„De leki sma di e skèin leti”
1 Na ini a disiten seti fu sani di dungru na yeye fasi èn pe sma e tyari densrefi na wan fasi di no fiti, sowan siksi milyun anbegiman fu a tru Gado, Yehovah, „de leki sma di e skèin leti” na ini 234 kondre na heri grontapu (Fil. 2:15). Disi e meki sma si wantewante taki wi de tra fasi. Fa wi e skèin a warti leti fu a waarheid di e komoto fu Yehovah?—2 Kor. 3:18.
2 A fasi fa wi e tyari wisrefi: A fasi fa wi e tyari wisrefi e hari sma prakseri heri esi (1 Petr. 2:12). Wan uma ben si taki wan kompe wrokoman fu en di de wan Kotoigi, ben abi switifasi, a ben lobi fu yepi sma, a no ben taki dotitaki èn a no ben lafu te den tra wrokoman ben e fruteri doti lafutori. Te den tra sma ben e pruberi fu meki a Kotoigi kisi atibron fu di den e taki dotitaki te a e tanapu na ini den birti, dan a Kotoigi ben tan tiri ma toku a ben tan du san yoisti. Sortu krakti a ben abi tapu na uma? Na uma e memre: „A fasi fa a man disi ben e tyari ensrefi ben naki mi ati so te, taki mi bigin poti aksi gi en di abi fu du nanga Bijbel. Mi bigin studeri a Wortu fu Gado èn bakaten mi teki dopu.” Na uma e taki moro fara: „A fasi fa a man disi tyari ensrefi gi mi na overtoigi taki mi musu go ondrosuku san Yehovah Kotoigi e bribi.”
3 A fasi fa wi e si den tirimakti, a fasi fa wi e si den sani di sma na grontapu e du, nanga a bun fasi fa wi e taki, e hari sma prakseri. Leki Yehovah Kotoigi wi e hari sma prakseri fu di wi na sma di e libi akruderi den hei markitiki fu Bijbel. Den sortu bun wroko disi e gi Yehovah glori èn den e hari trawan fu anbegi en.
4 Den sani di wi e taki: A no de fu taki dati sma e si taki wi e tyari wisrefi na wan bun fasi. Ma efu wi no e taki nanga den fu den sani di wi e bribi, dan kande den no sa sabi fu san ede wi de tra fasi. Den sma nanga suma yu e wroko, noso den pikin nanga suma yu e go na skoro sabi taki yu na wan Kotoigi fu Yehovah? Yu e suku wan okasi fu gi kotoigi te yu e taki nanga den fu aladei sani? Yu teki a bosroiti fu ’meki ala sma si a leti fu yu’ na ibri okasi di fiti?—Mat. 5:14-16.
5 Efu wi wani de leki sma di e skèin leti, dan a e aksi fu wi taki wi no e prakseri wisrefi nomo. Te wi e du sani nanga wi heri ati, dan disi sa meki wi poti den sani di no de so prenspari na wan sei, so taki wi man du so furu leki wi kan na ini a preikiwroko fu meki disipel. A wroko disi e kibri a libi fu sma.—2 Kor. 12:15.
6 Meki wi tan de leki sma di e skèin leti, èn meki wi e sori dati nanga a fasi fa wi e tyari wisrefi èn nanga a fasi fa wi e taki. Efu wi e du disi, dan makandra nanga wi trawan sa wani fu gi Yehovah glori tu.