Du bun èn prati sani nanga trawan
1 Dorkas „ben du furu bun sani èn a ben du bun gi pôtisma” (Tori. 9:36, 39). Sma di ben sabi en, èn sosrefi Yehovah Gado, ben lobi Dorkas fu di a ben abi a gwenti fu gi sma sani. Hebrewsma 13:16 e taki: „No frigiti fu du bun èn fu prati sani nanga trawan, bika den sortu ofrandi dati e plisi Gado srefisrefi.” Fa wi kan du bun èn prati sani nanga trawan na ini a ten disi?
2 Wan fasi fa wi kan yepi trawan, na fu prati „den warti sani” fu wi nanga den (Odo 3:9). A moni di wi e poti leki bijdrage gi a wroko na heri grontapu e meki taki Kownukondre zaal, kongreshal, nanga bijkantoro kan bow na heri grontapu. A fasi fa wi e gi sani e meki taki milyunmilyun sma e kisi wini fu a leri fu Gado èn fu a yeye demakandra di e gi deki-ati.
3 Gi trowstu: Te sma e kisi fu du nanga rampu, dan a pipel fu Yehovah de klariklari fu „du bun” gi tra brada nanga sisa, ma sosrefi gi tra sma di no abi a srefi bribi leki wi (Gal. 6:10). Baka di wan fabriki na ini Fransikondre ben sutu panya, dan wan trowpaar di ben libi krosibei fu a fabriki ben taki: „Wantewante den Kresten brada kon yepi wi fu krin na oso fu wi, ma sosrefi den oso fu tra sma di ben tan na ini a srefi gebow. Den birtisma fu wi ben fruwondru fu si someni sma di ben kon yepi wi.” Wan tra sisa taki tu: „Den owruman ben kon yepi wi. Den ben kon fu gi wi deki-ati. Fu taki en leti, disi na san wi ben abi fanowdu, a ben prenspari moro leki a yepi na materia sei.”
4 Furu fasi de fa wi kan du bun gi den birtisma fu wi, ma toku a moro prenspari fasi fa wi kan yepi den, na fu prati a warti sabi fu waarheid nanga den, di abi fu du nanga „a howpu fu têgo libi” di Yehovah srefi pramisi (Tit. 1:1, 2). A boskopu fu Bijbel e gi trutru trowstu na sma di e sari fu a fasi fa sani de na grontapu, èn fu den eigi sondu fasi (Mat. 5:4). Meki wi du bun, èn meki wi prati nanga trawan te wi man du dati.—Odo 3:27.