„Meki ala sma si a leti fu unu”

1. Sortu grani wi kisi?

¹ Fu deibroko te sondongo, a moi leti fu a son e meki Yehovah Gado kisi glori. Ma Yesus ben taigi den disipel fu en fu abi wan tra sortu leti, iya, den ben musu abi „a leti di e gi libi” (Yoh. 8:12). A sabi di wi abi fu den tru tori di abi fu du nanga Gado, na wan spesrutu grani di wi kisi èn a e meki taki wi abi wan seryusu frantwortu. Yesus ben taki: „Meki ala sma si a leti fu unu”, so taki den kan kisi wini fu dati (Mat. 5:16). Na ini a grontapu disi di de na ini dungru fu di sma no sabi Gado, wi musu skèin a leti disi na ala sei. Noiti ete a ben de so tranga fanowdu taki wi du dati! Ma fa wi kan meki wi leti skèin neleki Krestes?

2. Fa Yesus ben sori taki a de prenspari fu fruteri sma den tru tori di abi fu du nanga Gado?

² Te wi e preiki: Yesus ben gebroiki en ten, krakti, nanga den sani di a abi fu meki sma kon sabi den tru tori di abi fu du nanga Gado. A ben du dati na sma oso, na den pren, na tapu den bergi, èn na ala presi pe a ben miti sma. A ben frustan taki a sabi dati ben o gi sma wini fu ala ten (Yoh. 12:46). Fu di Yesus ben wani miti moro sma, meki a ben sreka den disipel fu en fu de „a leti fu grontapu” (Mat. 5:14). Den ben meki a leti fu den skèin fu di den ben du bun gi tra sma èn fu di den ben e fruteri sma den tru tori di abi fu du nanga Gado.

3. Fa wi kan sori taki wi abi trutru warderi gi a leti fu den tru tori di abi fu du nanga Gado?

³ A pipel fu Gado e si en leki wan seryusu frantwortu fu ’tan tyari densrefi leki pikin di de na ini a leti’, èn fu preiki gi sma na ala sei (Ef. 5:8). Te wi e leisi Bijbel nanga tra Kresten publikâsi na so wan fasi taki sma na wroko noso na skoro kan si dati, dan dati kan gi wi na okasi fu bigin wan Bijbel takimakandra nanga den. Wi kan du disi te wi abi pauze. Na a fasi disi, wan yongu sisa ben man bigin wan Bijbelstudie èn a ben prati 12 buku gi den pikin fu en klas.

4. Fu san ede wi e skèin wi leti te wi e tyari wisrefi na wan bun fasi?

⁴ Fu di wi e tyari wisrefi na wan bun fasi: Efu wi wani meki wi leti skèin, dan wi musu luku tu fa wi e tyari wisrefi ibri dei (Ef. 5:9). Te wi e tyari wisrefi leki Kresten, dan nofo tron sma na wrokope, na skoro, noso na tra presi, e si dati. Disi e gi wi na okasi fu fruteri sma den tru tori fu Bijbel (1 Petr. 2:12). Fu eksempre, fu di wan boi fu feifi yari ben tyari ensrefi na wan bun fasi, meki taki en skoromisi seni kari en papa nanga mama. A ben taki: „Noiti ete mi si wan pikin di e frustan so krin san bun èn san ogri!” Iya, a diniwroko fu wi èn a bun fasi fa wi e tyari wisrefi e hari sma kon na „a leti di e gi libi” èn a e meki wi Gado kisi prèise.