Tan gi makandra deki-ati
1 Na apostel Paulus ben du ala san a man fu gi den brada nanga sisa fu en deki-ati (Tori. 14:19-22). Na a srefi fasi, wi e broko wi ede nanga wi brada te den de na ini muilek situwâsi, èn wi wani yepi den. Bijbel e sori wi taki a no den owruman wawan musu broko den ede nanga trawan, ma taki wi alamala musu du dati (Rom. 15:1, 2). Luku tu fasi fa wi kan gi yesi na a frumane disi di gi na wan lobi-ati fasi: „Tan trowstu makandra èn tan gi makandra deki-ati.”—1 Tes. 5:11.
2 Kon sabi san trawan abi fanowdu: A Wortu fu Gado e sori taki Dorkas „ben du furu bun sani èn a ben du bun gi pôtisma” (Tori. 9:36, 39). A ben poti prakseri na den wan di ben de na nowtu èn a ben du san a man fu yepi den. A gi wi wan bun eksempre trutru! Kande yu yere taki wan owru brada noso sisa abi wan sma fanowdu fu rèi en go na den konmakandra. Noso kande wan pionier de di no abi sma fu wroko bakadina na ini a preikiwroko, na tapu wan fu den dei mindriwiki. Efu yu kon sabi taki wan sma abi den sortu sani dati fanowdu èn efu yu e du wan sani fu yepi en, dan a no de fu taki dati a sma sa kisi deki-ati fu dati trutru!
3 Taki fu yeye afersi: Wi kan gi trawan deki-ati tu nanga den sani di wi e taki (Ef. 4:29). Wan owruman di abi ondrofeni, ben taki: „Efu yu wani gi trawan deki-ati, dan yu musu taki fu yeye afersi. Efu yu wani bigin wan takimakandra di e gi sma deki-ati, dan kande yu kan poti na aksi nomo: ’Fa yu kon na ini waarheid?’” Sori taki yu e broko yu ede trutru nanga den yonguwan na ini a gemeente. Go na den wan di e firi brokosaka èn den wan di e syensyen kande, èn sori den taki yu e broko yu ede nanga den (Odo 12:25). No gebroiki yu ten fu taki soso fu den sani di sma fu grontapu e du fu meki prisiri, ma na presi fu dati, gebroiki a ten dati fu taki fu yeye afersi nanga yu brada nanga sisa.—Rom. 1:11, 12.
4 Ma san yu kan taki fu gi trawan deki-ati? Yu feni wan gronprakseri no so langa pasa di yu ben e leisi Bijbel, noso di yu ben e studeri? A gronprakseri dati meki yu kisi moro lobi nanga warderi gi Yehovah? A de so taki yu yere wan sani na wan publikitaki noso na wan Waktitoren-studie di naki yu ati? Noso yu leisi wan ondrofenitori di tranga yu bribi? Efu yu e warderi den sortu gudu disi na yeye fasi, dan ala ten yu sa man fruteri trawan sani di e gi den deki-ati.—Odo 2:1; Luk. 6:45.
5 Te wi e yepi sma di abi wan sani fanowdu èn te wi e gebroiki wi tongo na wan koni fasi, dan na so wan fasi wi kan tan gi makandra deki-ati.—Odo 12:18.