„Meki Un Leti Skèin”
1 A grontapu na wi lontu de na ini dungru, fu di sma no e hori densrefi na den gronprakseri fu Gado. Sma de na ini dungru na yeye fasi so srefi. A leti fu waarheid e puru kon na doro „den wroko [fu a dungru] di no e tyari froktu”, so taki wi kan wai pasi gi den sani disi di kan meki wi naki futu fadon èn lasi wi libi. Fu dati ede, Paulus ben frumane Kresten: „Tan waka leki pikin fu a leti.”—Ef. 5:8, 11.
2 Wan bigi difrenti de na mindri „a froktu fu a leti” nanga a dungru fu grontapu (Ef. 5:9). Efu wi wani tyari a froktu disi dan wi musu de heri bun eksempre na ini a fasi fa wi e libi leki Kresten, wi musu de den sortu sma di Yesus e feni bun. So srefi wi musu du sani nanga wi heri ati, wi musu abi opregtifasi, èn wi musu sori taki wi lobi a waarheid. Wi musu sori a froktu disi na ini wi aladei libi èn na ini a diniwroko fu wi.
3 Skèin Yu Leti Ibri Leisi te Yu Kisi na Okasi: Yesus ben taigi den disipel fu en: „Meki un leti skèin na fesi sma” (Mat. 5:16). Wi e skèin a leti fu Yehovah fu di wi e preiki fu Gado en Kownukondre nanga den prakseri fu en, soleki fa Yesus ben du dati. Wi e skèin leki leti te wi e go oso-fu-oso èn te wi e prati a waarheid na wi wrokope, na skoro, na den birtisma fu wi, noso na ibri tra presi pe wi e kisi okasi fu du dati.—Fil. 2:15.
4 Yesus ben taki dati son sma no ben o wani si a leti na ai (Yoh. 3:20). Fu dati ede wi no e lasi-ati te a moro bigi pisi fu sma na grontapu e weigri fu meki „a krin leti fu a glori bun nyunsu fu Krestes” skèin kon na den tapu (2 Kor. 4:4). Yehovah e luku san de na ini na ati fu a libisma famiri èn a no wani sma di e du onregtfardiki sani fu de na mindri en pipel.
5 Te wi e waka akruderi a pasi fu Yehovah, èn te wi abi a leti na yeye fasi, dan wi kan skèin a leti disi go na tapu trawan. Efu a fasi fa wi e tyari wisrefi e meki tra sma erken taki wi „abi a leti fu libi”, dan kande dati sa gi den deki-ati fu tyari kenki kon na ini den libi, so taki den kan tron tyariman fu leti.—Yoh. 8:12.
6 Te wi e meki a leti fu wi skèin, dan dati e gi wi Mekiman glori èn wi e yepi opregti sma fu kon sabi en èn fu kisi a howpu fu têgo libi (1 Petr. 2:12). Fu di wi abi a leti, meki wi gebroiki en fu sori trawan a pasi di e tyari den komopo na ini a dungru na yeye fasi, so taki den man du den wroko fu a leti.