de na ai foe den tapoe moreel gevaar kon slap, sodati den kan go ini fasi foe libi di fowtoe. Na apostel Paulus ben de klari foe libi sani, di no ben afoe de fowtoe, foe kibri na jeje gosontoe foe hen jeje brada. A ben taki srefi, dati „efoe njanjan sa meki mi brada naki foetoe, mi no sa njan noiti moro meti, foe mi brada no moe naki foetoe”. Efoe a ben sa de ini wi mindri ini na ten disi, joe ben sa kan denki dati a ben sa soekoe prisiri ini wan discotheek? — 1 Kor. 8:13.
23 Meki wi wroko foe datede makandra leki wan skin foe kristen soema foe kaka foetoe gi na druk foe grontapoe sodati wi alamala kan abi na boen ati foe Jehovah en kan libi ini hen regtvaardiki njoen seti foe sani.