Yongusma di e skèin leti
1. Fa Bijbel e sori taki Kresten ben o de heri tra fasi leki tra sma? Fa den wortu disi abi fu du nanga Kresten yonguwan na ini a ten disi?
1 Yesus ben taigi den disipel fu en: „Unu na a leti fu grontapu” (Mat. 5:14, 16). Neleki fa wan foto di de na tapu wan bergi e brenki na ini a leti fu son, na so a ben o de fu si taki den disipel fu Yesus de heri tra fasi leki tra sma. Na ini a ten disi furu yongu Kresten „e skèin leti na ini grontapu”, fu di den e tyari densrefi na wan fasi di fiti èn fu di den e gi kotoigi fayafaya.—Fil. 2:15; Mal. 3:18.
2. Na sortu fasi yu kan gi kotoigi na skoromisi, skoromeester, nanga den pikin na ini a klas?
2 Na skoro: Fa yu kan gi kotoigi na skoro? Son yonguwan teki na okasi fu gi kotoigi te takimakandra e hori na ini a klas fu tori soleki drugs, evolutie, Aids, èn fu tra tori tu. Wan sisa di ben musu skrifi wan tori di e taki fu terrorisme, ben teki na okasi dati fu gi kotoigi fu a Kownukondre fu Gado di de a wan-enkri tru howpu gi libisma. A skoromisi fu en ben fruwondru fu a koni fasi fa a sisa skrifi a tori, èn so a sisa kisi na okasi fu gi kotoigi moro fara.
3. Fa yu kan meki yu leti skèin na skoro nanga yepi fu a fasi fa yu e tyari yusrefi?
3 Wan tra fasi fa yu kan skèin leti na a fasi fa yu e tyari yusrefi, a fasi fa yu e weri krosi, èn a fasi yu e moi yusrefi (1 Kor. 4:9; 1 Tim. 2:9). Te den tra studenti, skoromisi, nanga skoromeester e si taki yu e tyari yusrefi na wan heri tra fasi, dan dati kan meki taki sonwan fu den wani sabi moro fu a waarheid èn na so fasi yu kan kisi na okasi fu fruteri den moro fu a Bijbel waarheid (1 Petr. 2:12; 3:1, 2). Kande a no makriki fu tyari yusrefi akruderi den markitiki fu Yehovah Gado, ma A sa blesi yu bogobogo te yu e du dati (1 Petr. 3:16, 17; 4:14). Efu yu wani hari sma prakseri nanga a bun nyunsu, dan yu kan leisi Bijbel publikâsi na ini a pauze, noso yu kan poti den publikâsi na presi pe trawan kan si en.
4. San na wan tu winimarki di yu kan kisi te yu e gi kotoigi na skoro?
4 Te yu e meki yu leti skèin na skoro, dan dati e tranga yu bribi èn a e yepi yu fu abi prisiri na ini a dini di yu e dini Yehovah (Yer. 9:24). Disi sa de wan kibri gi yu tu. Wan sisa ben taki: „Wan winimarki di mi kisi fu di mi e taki fu a bribi fu mi, na taki den studenti no e pruberi fu dwengi mi fu du sani di no e kruderi nanga san Bijbel e taki.”
5. (a) Fa son yonguwan e du moro na ini a diniwroko fu den? (b) Sortu marki yu poti na yeye fasi?
5 Du moro na ini a diniwroko: Wan tra fasi fa furu yonguwan e skèin leti, na te den e du moro na ini a diniwroko fu den. Wan brada di ben klari middelbaar skoro, ben froisi go dini na wan presi pe moro Kownukondre preikiman de fanowdu. A ben de na ini wan pikin gemeente pe wán owruman nomo ben de. „Mi e prisiri trutru taki mi dyaso”, na so a ben skrifi wan mati fu en. „A preikiwroko e gi mi krakti trutru! Na ibri oso wi e taki sowan 20 miniti fu di den sma wani fu arki ala san yu kan fruteri den.” A ben taki moro fara: „Mi e winsi nomo taki ibri yonguwan ben o du so wan sortu sani, so taki den kan firi tu san mi e firi. Nowan tra sani de moro bun leki fu dini Yehovah nanga ala san wi abi.”
6. San e meki taki yu e prisiri trutru nanga den yonguwan na ini a gemeente fu yu?
6 Wi e prisiri trutru nanga unu, yonguwan, di e skèin leti na ini grontapu! (1 Tes. 2:20) Na ini a dini di yu e dini Yehovah nanga yu heri ati, sili, frustan, nanga krakti, yu sa koti „wan hondro tron moro na ini a pisi ten disi, èn . . . na ini a grontapu sistema di e kon [unu] o kisi têgo libi”.—Mark. 10:29, 30; 12:30.