Kownoekondre preikiman e ferteri
„Oenoe moe de santa”
A KOMANDO foe Gado gi kristensma de: „No meki den lostoe di joe ben abi fosten di joe no ben sabi moro betre vorm joe, ma kon de srefi santa ini joe heri waka nanga libi ini akroederi nanga na santawan di ben kari joe bika boekoe taki: ’Oenoe moe de santa bika mi de santa’” (1 Petrus 1:14-16). Sowan santa libi nanga waka de foeroetron wan boen kotoigi gi tra sma (1 Petrus 2:12). Soleki den ondrofenitori di e kon now e sori, dan opregti sma na heri grontapoe e tjari fanowdoe kenki kon ini den libi foe tjari a waka nanga libi foe den ini akroederi nanga a rai disi.
◻ Na ini Ecuador wan man ben stop nanga en bijbelstudie di na kotoigi di ben e studeri nanga en ben sluit uit foe hoeroedoe ede. Na jeje nowtoe foe en ben poesoe en foe go ondrosoekoe tra fasi foe bribi. A ben teki a bosroiti foe go ini wan evangeliumfasi foe bribi èn ben go so kefarlek a fesi dati a ben tron wan prékiman foe en égi kerki. Tokoe en konsensi no ben libi en nanga rostoe, bika a ben e libi nanga wan oema sondro foe a trow nanga en. Di a meki kontakti nanga prékiman foe tra kerki, dan den ben gi en na djaranti dati disi no de wan problema. Ma en ben abi a prakseri dati a no ben de joisti foedi na kotoigi di ben studeri nanga en ben sluit uit foe hoeroedoe ede. A no ben kan froestan foe san-ede en égi kerki no ben pir-’ai gi en. Bakaten na oema di a ben e libi makandra nanga en ben kon ini kontakti nanga Jehovah Kotoigi èn ben bigin studeri nanga den. Na man ben go sidon na a studie. Alatoe e fisiti now den komakandra, e gro ini sabi foe bijbelgronprakseri èn e doe stap foe trow na lanti, sodati den kan dini Jehovah tapoe wan fasi di a e teki.
◻ Na ini wan tra ondrofenitori foe Ecuador wan kotoigi e ferteri: „Na ini februari 1984 wan oema foe middelbare libimarki ben aksi efoe wi no wani studeri nanga en.” San ben poesoe en foe aksi disi? Na brada foe na oemoe disi ben tron wan kotoigi foe Jehovah èn a ben de kefarlek ondro na indruk foe en toemsi moi waka nanga libi. Na a di foe toe bijbelstudie na tori foe smoko ben kon a fesi, san ben de wan foe den problema foe na oema. Ma ini a studie di ben ori a wiki na baka, a ben ferteri nanga prisiri, sensi a ben leri san a bijbel ben taki foe smoko, dati a no ben fasi nowan enkri sigaret moro! A ben abi ete wan problema — na oso foe en ben foeroe nanga popki foe kerki. Ma di a ben lési Deuteronomium 7:26 kaba, pe tanapoe: „Joe no mag tjari wan tegoe sani kon ini joe oso . . . a de wan sani di joe moe gi abra na po-ri”, a ben bron den alamala.
Foe a ten dati a ben bigin foe go na den komakandra. Sensi a ten diti a no ben misi nowan komakandra. Sjatoe na baka a ben man foe wini a moro moeilek problema foe en — a ben tapoe nanga na hoeroedoe mati-fasi di a ben abi nanga wan trowman. Foe a fositron ini en libi a ben man now foe ondrofeni troetroe kolokoe, foedi a ben kan dini Jehovah now nanga wan krin konsensi. Na ini april 1985, di a ben léi 4 bijbelstudi kaba nanga tra sma a ben teki dopoe. A tra marki di ben de na en fesi ben de foe tron wan pionier, foedi a pionierwroko leki fa a ben firi de a moro boen fasi tapoe san a ben kan sori en warderi gi Jehovah, di ben fri en poeroe foe wan „hoeroe libi foe sosofasi”.
◻ Den toemsi moi boen bakapisi foe wan waka nanga libi di boen na Gado ai ben kon na fesi tapoe wan skoro foe oemapikin na Kenia, pe na boen libi nanga waka foe wan kotoigi ben kon srefsrefi a fesi. Na skoro ben teki négi onderwijzer na wroko. Wan foe den ben de wan Kotoigi foe Jehovah. Ma wan-froe-wan den ben moesoe poeroe den a wroko foe seks hoeroedoe ede nanga den studenti di ben de oemapikin. Baka wan pisten soso wan foe den négi onderwijzer ben tan abra — na di ben de wan Kotoigi foe Jehovah!
Ija, sma di ben libi wan hoeroedoe libi kan kenki. Efoe wi na ini wi heri waka nanga libi kon de santa, dan no wawan wi e gi wan moi kotoigi na tra sma, ma wi e meki Jehovah ati prisiri toe. Disi e meki wi kon de ini Gado ai boen foe kisi tego libi. — Odo 26:11.