„A Wroko fu Unu No De fu Soso”
1 Dati na trutru wan prakseri di e gi sma deki-ati! Unu no e wroko fu soso na ini a diniwroko fu Yehovah (1 Kor. 15:58). Kontrari fu dati, prakseri fa sma e du tranga muiti fu pruberi fu abi wan moro bun posisi na ini a libi, noso fu abi moro moni. Kande den e suku fu teki moro hei leri furu yari langa noso den e wroko tranga srefisrefi fu abi en moro bun na materia sei. Toku, fu di sma abi fu du nanga „ten nanga sani di e pasa èn di sma no sabi na fesi”, meki kande noiti den e kisi san den e feti na baka na ini a libi, noso kande den abi fu teki moro mendri leki san den ben wani na materia sei. Leki ’wan strei fu kisi a winti di e wai’, a muiti di den e du de fu soso (Preik. 1:14; 9:11). Fu dati ede a de tumusi prenspari dati wi abi furu fu du ini a wan-enkri wroko di no de fu soso. A wroko disi e tan wan prenspari sani!
2 A Wroko Di De Trutru Prenspari: A wroko fu preiki a bun nyunsu fu Gado Kownukondre na a moro prenspari wroko na grontapu. Wi musu du a wroko disi efu sma e arki, noso efu den no e arki. Neleki Paulus, wi wani taki tu: „Mi krin fu a brudu fu ala libisma, bika mi no ben draidrai fu fruteri unu ala rai fu Gado.”—Tori. 20:26, 27.
3 Te sma e arki èn e teki a Kownukondre boskopu na wan bun fasi, dan disi e gi prisiri srefisrefi! Wan yongu uma en tanta dede. A yongu uma ben aksi ensrefi pe a tanta fu en ben go — na hel noso na hemel? A ben begi Gado fu kisi yepi, ala di a ben gebroiki a nen fu Yehovah soleki fa en sisa ben leri en fu du. A no ben teki langa baka dati di a bigin studeri Bijbel èn a bigin go na den Kresten konmakandra. A bigin si a libi na wan heri nyun fasi, èn a broko a matifasi di a ben abi nanga den grupu sma di e du ogri na strati. A yongu uma disi kaba smoko, a kaba gebroiki drug, èn so srefi a kaba fufuru. A e erken: „Na lobi gi Yehovah wawan, meki mi gowe libi so wan takru fasi fu libi. Na Yehovah wawan ben kan gi mi a howpu fu têgo libi fu di a abi furu sari-ati.” A yongu uma disi no e libi wan libi moro langa di e tyari en no wan enkri bun.
4 Awansi sma no wani arki, toku yu e du wan wroko di abi wan warti sani leki bakapisi. Den sma sabi taki Kotoigi fu Yehovah kon na den oso. Disi na wan buweisi taki yu abi soifri retifasi, getrowfasi, nanga lobi. So bun, a wroko di yu e du gi Masra de fu soso? Noiti a sa de so!