Meki wi leti skèin doronomo

¹ San na leti? A wortoe boekoe e taki foe leti leki „wan sani di e meki sma man si”. Ma foe taki en leti, ala di libisma de so fara nanga en technologie, tokoe te nanga now den no kaba foe sabi finifini a piki tapoe na aksi di Jehovah ben poti na Job 38:24. Wi kan tan sondro leti? Sondro leti wi no ben o man libi. Leti de prenspari foe man si boen èn na jejefasi, bijbel e taigi wi taki „Gado na leti” (1 Joh. 1:5). Ala sani foe wi e anga foe a Sma di „e gi wi leti”.​—Ps. 118:27.

² Dati de so na skinsei, ma a de moro so na jejefasi. Falsi relisi meki ipi-ipi sma lasi pasi èn a libi den na ini doengroe na jejefasi foe „firifiri foe feni a skotoe neleki breni man” (Jes. 59:9, 10). Foe di a lobi foe en di no abi speri nanga en sari-atifasi ben boeweigi en, meki Jehovah ’e seni en leti nanga waarheid kon’ (Ps. 43:3). Miljoenmiljoen sma de troetroe di abi warderi, handri na tapoe foe komoto na „doengroe go na ini en toemoesi moi leti”. ​—1 Petr. 2:9.

³ Jesus Krestes e prei wan toemoesi prenspari ròl na ini a tjari foe a leti disi kon na grontapoe. A ben taki: „Mi ben kon leki wan leti na ini grontapoe, so taki ibriwan sma di e poti bribi na ini mi, no e tan na ini doengroe” (Joh. 12:46). Ala en ten, krakti, nanga san a abi, a ben gebroiki foe meki a leti foe waarheid bekènti. A ben rèis na ini a heri kondre pe a ben gebore, foe preiki èn foe leri na ini pikinmoro ala foto nanga dorpoe. A ben ondrofeni froefolgoe foe ala sei dorodoro, ma a ben tanapoe kankan na ini a frantiwortoe di a ben kisi foe prati a waarheid leti.

⁴ Jesus ben poti ala en prakseri na tapoe a froekisi, a leri, nanga na orga foe den disipel foe en nanga wan spesroetoe marki na prakseri. Na Mateus 5:14-16 wi e leisi foe den rai foe en gi den: „Oenoe na a leti foe grontapoe. . . . Meki a leti foe oenoe skèin na fesi sma, so taki den kan si den toemoesi boen wroko foe oenoe èn gi oen Tata di de na hemel, glori.” Neleki Jesus, den ben moesoe de „tjariman foe leti na ini grontapoe”, di e panja a waarheid leti boen fara èn na ala sei (Fil. 2:15). Den ben teki a frantiwortoe disi nanga prisiri èn ben si en leki a moro prenspari marki na ini a libi. Wan sjatoe pisi ten baka dati, Paulus ben man foe taki dati a boen njoensoe „ben preiki na ini a heri mekisani di de na ondro hemel” (Kol. 1:23). A heri kresten gemeente ben bondroe kon makandra foe doe a bigi wroko dati.

⁵ Wi na ini a ten disi, moesoe de nanga tangi dati wi de na mindri den wan di ben „libi den wroko di de foe a doengroe” (Rom. 13:12, 13). Wi kan sori a warderi foe wi, te wi e waka na baka na eksempre di Jesus nanga den getrow kresten na ini a ten di pasa, ben poti. A fanowdoe taki trawan jere a waarheid, de moro prenspari now èn moro serjoesoe leki noiti ete na ini a libisma historia. No wan tra wroko de so toemoesi prenspari èn e tjari den sortoe winimarki disi di abi boen foeroe bakapisi gi wan langa pisi ten, leki a preikiwroko.

⁶ Fa wi kan meki wi leti skèin leki tjariman foe leti? A fosi fasi foe meki wi leti skèin na foe teki prati na ini a Kownoekondre preikiwroko. Ibri gemeente sreka sani dorodoro foe preiki na ini a gebied di den ben kisi. Wi e kisi foeroe èn difrenti sortoe poeblikâsi di de na ini foeroe tongo. Wi e kisi boen foeroe leri nanga jepi foe den gemeente konmakandra èn den wan di lepi e jepi foe gi trawan persoonlijk leri. Okasi foe teki prati de gi man nanga oema, owroewan, èn so srefi gi den pikin. Ibriwan sma na ini a gemeente e kisi a kari foe teki prati so fara leki a man èn a situwâsi foe en e gi pasi foe doe dati. Ala den sani di a gemeente seti, e poti prakseri na tapoe a preikiwroko, èn den sreka sani taki ibri memre man abi prati na wán noso tra fasi. Te wi abi krosibei demakandra doronomo nanga a gemeente, dan dati na a moro boen fasi foe djaranti taki wi leti e tan skèin.

⁷ Wi kan skèin na ini fasi di kande no abi noti foe doe nanga a kotoigi di wi e gi nanga wi mofo srefi. Wi kan hari a prakseri foe trawan soso nanga a fasi fa wi e tjari wisrefi nomo. Dati na san Petrus ben abi na prakseri di a ben gi a tranga: „Tan tjari joesrefi boen na mindri den nâsi, so taki . . . den kan, leki wan bakapisi foe den toemoesi boen wroko foe oenoe di den e si, gi Gado glori” (1 Petr. 2:12). Foeroe sma e kroetoe wan wrokopresi noso wan organisâsi tapoe a gron foe a fasi fa den wan di de na ini, e tjari densrefi. Te sma di e loekoe sani boen, e si sma di e libi akroederi boen gwenti nanga wet, di de eerlijk, di no e soekoe trobi èn di e hori densrefi na wet, dan sma e si taki den sma disi de tra fasi èn den e taki dati den e libi akroederi markitiki di de moro hei leki den wan na baka san a moro bigi pisi foe sma e waka. So boen, wan trowmasra e meki en leti skèin te a e gi en wefi grani èn e sori en dipi warderi tapoe wan lobi fasi; a wefi e doe a srefi foe di a e lespeki a frantiwortoe di a man abi leki edeman. Sma e si taki pikin di e gi jesi na den papa nanga mama èn e kibri densrefi gi sekshoeroedoe nanga a gebroiki foe drug, de tra fasi. Wan wrokoman di e doe en wroko na wan serjoesoe fasi, di de eerlijk èn e hori trawan na prakseri, warti srefisrefi. Te wi e demo den kresten eigifasi disi, dan wi e meki wi leti skèin èn na so wan fasi e rikomanderi na trawan a fasi fa wi e libi.

⁸ Preiki na te wi e taki nanga trawan foe den sani di wi ben leri foe a Wortoe foe Gado. Dati wi e doe te wi e hori lezing na den konmakandra noso e taki nanga den ososma, ma a no de so kwetikweti taki na den okasi disi wawan wi e preiki. Den aladei wroko foe wi e meki wi abi kontakti nanga foeroe sma. Omeni tron na ini wan dei joe e taki nanga den birtisma foe joe? Omeni leisi sma e klòp na joe doro? Nanga omeni difrenti sma joe e miti te joe e bai sani, te joe de na ini wan bus, noso te joe de na joe wrokope? Efoe joe na wan jongoewan na skoro, joe man teri den difrenti sma nanga soema joe e taki ibri dei? Den okasi foe taki nanga trawan lai srefisrefi. A sani di joe moesoe doe nomo na foe hori wan toe tekst na prakseri, foe abi wan bijbel nanga wan toe traktaat nanga joe, èn foe teki fesi foe taki te joe kisi na okasi.

⁹ Ala di okasi preiki makriki srefisrefi, son sma e degedege foe proeberi en. Kande den e fredefrede èn e tan taki dati den e sjen noso senwe toemoesi foe taki nanga wan freimde sma. Kande den e frede foe hari a prakseri foe tra sma tapoe densrefi noso e frede taki den sa kisi wan grofoe piki. Den wan di abi ondrofeni nanga okasi preiki kan froeteri joe taki foeroetron no wan reide no de foe broko-ede. Te joe loekoe en boen, dan tra sma de neleki wi; den abi den srefi fanowdoe, abi den srefi broko-ede, èn den wani den sèm sani gi densrefi èn gi den osofamiri. Foeroe foe den sa piki tapoe wan prisiri fasi te wi taki den odi tapoe wan prisiri noso switi fasi. Kande joe abi foe ’teki deki-ati’ foe bigin taki (1 Tes. 2:2). Te joe bigin kaba, kande joe e froewondroe èn e prisiri nanga den bakapisi.

¹⁰ Wi e kisi blesi te wi e meki wi leti skèin: Djaso wan toe eksempre de foe ondrofenitori di e gi kowroe-ati di de a bakapisi foe okasi preiki: Wan oema foe 55 jari ben go foe koti a strati abra. Leti fa wan wagi ben de foe naki en, wan sisa graboe en anoe èn tjari en go na wan sei pe kefar no ben de èn ben e taki: „Grantangi loekoe boen. Wi e libi na ini kefarlek ten!” Baka dati a taki foe san ede den ten kefarlek so. Na oema ben aksi: „Joe na wan Jehovah Kotoigi?” Foe di a ben kisi wán foe den boekoe foe wi foe en bigi sisa, na oema ben wani foe miti wan foe den Kotoigi foe Jehovah èn a miti di den ben miti na so wan fasi ben meki dati kan.

¹¹ Wan sisa ben bigin wan takimakandra nanga wan oema na ini wan wakti kamra foe wan datra. Na oema ben arki boen èn baka dati a ben taki: „Na wan pisiten kaba taki mi e miti nanga Jehovah Kotoigi; ma efoe wanten na ini a ten di e kon misrefi tron troetroe wan foe den Kotoigi foe Jehovah, dan a sa de foe san joe ben froeteri mi now. A arki di mi arki na joe de leki mi bigin foe si leti na ini wan doengroe presi.”

¹² A doe foe sani tapoe wan switi fasi kan de wan bigin foe jepi trawan foe leri waarheid. Di toe sisa ben waka go na oso baka velddienst, den ben si wan owroe oema di ben e sori leki a siki di a saka foe a bus. Den stòp èn ben aksi na oema efoe a ben abi jepi fanowdoe. A ben froewondroe srefisrefi taki toe freimde sma di a no ben sabi kwetikweti ben sa wani foe sori belangstelling gi en, taki a ben tan aksi foe sabi san ben de a reide dati den ben handri so switi nanga en. Disi ben opo a pasi foe gi kotoigi. Na oema disi ben gi na adres foe en sondro foe degedege èn ben gi den wan waran kari foe fisiti en. Den ben bigin wan studie. Sjatoe baka dati, na oema ben bigin foe fisiti den konmakandra èn e prati waarheid nanga trawan now.

¹³ Wan owroe sisa e gebroiki den okasi foe gi kotoigi froekoemamanten na a watrasei foe a presi pe a e libi. A e miti nanga bediende, sma di e loekoe baby, sma di e wroko na bangi, èn tra sma oema di e teki den mamanten waka na a watrasei. A e hori bijbelstudie ala di a sidon na tapoe den bangi. Difrenti sma ben leri a waarheid foe en èn de Kotoigi foe Jehovah now.

¹⁴ Na en wrokope, wan sisa ben jere wan kolega foe en e taki foe wan politiek partij di a denki taki ben kan loesoe den problema foe grontapoe. A sisa ben taki fri foe a fasi fa a e si sani èn ben froeteri san Gado Kownoekondre sa doe. A takimakandra na en wrokope ben abi leki bakapisi wan geregeld bijbelstudie na oso èn baka ten na oema nanga en masra tron Kotoigi.

¹⁵ Noiti frigiti taki joe de wan Kotoigi! Di Jesus ben kari den disipel foe en „a leti foe grontapoe”, a ben sori taki den ben moesoe jepi trawan foe njan boen foe a jeje leti foe a wortoe foe Gado. Efoe wi e fiti a rai foe Jesus, dan fa wi sa si a diniwroko foe wi?

¹⁶ Son sma e froekisi wan pisi ten wroko te den e soekoe wroko. Den e bosroiti omeni ten nanga moeiti den sa poti na ini, foe di den e froekisi foe gebroiki a moro bigi pisi foe den ten foe waka na baka sani di den e feni taki a e gi moro satisfaksi. Wi e si a diniwroko foe wi na a srefi fasi? Ala di wi ben kan firi froeplekti èn srefi wani poti pikinso ten na wan sei gi a diniwroko, a moesoe de so taki wi abi moro belangstelling gi tra sani?

¹⁷ Foe di wi e froestan taki wan sani leki pisi ten kresten no de, meki wi ben gi wisrefi abra, ’ben drai wi baka gi wisrefi’ èn ben agri foe waka na baka Jesus „doronomo” (Mat. 16:24). A wani foe wi na foe tan doe dati „nanga wi heri sili” èn foe gebroiki ibri okasi foe meki a leti foe wi skèin so taki wi man miti ala sma awansi pe den de (Kol. 3:23, 24). Wi moesoe kakafoetoe gi den fasi foe handri foe grontapoe, tan hori a faja neleki fa a ben de na a bigin èn sorgoe taki a leti foe wi e tan skèin krinkrin. Kande son sma ben gi pasi taki a faja foe den kon kowroe èn a leti foe den kon de soso wan swaki leti, di pikinmoro joe no man si srefi efoe joe de krosibei. So wan sma moesoe kisi jepi kande foe kan kisi a faja baka di ben lasi gowe gi a diniwroko.

¹⁸ Trawan kande e hari densrefi poeroe foe di a boskopoe foe wi no pôpi gi foeroe sma. Paulus ben taki dati a boskopoe foe a Krestes de „wan don sani gi den wan di e kisi pori” (1 Kor. 1:18). Ma a no abi trobi san trawan ben taki, èn a ben froeklari tapoe wan krakti fasi: „Mi no e sjen foe a boen njoensoe” (Rom. 1:16). Wan sma di e sjen, e firi ensrefi lagi noso sondro waarde. Fa a kan taki wi e firi sjen srefi, te wi e taki foe a moro Hei Soeverein foe na universum èn den toemoesi moi sani di a ben seti gi a têgo kolokoe foe wi? A no kan taki wi ben sa firi lagi noso sondro waarde te wi e taki foe den troe sani disi nanga trawan. Na presi foe dati, wi moesoe abi a firi foe doe ala san wi man èn sori na overtoigi foe wi taki wi no abi „notinoti foe sjen gi”.​—2 Tim. 2:15.

¹⁹ A waarheid leti di e skèin now na ini ala kondre lontoe grontapoe e gi nanga firi a howpoe foe têgo libi na ini wan paradijs njoen grontapoe. Meki wi sori taki wi teki a froemane disi na ati foe meki a leti foe wi skèin doronomo! Efoe wi e doe dati, dan wi sa abi reide foe prisiri, neleki den disipel di ala dei „ben tan go doro sondro foe tapoe, foe gi leri èn foe meki a boen njoesoe foe Krestes Jesus, bekènti”.​—Tori. 5:42.