’Lobi fu Gi, De Klariklari fu Prati Nanga Trawan’
1 Furu yarihondro pasa, na apostel Paulus ben taigi Timoteus fu gi kompe-bribiman deki-ati „fu du bun, fu de gudu ini bun wroko, fu lobi fu gi, fu de klariklari fu prati nanga trawan” (1 Tim. 6:18). Paulus so srefi ben memre den Hebrew Kresten fu no frigiti „fu du bun èn fu prati sani nanga trawan” (Hebr. 13:16). Fu san ede a ben skrifi den rai disi? Bika a ben sabi taki „glori nanga grani nanga vrede gi ibriwan sma di e du san bun”, ben o de fu kisi.—Rom. 2:10.
2 Fu di Yehovah na a Mekiman, meki en na a Eiginari fu ala sani (Openb. 4:11). Wi e warderi trutru san A e du nanga den gudu fu en fu a bun fu wi. Ala di furu sma no de nanga tangi na ati, toku a Moro Heiwan e tan gi ala sma na okasi fu kisi wini fu den bogobogo sani di a seti fu hori wi na libi (Mat. 5:45). Yehovah ben gi srefi en Manpikin di a lobi so furu, leki wan srakti-ofrandi, so taki wi ben sa kan abi têgo libi. A lobi di Gado sori wi no musu dwengi wi fu sori taki wi de nanga tangi na ati, fu di wi lobi fu gi trawan sani?—2 Kor. 5:14, 15.
3 San Wi Kan Prati Nanga Trawan? A fiti srefisrefi dati wi e gebroiki awansi sortu gudu wi abi, na wan fasi di bun na ini Yehovah ai. Seiker wi wani horibaka na materia sei èn so srefi na yeye fasi gi a Kownukondre wroko di e du na heri grontapu. A no de fu taki dati a bun nyunsu na a moro warti gudu di iniwan sma kan abi, bika a de „a krakti fu Gado fu frulusu ibriwan sma” (Rom. 1:16). Te wi e gebroiki bun furu fu a ten fu wi nanga den gudu fu wi ibri mun fu teki prati na a preikiwroko èn na a leriwroko, dan wi sa man prati a gudu na yeye fasi disi nanga trawan, so taki den kan kisi têgo libi.
4 Yehovah e prisiri trutru te wi e yepi den pôtiwan. A e pramisi wi taki a sa blesi wi, èn so srefi A e memre wi: „Warti sani no sa tyari wini kon na a dei fu atibron, ma regtfardikifasi srefi sa frulusu sma fu dede” (Odo 11:4; 19:17). Te wi e horibaka na materia sei gi a Kownukondre wroko èn te wi e teki prati doronomo na a preiki fu a bun nyunsu, dan wi e sori na wan kefalek moi fasi taki trutru wi na sma di lobi fu gi èn taki wi de klariklari fu prati nanga trawan.